ශ්රී ලංකාවේ පාසල් ඩිජිටල්කරණය සඳහා චීනයේ හුවාවි සමාගමේ සහාය ලබාදීම පිළිබඳ ගිවිසුමකට අද (17) අත්සන් කළ බව ජනාධිපති මාධ්ය අංශය වාර්තා කරයි.
චීනයේ සිව් දින නිල සංචාරයක නිරත ජනාධිපති රනිල් වික්රමසිංහ ප්රමුඛ දූත පිරිස අද (17) පෙරවරුවේ බීජිං නුවර හුවාවි සමාගමේ පර්යේෂණ හා සංවර්ධන මධ්යස්ථානයේ කළ සංචාරයක් අතර මෙම ගිවිසුම අත්සන් කර තිබිණි.
එහිදී හුවාවි (Huawei) තාක්ෂණ ආයතනයේ ජ්යෙෂ්ඨ උප සභාපති සහ හුවාවි ආසියා පැසිෆික් කලාපීය සභාපති සයිමන් ලින් (Simon Lin) පැවසුව් තම සමාගම දැනටමත් තාක්ෂණ හා යටිතල පහසුකම් සැපයිමේ කාර්යයට අමතරව ශ්රී ලංකාවේ විශ්වවිද්යාල කිහිපයක් සමගම අධ්යයන කාර්යයන්ට සම්බන්ධ ආධාර උපකාර සැපයීමේ ක්රියාවලියක් ආරම්භ කර තිබෙන බවය.
ශ්රි ලංකාවේ මෘදුකාංග හා දෘඩාංග ඉංජිනේරුවන් වාර්ෂිකව බිහි කිරීමේ අධ්යයන වැඩසටහනක් වෙනුවෙන් සහාය ලබාදීමට තම සමාගම සූදානම් බවත් ඔහු පැවසුවේය.
.මෙහිදී අදහස් දැක්වූ ජනාධිපති රනිල් වික්රමසිංහ සඳහන් කළේ තමන් මෙවර හුවාවි කේන්ද්රස්ථානයට පැමිණියේ ශ්රී ලංකාවේ අනාගතය පිළිබඳව සාකච්ඡා කිරීමට බවයි.
ඩිජිටල් අධ්යාපන ක්රමවේදය සහ හරිත බලශක්ති නිෂ්පාදනය සම්බන්ධයෙන් චීන රජයේ මෙන්ම හුවාවි සමාගමේ සහාය ද ශ්රී ලංකාවට ඉතා වැදගත් බව ජනාධිපතිවරයා මෙහිදී අවධාරණය කළේය.
අනාගත ලෝකයට ශක්තිමත්ව මුහුණදීම සඳහා ශ්රී ලංකාවේ ඉතා තරගකාරී ඩිජිටල් සහ හරිත ආර්ථිකයක් නිර්මාණය කළයුතු බවත්, ඒ සඳහා මූලික පදනම දැන් සැකසෙමින් පවතින බවත් ජනාධිපති රනිල් වික්රමසිංහ මෙහිදී වැඩිදුරටත් පෙන්වා දුන්නේය.
ආර්ථිකය සමගම ලාංකේය පුරවැසියන්ද ඩිජිටල් තාක්ෂණයෙන් බල ගැන්වීමේ වැදගත්කම පිළිබඳ මෙහිදී පුළුල් ලෙස සාකච්ඡාවට ලක් වූ අතර හුවාවි සමාගම විසින් සිදුකරන ජාත්යන්තර සේවාවන් පිළිබඳව මෙන්ම ඔවුන්ගේ නවතම තාක්ෂණ ක්රමවේදයන් සහ උපකරණ පිළිබඳවද මෙහිදී ශ්රී ලංකා නියෝජිත පිරිස දැනුවත් කෙරිණි.
විදේශ කටයුතු අමාත්ය අලි සබ්රි, ප්රවාහන හා ජනමාධ්ය අමාත්ය බන්දුල ගුණවර්ධන, ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක හා ජනාධිපති කාර්ය මණ්ඩල ප්රධානි සාගල රත්නායක මෙම අවස්ථාවට එක්ව සිටියහ.
ජනාධිපති රනිල් වික්රමසිංහ ප්රමුඛ ශ්රී ලංකා දූත පිරිස චීනයේ සිවිල් ඉංජිනේරු ඉදිකිරීම් සංස්ථාව ඇතුළු ප්රමුඛ පෙළේ ව්යවසායක ආයතන ගණනාවක ප්රධානීන් සමඟද සාකච්ඡා පැවැත්වූහ.
