මහබැංකු අධිපතිවරයාත්, මුදල් අමාත්යාංශ ලේකම්වරයාත්, ජනාධිපති ආර්ථික උපදේශක දුමින්ද හුලංගමුවත් ඇතුළු ශ්රී ලාංකික දූත මණ්ඩලය ඊයේ සහ පෙරේදා දෙදින තුළ වොෂින්ටනයේ දී ජාත්යාන්තර මූල්ය අරමුදල සමග මේ වනවිට ක්රියාත්මක ගිවිසුම ශ්රී ලංකාවට බලපාන ආකාරය සම්බන්ධව ගැඹුරින් සාකච්ඡා කර ඇතැයි කැබිනට් ප්රකාශක අමාත්ය විජිත හේරත් ප්රකාශ කළේය.
නව රජය බලයට පත් වූ පසු අයි.එම්.එෆ්. දූත පිරිස ලංකාවට පැමිණ සාකච්ඡා කරනු ලැබුවේ අයි.එම්.එෆ් ගිවිසුම සමග ආණ්ඩුවේ ඉදිරි කටයුතු සිදුකරන ආකාරය මිස ගිවිසුම ගැන ගැඹුරු සාකච්ඡාවක් නොවන බව ද ඇමතිවරයා පෙන්වා දුන්නේය.
වොෂින්ටන් නුවර දී සිදුකළ සාකච්ඡාවලදී දැනට පනවා ඇති වැට් බදු සහ අනෙකුත් බදු පිළිබඳවත් ආදායම් උත්පාදනය පිළිබඳවත් විෂයකොට ගෙන සාකච්ඡා කළ බව කී කැබිනට් ප්රකාශකවරයා කීවේ එම සාකච්ඡාවලදී අවසන් තීන්දු වෙත එළඹ නැති බවය.
මෙම සංචාරයෙන් අනතුරුව ඔවුන් විශේෂ මාධ්ය සාකච්ඡාවක් කැඳවා සාකච්ඡාවල තත්ත්වය පිළිබද දැනුම්වත් කරනු ඇතැයයි ද ඇමතිවරයා පැවසුවේය.
