ශ්රියානි විජේසිංහ –
රට හැර යාමට සැරසෙන වෛද්යවරු 5000ට අධික පිරිසක් මෙරට තුළ රදවා ගැනීමට සෞඛ්ය අමාත්යංශය වහාම ක්රියාත්මක විය යුතු යැයිද එසේ නොවුණහොත් ලබන 23 වනදා රැස්වන රජයේ වෛද්ය නිලධාරීන්ගේ සංගමයේ විධායක සභාවේදී සංගමය මෙතෛක් නොගත් තීන්දු තිරණයන් ගැනීමට සිදුවනු ඇතැයි සංගමයේ ලේකම් වෛද්ය හරිත අලුත්ගේ සඳහන් කළේය.
පසුගිය වසර තුළදී වෛද්යවරුන් 1500ක පිරිසක් රට හැර ගොස් මේ වන විට විදේශයන්හී රැකියාවන් කරන බවත් ඒ අතර තවත් වෛද්යවරු 5000ක පිරිසක් විදේශ රටවලට යාමට මේ වන විටත් අවශ්ය සුදුසුකම් සපුරාලමින් සිටින බවත් හෙතෙම සඳහන් කරයි.
වෛද්යවරු රට හැරයාම වලක්වා ගැනීම සදහා තම සංගමය සෞඛ්ය බලධාරීන්ට සහ ජනාධිපතිවරයාට යෝජනා මාලාවක් ඉදිරිපත් කළ නමුත් ඔවුන් නෑසූකන්ව සිටි බැවින් අද වන විට මෙය මහා ඛේදවාචකයක් බවට පත්ව ඇතැයි වෛද්ය අලුත්ගේ පෙන්වාදේ
මේ අනුව ලබන 23වන දින දිවයිනපුරා ශාඛා සමිති 128ක නියෝජිතයින් කොළඹට රැස්ව පවත්වන මධ්යම කාරක සභාවේදී සෞඛ්ය බලධාරීන්ගේ ඇස් ඇරවීමේ විශේෂ වෘත්තීය සමිති ක්රියාමාර්ගයක් ප්රකාශයට පත්කරන බව හෙතෙම අවධාරණය කරයි.
