වියදම් සීමා කිරීමේ ජනාධිපති චක්‍රලේඛය සියල්ල තීන්දු කරන ලකුණු… තැපැල් ඡන්දය දින නියමක් නැතිව කල් යයි!

2023 පළාත් පාලන මැතිවරණයේ තැපැල් ඡන්ද විමසීම දින නියමක් නොමැතිව කල් යන බව ශ්‍රී ලංකා මැතිවණ කොමිසම නිවේදනය කර ඇත.

තැපැල් ඡන්ද විමසීම සැලසුම්කර තිබුණේ ලබන 22, 23 සහ 24 දිනවලය.

කෙසේ වෙතත් මාර්තු මස 09 වැනිදා පැවැත්වීමට දින නියම කළ මැතිවරණය පැවැත්වෙනවා ද නොපැවැත්වන බවට මැතිවරණ කොමිසම මෙතෙක් තීරණයක් ගෙන නැත.

කෙසේ වෙතත් අද දේශපාලන පක්ෂ  මැතිවරණ කොමසාරිස්වරයා හමුවූ අවස්ථාවේ දී ඡන්ද පත්‍රිකා මුද්‍රණය කිරීම පිළිබඳ මතු වූ ගැටලුව ඔහු පක්ෂ ලේකම්වරුන් ඉදිරියේ පැහැදිලි කර ඇත.

ජනාධිපතිවරයා විසින් සියලුම රාජ්‍ය ආයතනවල වියදම් සීමා කිරීම සඳහා නිකුත් කළ චක්‍රලේඛය කිසිම ආයතන ප්‍රධානියෙකුට උල්ලංඝණය කළ නොහැකි වීම නිසා රජයේ මුද්‍රණ දෙපාර්තමේන්තුව මුදල් ලැබෙන තුරු ඡන්ද පත්‍රිකා මුද්‍රණය කිරීම ප්‍රතික්ෂේප කර ඇති බව මැතිවරණ කොමිසම පක්ෂ නායකවරුන්ට දන්වා ඇත.

අධිකරණ නියෝගය ලබා දී ඇත්තේ මැතිවරණ කොමිසමට අදාල කටයුතු කරගෙන යෑමට බවත්, ඒ සඳහා මුදල් ප්‍රතිපාදන වෙන්වී නැති බවත් මැතිවරණ කොමිසමේ සභාපතිවරයා පක්ෂ ලේකම්වරුන් වෙත දන්වා ඇත.

ජනාධිපතිවරයා නිකුත් කළ චක්‍රලේඛය මැතිවරණ කොමිසමටත් අදාල බව එහිදී කොමිසමේ සභාපතිවරයා පැහැදිලි කර ඇත.

මේ තත්ත්වය තුළ තැපැල් ඡන්ද විමසීම දින නියමක් නොමැතිව කල් දැමීමට මැතිවරණ කොමිසමේ සභාපතිවරයා තීරණය කර තිබේ.

මෙම තීරණයට එරෙහිව පක්ෂ නායකයින් අදහස් දක්වා ඇතත් නිශ්චිත එකඟතාවයකින් තොරව රැස්වීම නිමා වී තිබේ.