මනම්පිටිය නිමල් ජයරත්න –
පොළොන්නරුව වැලිකන්ද නගරයට අද (23) අලුයම කඩාවැදුණු වන අලි රංචුවක්, නගරයේ අලුතින් ඉදිකර තිබූ වෙළඳ සංකීර්ණයේ දොරවල් රැසකට හානිකර නගරයේ තවත් වෙළඳසැල් විශාල ප්රමාණයකට හානි සිදුකර පලාගොස් ඇති බව වැලි කන්ද නගරවාසීහු සඳහන් කරති.
නිරන්තරයෙන් වැලිකන්ද නගරයට රාත්රී කාලයේ පැමිණෙන මෙම වන රංචු තමන්ගේ වෙළඳසැල්වලට දැඩි ලෙස හානි සිදුකරන බවත් අලුතින් ඉදිකරන ලද වෙළඳසංකීර්ණයේද දොරවල් විශාල ප්රමාණයකට දැඩි අලහභානි සිදුකර ඇති බවද වෙළඳසැල් හිමියෝ ප්රකාශ කරති.
සෝමාවතීය හා මාදුරුඔය ජාතික වනෝද්යානයෙන් මෙම වන අලි ගම්වදින බවත්, වැලිකන්ද නගරයට නුදුරින් මඟුල්පොකුණ හරහා ඉදිකර ඇති අලි කොරිඩෝව අසාර්ථක වීම, වැලිකන්ද නගරයට වන අලි පැමිණීම ප්රධාන හේතුවක් බවත්, මේ පිළිබඳ කොතෙක් වනජීවී නිලධාරීන්ට පැමිණිලි කරද අලි මිනිස් ගැටුමට මෙතෙක් විසඳුම නොමැති බවද නගරවාසීහු කියති.
මෙම තත්ත්වය හමුවේ තමන්ට වෙළඳාම් කිරීමට නොහැකි තත්ත්වයක් මතුව ඇති බවවා පමණක් නොව, ජන ජීවිතය ද අවුල් සහගත වී ඇති පවසන නගර වාසීහු වැලිකන්ද නගරයට නිරන්තරයෙන් පැමිණෙන වන අලි ගැටලුවට කඩිනම් විසඳුම් ලබාදීමට කටයුතු කරන ලෙස රජයෙන් ඉල්ලා සිටිති.
අලි මිනිස් ගැටුම සහ වැලිකන්ද නගරයට නිරන්තරයෙන් වන අලි පැමිණීම පිළිබඳව අප වැලිකන්ද වනජීවී කාර්යාලයෙන් දුරකථනයෙන් කළ විමසීමකදී එහි නිලධාරියකු සඳහන් කළේ වැලිකන්ද නගරයට පමණක් නොව අවට ගම්මාන රැසකට වන අලි පැමිණෙන්නේ අලින්ගේ වාසස්ථාන මිනිසුන් විසින් විනාශ කිරීම නිසා බවය.
අලි මිනිස් ගැටුමට කෙටිකාලීන හා දිගුකාලීන විසඳුම් ලබාදීමේ අවශ්යතාවය පවතින බවත්, එලෙස පැමිණෙන වන අලි පලවා හැරීමට මෙහෙයුම් ක්රියාත්මක කරනවා හැරෙන්නට තමන්ට වෙන විසදුමක් නොමැති බවත් වනජීවී නිලධාරීහු සඳහන් කළහ.
