සාකච්ඡාව – ශ්රියානි විජේසිංහ
වඳුරු උණ රෝගය වැලදුණු පළමු පුද්ගලයාව පසුගියදා මෙරටින් වාර්තා විය . විදේශ රටවල වඳුරු උණ වේගයෙන් පැතිරෙමින් ඇති වටපිටාවක විදේශවලින් රට තුළට ඇතුළුවන පුද්ගලයින් අතරින් වඳුරු උණ රෝගය පැතිරීයෑමේ අවදානමක් ගැන ඊයේ (07) සෞඛ්ය අංශ ප්රකාශ කළේය. රට තුළින් වඳුරු උණ රෝගියෙක් වාර්තා වීම සහ මතු වී ඇති අවදානමත්, රෝග ව්යාප්තිය පාලනය සදහා මේ වන විට සෞඛ්ය අමාත්යංශය ගෙන ඇති වැඩ පිළිවෙළත් සම්බන්ධයෙන් “ලංකාසර“ වසංගත රෝග අංශයේ හිටපු අධ්යක්ෂ වසංගත රෝග විශේෂඥ වෛද්ය නිහාල් අබේසිංහ සමග කෙටි සාකච්ඡාවක් කළේය. මේ අප විමසූ ප්රශ්නවලට ඔහු ලබා දුන් පිළිතුරුය.
ප්රශ්නය – වඳුරු උණ රෝගය පැතිර යාම සම්බන්ධයෙන් සෞඛ්ය අමාත්යංශය අනුගමනය කරන වැඩ පිළිවෙළ සම්බන්ධයෙන් වසංගත රෝග විද්යා අංශයේ හිටපු අධ්යක්ෂවරයෙක් ලෙස ඔබ සෑහීමටක පත්වෙනවාද?
පිළිතුර – අපිට තවමත් එක් රෝගියෙකු පමණයි වාර්තා වෙලා තියෙන්නේ. ඒ නිසා සෞඛ්ය අමාත්යංශය ගනු ලබන ක්රියා මාර්ගයන් මොනවාද කියා දැනගන්න නැහැ. නමුත් සෞඛ්ය අමාත්යංශයේ ඉහළ නිලධාරීන් ප්රවෘත්ති සාකච්ඡාවක් පවත්වා ප්රකාශ කර තිබුණා “ මේ සදහා බිය විය යුතු නැහැ. අපේ ප්රතිශක්තිය අනුව පාලනය කර ගත හැකියි. රෝගයට ප්රතිකාර කරන්නේ රෝග ලක්ෂණ අනුව. ඒ සඳහා ප්රමාණවත් ඖෂධ තොග තියෙනවා.” කියලා .
නමුත් සෞඛ්ය අමාත්යංශයේ නිලධාරීන්ගේ කාර්ය භාරය විය යුත්තේ දේශපානඥයින් කළ යුතු ප්රකාශයන් කිරීම නොවෙයි. ඔවුන් කළ යුත්තේ එය නොවෙයි. “මේ රෝගය රටපුරා පැතිර යාම වළක්වා ගැනීම සඳහා ක්රියමාර්ගයන් ගනිමින් තියෙනවා…“ කියන පණිවිඩය සෞඛ්ය අමාත්යංශය විසින් ජනතාවට ලබා දිමයි කළ යුතු වන්නේ.
ප්රශ්නය – රෝග ව්යාප්තිය පාලනය කර ගැනීම සඳහා ඔබ යෝජනා කරන ක්රියා මාර්ගයන් මොනවාද?
පිළිතුර – මේ වයිරසය විදේශයන්ගෙන් මෙරටට පැමිණෙන පුද්ගලයෙකුගෙන් හෝ කණ්ඩායමකින් තමයි ව්යාප්ත වෙන්නේ. ඒ නිසා ගුවන්තොටුපලේ වරාය වැනි ස්ථානයන්ගේ ආවේක්ෂණ වැඩ පිළිවෙළක් ආරම්භ කළ යුතු වෙනවා.
ඒ වගේම සෞඛ්ය කාර්ය මණ්ඩලය දැනුවත් කළ යුතු වෙනවා. සෞඛ්ය අමාත්යංශය ගනු ලබන මෙම ක්රියාමාර්ගයන් සම්බන්ධයන් ජනතාව දැනුවත් කිරීමක් කළ යුතුයි. ඒ වගේම මේ රෝගය බෝවන අන්දම පිලිබඳව ජනතාව දැනුවත් කළ යුතු වෙනවා.
ප්රශ්නය – යම් හෙයකින් මේ රෝගය වසංගතයක් ලෙස පැතිර ගියහොත් එය පාලනය කර ගැනීම සඳහා අපට අවශ්ය තරම් ඖෂධ තිබෙනවා කියා ඔබ විශ්වාස කරනවාද?
පිළිතුර – මේවන විට සියලුම රෝගවලට ප්රතිකාර කිරීම සම්බන්ධයෙන් අර්බුදයක් පවතිනවා. අපට අවශ්ය ඖෂධ හා ශල්ය ද්රව්යවලින් සියයට 80 ක් පමණ ගෙනඑන්නේ විදේශයන්ගෙන්. මේ වන විට බරපතල ඖෂධ හිඟයක් තියෙනවා. අත්යවශ්ය ඖෂධවලින් සියයට 50ට වඩා වැඩි ප්රමාණයක් හිඟයක් කියලා සෞඛ්ය අංශම නිවේදන නිකුත් කරලා තියෙනවා.
එවන් තත්ත්වයක් තුළ වදුරු උණ රෝගය වසංගතයක් ලෙස පැතිර ගියහොත් ඊට මුහුණ දීමට අවශ්ය තරම් ඖෂධ අප සතුව නැහැ. ඇතැම් විට ඖෂධ ගෙන්වීම සඳහා රජය කිසියම් ක්රියාමාර්ගයක් ගනිමින් සිටිනවා විය හැකියි.
ප්රශ්නය – මේ වගේ ඖෂධ හිඟයක් රටතු ඇති වුණේ ඇයි?
පි- අපි අතීතයේදී සිට ඖෂධ ගෙන්වීම සඳහා කරගෙන ගිය වැඩපිළිවෙල ක්රියාත්මක වුණේ නැහැ. 2022 – 2023 වසර සඳහා අවශ්ය ඖෂධ හා ශල්ය ද්රව්ය ඇනවුම් කිරීමට සෞඛ්ය අමාත්යංශය කටයුතු කරලා නැහැ. ඒ නිසා තමයි මේ වගේ ඖෂධ හිඟයක් පැන නැගුණේ.
දැනට ආණ්ඩුව කරන්නේ කිසියම් පරිත්යාගයක් මත යැපීමට කටයුතු කිරීමක් පමණයි. එවන් තත්ත්වයක් යටතේ කවුරුන් හෝ කියනවා නම් ඖෂධ හිඟයක් නැහැ කියලා ඒක සත්ය ප්රකාශයක් නෙවෙයි.
ප්රශ්නය – යම් හේතුවකින් මෙය වසංගතයක් ලෙස පැතිර ගියහොත් ඉන් මිදීමට ජනතාවට දිය හැකි පණිවිඩය කුමක්ද?
පිළිතුර – මෙම රෝගය වැළදෙන්නෙ සමීප ඇසුරකින්. ඒ නිසා සැකකටයුතු පුද්ගලයින් සමග සමීප ඇසුරු නැවැත්වීම සබන් යොදා දෑත් නිරන්තරයෙන් පිරිසිදු කිරීම වැනි සෞඛ්ය ආරක්ෂිත පිළිවෙත් අනුගමනය කිරීම අනිවාර්යයි.
ප්රශ්නය- මේ මොහොත වන විට වසංගත රෝග විද්යා අංශය මෙම රෝග ව්යාප්තිය පාලනය කර ගැනීම සඳහා ගෙන ඇති ක්රියා මාර්ගයන් සම්බන්ධයේ ඔබ සෑහීමකට පත්වෙනවාද?
පිළිතුර – මේ මොහොත වන විට ඒ අය රෝගය පාලනනය සඳහා යම් යම් වැඩපිළිවෙළක් යොදනවා විය හැකියි. ඒ අය සෞඛ්ය කාර්ය මණ්ඩල දැනුවත් කරනවා විය හැකියි.
නමුත් මේ වැඩපිළිවෙළ ජනතාව දැනගත යුතුයි. ඒ නිසා ජනතාවට නිකම්ම බිය විය යුතු නැතැයි කියා ප්රකාශ කළාට පලක් නැහැ.
සෞඛ්ය අමාත්යංශය ගෙන යන වැඩපිළිවෙළ කුමක්ද කියලා ජනතාව දැනුවත් කරන්න අවශ්යයයි.
