ඉකුත් ඉරිදා කොළඹදී අයර්ලන්තයට එරෙහිව පැවැති සමාරම්භක තරගයේදී ඇති වූ පාදයේ මස්පිඬු ආබාධයක් (Hamstring injury) හේතුවෙන් ශ්රී ලංකා තුන් ඉරියව් ක්රීඩක වනිඳු හසරංගට 2026 විස්සයි20 ලෝක කුසලාන තරගාවලියෙන් ඉවත් වීමට සිදුව ඇත.
අයර්ලන්තය හඹා ගිය ලකුණු 164 ක ඉලක්කය අඩාල කරමින්, ලකුණු 25කට කඩුලු 3ක් දවාගෙන සිය පන්දු වාර 4 අවසන් කිරීමට වනිඳු සමත් වුවද, සඳුදා දින සිදු කරන ලද MRI පරීක්ෂණයකින් ඔහුගේ වම් පාදයේ මස්පිඬුවක දරුණු පැලීමක් සිදුව ඇති බව තහවුරු විය. එක්සත් රාජධානියේ විශේෂඥ වෛද්යවරයකු විසින් එම වාර්තාව පරීක්ෂා කිරීමෙන් අනතුරුව, අඟහරුවාදා දිනයේදී ඔහුව තරගාවලියෙන් ඉවත් කිරීමට තීරණය කෙරිණි.
මෙම ආබාධය මීට පෙර පැවති මස්පිඬු ආබාධයකට සම්බන්ධ වුවත්, එය හරියටම එම ආබාධයම නැවත මතු වීමක් නොවන බව තේරුම් ගෙන ඇත. වනිඳු හසරංග වසර කිහිපයක සිට පාදයේ ආබාධ ඇතුළු විවිධ කායික අපහසුතාවලින් පීඩා විඳිමින් සිටියි.
ආදේශක ක්රීඩකයා සහ ඉදිරි සැලසුම්
අන්තර්ජාතික ක්රිකට් කවුන්සිලය (ICC) මෙතෙක් ආදේශක ක්රීඩකයෙකු සඳහා නිල අනුමැතිය ලබා දී නොමැති වුවද, හසරංග වෙනුවට ඔහුට සමාන දක්ෂතා සහිත පා දඟ පන්දු යවන තුන් ඉරියව් ක්රීඩක දුෂාන් හේමන්ත සංචිතයට එක් වීමට බොහෝ දුරට ඉඩ ඇත.
31 හැවිරිදි දුෂාන් හේමන්තට ජාත්යන්තර මට්ටමේ අවස්ථා ලැබී ඇත්තේ අඩුවෙනි. ඔහු ක්රීඩා කර ඇති විස්සයි20 ජාත්යන්තර තරග 3කදී කඩුලු 4ක් දවාගෙන ඇති අතර ඔහුගේ පන්දු යැවීමේ සාමාන්යය (Economy rate) 7.85කි.
දුෂාන් හේමන්ත මලල ක්රීඩා සම්බන්ධයෙන් ජාතික හා ජාත්යන්තර පදක්කම් ලාභී ජාතික තලයේ මළල ක්රීඩකයෙකි. 2010 වසරේදී ඔහුව ජාතික කනිෂ්ඨ මලල ක්රීඩා සංචිතයට ඇතුළත්ව සිටියේය. ඔහු දකුණු ආසියානු කනිෂ්ඨ මලල ක්රීඩා ශූරතාවලියේදී (South Asian Junior Athletics Championships) පිරිමි මීටර් 1500 ඉසව්වෙන් ලෝකඩ පදක්කමක් දිනා ගෙන තිබේ. විශිෂ්ඨ ශාරිරික යෝග්යතාවයත් සමගම දුෂාන් හේමන්තගේ පන්දු රැකීමේ විශේෂ හැකියාව අවස්ථා ගණනාවක දී ඇගයීමට ලක් වී තිබේ.
ඉරිදා තරගයට ක්රීඩා කළ දඟ පන්දු යවන්නන්ට අමතරව සංචිතයේ වෙනත් දඟ පන්දු යවන්නන් නොමැති බැවින්, හේමන්තව සෘජුවම මීළඟ තරගයේ එකොළොස් දෙනාගේ කණ්ඩායමට ඇතුළත් කිරීමට ද ඉඩ ඇත.
හසරංග අහිමි වීම ශ්රී ලංකා ලෝක කුසලාන ගමනට එල්ල වූ ප්රබල බලපෑමක් බව කිව යුතුය. මේ සම්බන්ධව ක්රික් ඉන්ෆෝ වැනි අන්තර්ජාතික වෙබ් අඩවි තුළ පවා සංවාදයට ලක් වී ඇත. විස්සයි20 පිටියේ ශ්රී ලංකාව සතු දක්ෂතම පන්දු යවන්නා වනිඳුය.
විශේෂයෙන් සලකුණු කළ යුත්තේ ලෝක කුසලාන ඉතිහාසයේ ඔහු විශිෂ්ට දක්ෂතා දක්වා තිබීමය. ඔහු ලෝක කුසලාන ඉනිම 20කදී ලකුණු 6.01ක සාමාන්යයක් රඳවා ගනිමින් කඩුලු 40ක් ලබාගෙන තිබේ.
