මනම්පිටිය නිමල් ජයරත්න –
වතුර වලකට යූරියා මිශ්ර කර එම ජලය පානය කිරීමට සලස්වා මී ගවයන් හයදෙනකු සහ මුවෙකු මැරූ වැලිකන්ද මඟුල්පොකුණ ගම්මානයේ පුද්ගලයන් දෙදෙනෙකු, පොරවක් සමග 13 වෙනිදා සවස අත්අඩංගුවට ගත් බව වැලිකන්ද පොලිසිය කියයි.
අත්අඩංගුවට ගත් සැකකරුවන් දෙදෙනා මගුල්පොකුණ ගම්මානයේ පදිංචි අවුරුදු 41 සහ 43 වයසේ පසුවන්නන් බව ඒ පිළිබඳ පරීක්ෂණ කරන පොලිස් ස්ථානාධිපති පොලිස් පරීක්ෂක සමන්ත රත්නායක අප කළ විමසීමකදී සඳහන් කළේය.
මෙම සැකකරුවන් සිංහපුර කැලෑ බද ප්රදේශයේ වතුර වලකට යුරියා මිශ්ර කර තිබෙන අතරන් එම වතුර පානය කිරීමට පැමිණි ප්රදේශයේ මී ගවයන් හයදෙනෙකු සහ මුවෙකු මියගොස් ඇති බවද ඒ පිළිබඳ පරීක්ෂණ පවත්වන වැලිකන්ද පොලිසිය සඳහන් කරයි.
මේ දිනවල පවතින වියලි කාලගුණයත් සමග වන සතුන් සැරිසරන කැලෑ බද ප්රදේශවල කුඩා වතුර වළවල් සිඳෙමින් පවතින අතර සැකකරුවන් එම වතුර වලවල් වලට යුරියා මිශ්ර කරන බවත්, අනතුරුව එම යූරියා සහිත වතුර බීමට පැමිණෙන වන සතුන්
එම ජලය පානය කිරීමෙන් පසුව මියගිය විට සතුන් මස් කර එම මස් අලෙවි කරන බවත් පරීක්ෂණවලදී හෙළි වී ඇත.
මෙවැනි අපරාධයක් වැලිකන්ද පොලිස් කොට්ඨාශයෙන් වාර්තා වූ පළමු අවස්ථාව මෙය බවත්, වතුරවලේ සාම්පල් රස පරීක්ෂක වෙත යොමු කිරීමට අවශ්ය කටයුතු සිදුකර තිබෙන බවත් පොලිසිය කියයි.
ඊට අමතරව මියගිය සතුන්ගේ ආමාශයේ කොටස් බෙහෙත් වතුරේ බහා රස පරීක්ෂක වෙත යොමු කිරීමට කටයුතු කර තිබෙන බවත් විමර්ශකයින් කීවේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
, අත්අඩංගුවට ගත් අපරාධකරුවන් දෙදෙනාම 14 වෙනිදා පොළොන්නරුව මහේස්ත්රාත් අධිකරණය වෙත ඉදිරිපත් කිරීමට කටයුතු කර ඇති බවද වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක අප කළ විමසීමකදී සඳහන් කළේය.
