අමායා උඩුවැරැල්ල –
වසර 50කට වැඩි කාලයකට පසු ප්රථම වතාවට ඇමෙරිකානු අභ්යවකාශ යානයක් සඳ මතට ගොඩ බා තිබෙනවා.
Odysseus ලෙස නම් කර ඇති ලෑන්ඩරය, හූස්ටන් හි Intuitive Machines සමාගම විසින් ඉදිකරන ලද්දක්. ඊයේ එනම් පෙබරවාරි 22 බ්රහස්පතින්දා පස්වරු 6:11 ට එහි ගොඩබෑමේ අනුපිළිවෙල ආරම්භ කර මිනිත්තු කිහිපයකට පසු අභ්යවකාශ යානය සඳේ පොළව ස්පර්ශ කළා. එය චන්ද්ර මතුපිටට ගොඩ බැස්ස වූ පළමු පුද්ගලිකව සාදන ලද අභ්යවකාශ යානය බවට පත් වුනා.
අභ්යවකාශ යානය සඳ මත රැඳී පෘථිවියට සංඥා සම්ප්රේෂණය කරන අතරතුර, මෙහෙයුම් අධ්යක්ෂ සහ Intuitive Machines හි ප්රධාන තාක්ෂණ නිලධාරි Tim Crain පැවසුවේ අභ්යවකාශ යානයට එහි අරමුණු සාක්ෂාත් කර ගැනීමට හැකි වේද යන්න අවිනිශ්චිත බවයි.
ගොඩබෑමේ ස්ථානය චන්ද්රයාගේ දක්ෂිණ ධ්රැවයේ සිට සැතපුම් 185ක් පමණ උතුරින් පිහිටි Malapert A ආවාටය අසල සමතලා ප්රදේශයක්. සඳෙහි ධ්රැවීය ප්රදේශ මෑත වසරවලදී වැඩි උනන්දුවක් ඇති කර ඇත්තේ එහි ආවාටවල සෙවනැලි තුළ සැඟවී ඇති ජල අයිස් නිසයි.
ඔඩිසියස් පෙබරවාරි 15 වන දින ස්පේස්එක්ස් රොකට්ටුවකින් පෘථිවියෙන් පිටත් වූ අතර එය බදාදා චන්ද්ර කක්ෂයට ඇදී ගොස් තිබුනා. කෙසේවෙතත් බ්රහස්පතින්දා යානයට
ක්රියාවලියේ අවසන් අවස්ථාවේ තාක්ෂණික ගැටලු කීපයකට සහ වෙනස් කිරීමකට මුහුණ දීමට සිදු වී තිබුණා. නමුත් Intuitive Machines සමාගමේ නවතම වාර්තා අනුව දැක්වෙන්නේ සඳ වෙත ගමන් කිරීම සඳහා පුද්ගලිකව නිපදවන ලද පළමු යානය හොඳින් පවතින බවය. එමෙන්ම පෘථිවියට දත්ත යැවීමට පටන් ගෙන ඇති බවත් ආයතනය ප්රකාශ කළේය.
