ශ්රියානි විජේසිංහ –
මේ දිනවල පවතින වෛරස් උණ රෝග හේතුවෙන් රිජ්වේ ආර්යා ළමා රෝහලේ වාට්ටු පිරීගොස් ඇතැයි රෝහලේ නියෝජ්ය අධ්යක්ෂ වෛද්ය සන්තුෂ් සේනාපති සඳහන් කරයි.
ඩෙංගු , ඉන්ප්ලුවන්සා , ඉන්ප්ලුවන්සා නොවන වෛරස් රෝගයන් සහ කොවිඩ් යැයි සැක කළ හැකි රෝගීන්ගෙන් වාට්ටු ඇඳන් සියයට 90ක්ම මේ වන විට පිරී ගොස් ඇතැයි ද එක් ඇදක රෝගී දරුවන් දෙන්නෙක් තුන්දෙවෙන් පමණ ප්රතිකාර ලබමින් සිටින බවද නියෝජ්ය අධ්යක්ෂවරයා පැවසුවේය.
ඩෙංගු වැලදුණු දරුවන් 30ක් පමණ මේ වන විට රෝහලේ ප්රතිකාර ලබන අතර ඩෙංගු රක්තපාත තත්ත්වයට පත්වූ දරුවන් 7 දෙනෙකු දැඩිසත්කාර එකකයේ ප්රතිකාර ලබමින් සිටින බවද හෙතෙම පැවසුවේ.
රෝගී දරුවන් සමඟ මව හෝ භාරකරුවෙකු රැදී සිටින බැවින් වෛද්යවරයාට රෝගී දරුවන්ව පරික්ෂා කිරිමට යාමට නොහැකි ලෙස පවතින ඉඩකඩ ඇහිරී ගොස් ඇතැයි ද පැවසේ.
ඩෙංගු රක්තපාත රෝගී දරුවෙකු සිටින්නේ නම් හා තදින් ඉන්ප්ලුවන්සාව රෝග ලක්ෂණ පෙන්නුම් කරන දරුවෙකු සිටින්නේ නම් එවැනි දරුවන්ට වැඩි අවදානයක් යොමු කිරිම අත්යවශ්ය කරුණක් වුවද සෞඛ්ය කාර්ය මණ්ඩලයට එවැනි දරුවන් සඳහා වැඩි කාලයක් වෙන් කිරිමට නොහැකි වුවහොත් එම දරුවන් කම්පන තත්ත්වයට හෝ නියුමෝනියා තත්ත්වයට පත්වීමේ අවදානමක් ඇතැයිද වෛද්ය සන්තුෂ් පෙන්වාදේ.
දරුවන් කීපදෙනෙකු එකම ඇඳක ප්රතිකාර ලබන විට දරුවන්ට පවතින වෛරස් රෝගයට අමතරව වෙනත් රෝගයන් බෝවිය හැකි බව යැයිද විශේෂයෙන් පාචනය වැනි රෝග බෝවීමට පවතින ඉඩකඩ අදික යැයිද හෙතෙම පෙන්වාදේ.
රෝගීන් ප්රමාණයනය වැඩි වුවද රෝහල් කාර්ය මණ්ඩලය ක්රමයෙන් අඩුවීම හේතුවෙන් රෝගී දරුවන්ට යොමු විය යුතු අවදානය ඇතැම් විට නිසිලෙස යොමු නොවන අවස්ථාවන්ද තිබෙන බව වෛද්ය සන්තුෂ් පවසයි.
මේ වසරේ ගතවූ මාස කීපය තුළ රෝහලේ හෙද නිලධාරීනියන් 70ක් පමණද වෛද්යවරුන් හා විශේෂඥ වෛද්යවරුන් 40ක් පමණද විදේශ ගතවීම් හා සේවයෙන් විශ්රාම යාම හේතුවෙන් රෝගීනට යොමුකළ යුතු අවධානය යොමු නොවීමට ප්රධාන හේතුවක් වී ඇතැයිද හෙතෙම පෙන්වදේ.
එසේම කනිෂ්ඨ කාර්ය මණ්ඩල සාමාජිකයින්ද මෙසේ විශ්රාම යාම හා පුරප්පාඩු පිරවීමට කටයුතු නොකිරීමට හේතුවෙන් රෝහලේ සනීපාරක්ෂක කටයුතු නිසිලෙස කරගෙන යාමට නොහැකි තත්ත්වක් උදා වීම බරපතල තත්ත්වයක් යැයිද පැවසේ.
කෙසේ නමුත් මෙම රෝගී තත්ත්වය හැකි පමණ පාලනය කර ගැනීමට කොවිඩ් කාලය තුළ අප අනුගමනය කළ සෞඛ්ය පුරුදු වලට හැකි ඉක්මනින් යොමු වන්නැයිද දරුවන් උණ, කැස්ස සහ සෙම්ප්රතිශ්යාව පවතින්නේ නම් පාසල් වෙත නොයවන්නැයිද නියෝජ්ය අධ්යක්ෂවරයා සියලුම දෙමාපියන්ගෙන් විශේෂ ඉල්ලිමක් කරයි.
