ගව ගාලේ ගවයින් දෙදෙනෙක් කලබල කර වැට කඩාගෙන ගිය පමණින් ඉතිරි ගවයන් සහිත ගව ගාලට ප්රශ්නයක් නොවන බව කාන්තා හා ළමා සංවර්ධන පෙර පාසල් හා ප්රාථමික අධ්යාපන පාසල් යටිතල පහසුකම් හා අධ්යාපන සේවා රාජ්ය අමාත්යය පියල් නිශාන්ත ද සිල්වා අද (19) නුවර දී පැවසුවේය.
රාජ්ය අමාත්ය නිමල් ලන්සා සහ රාජ්ය අමාත්ය සනත් නිශාන්ත අතර ඇති වී තිබෙන ගැටුම ගැන මාධ්යවේදියෙක් ඇසූ ප්රශ්නයකට පිළිතුරු දෙමින් රාජ්ය අමාත්ය පියල් නිශාන්ත ද සිල්වා මේ පැහැදිලි කිරීම කළේය.
මුල් ළමාවිය සංවර්ධන අධ්යාපනඥයින්ගේ සංගමය විසින් මහනුවර වැව රවුමේ උඩරට කලා සංගම් ශාලාවේ දී අද (19) පෙරවරුවේ සංවිධානය කරනු ලැබූ මධ්යම පළාත් පෙර පාසල් ගුරු පුහුණු වැඩ සටහනට සහභාගී වීමෙන් අනතුරුව මාධ්ය හමුවේ අදහස් දැක්වූ රාජ්ය ඇමතිවරයා මෙසේ ද පැවසුවේය.
“ ගව ගාලක ගවයන් දෙන්නෙක් කලබල කරලා වැට කඩාගෙන ගියාට ඉන් ගව ගාලට ප්රශ්නයක් වෙන්නෙ නෑ.“
“හැම ගෙදරකම අකීකරු ළමයි දඟ ළමයි ඉන්නවා. පුද්ගලයො විවිධයි. එක්කෙනෙක් දෙන්නෙක් මෙහෙම කටයුතු කළාට රජයකට ඒක වැදගත් නෑ.“
“හැමෝම හැම තිස්සේම ඇඟිලි ගහලා බලන්නේ ඇනෙන වැඩ ගැනම තමයි. නමුත් සාර්ථකවෙන වැඩක් හෝ වෙනසක් කළ තැනක් බලලා ඒ ගැන කතා කරන්නෙ නෑ.“
“ මුලු රටම බලාපොරොත්තු වුනේ වෙනසක්. ඒ වෙනස මේ රජය විසින් ජනතාවට මේ වනවිට දීලා තියනවා. සමහර තැන්වල පොඩි පොඩි දේවල් සිද්ධ වුනා කියලා කලබල වෙන්න දෙයක් නෑ. “
