ශ්රී ලංකාවේ ආර්ථිකය පිටුපස ජාත්යන්තර බලවේගයක් සිටින බවත් එම බලවේගය තවමත් ක්රියාකාරී බවත් හිටපු අග්රාමාත්ය මහින්ද රාජපක්ෂ මහතා අද පාර්ලිමේන්තුවේදී ප්රකාශ කළේය.
අය-වැය දෙවැනිවර කියවීමේ විවාදයේදී අදහස් දක්වමින් මේ බලවේගවල ප්රාදේශීය නියෝජිතයන් තවමත් ක්රියාත්මක බව හිටපු අගමැතිවරයා කීවේය.
“ රට තුළ සිදුවන විරෝධතාවලට අනුග්රහය දැක්වූයේ ඔවුන්. මේ වන විට යථා තත්ත්වයට පත්වීමට පටන් ගෙන ඇති සංචාරක ක්ෂේත්රයට ඔවුන්ගේ ක්රියාකලාපය බලපානවා,” හිටපු අගමැතිවරයා තව දුරටත් කීවේය.
“ඇතැමුන් ආරක්ෂාව වෙන් කිරීම ගැන ප්රශ්න කරනවා. රටක ආරක්ෂාව අන් සියල්ලටම වඩා වැදගත් බව මම ඔවුන්ට කියන්න කැමතියි. ජාතියේ ආරක්ෂාව අනතුරේ හෙළීමට අපි ඉඩ දෙන්නේ නැහැ, ” හිටපු අගමැතිවරයා අවධාරණය කළේය.
“2023 අයවැය සමහර අංශවල අභිලාෂයන් ඉටු නොකරන නමුත් ආර්ථිකය ස්ථාවර කිරීමේ යෝධ පිම්මක්. අයවැයෙන් තාරුණ්යයට කරන ලද අවධාරණය සාදරයෙන් පිළිගන්නවා. පාඩු ලබන රාජ්ය ව්යවසාය ප්රතිව්යුහගත කළ යුතුයි. කෙසේ වෙතත් ලාභ ලබන ව්යාපාර ආරක්ෂා කළ යුතු බව අපගේ අදහසයි.“
හිටපු අගමැතිවරයා අවධාරණයෙන් ප්රකාශ කළේ ජාතික වත්කම් විදේශ බලවේගවලට විකිණීමට තමන් ඇතුළු කණ්ඩායම විරුද්ධ බවය.
“යමෙකු මතක තබා ගත යුතු කරුණක් වන්නේ යහපාලන රජය රටට ඔරොත්තු නොදෙන ණය ගැනීමට ගොස් ඇති බවයි.“
“දුෂ්කර කාලවලදී පවා අපි සමාජ සුබසාධනය අතපසු කර නැහැ. අපි අතීතයේ අපේ මූල්ය කළමනාකරණය සහ සමාජ සුබසාධනය සහතික කර තිබෙනවා. ඉදිරියේදීත් අපි ඒ දේම කරනවා,” ඔහු අවධාරණය කළේය.
