රටකජු විසි කළහොත් ලැබෙන්නේ වඳුරන්ට යන න්යාය අමතක කර කටයුතු කළ හොත් රට ඉදිරියට ගෙන යාමට නොහැකි වන බවත් අලුතෙන් ලබා දෙන අමාත්යධූර වැය බරක් ලෙස නොසිතා ආයෝජනයක් ලෙස සිතිය යුතු බවත් පොදුජන පෙරමුණේ ප්රකාශක පාර්ලිමේන්තු මන්ත්රී, නීතිඥ සාගර කාරියවසම් පවසයි.
මාධ්යවේදියෙකු ඇසූ පැනයකට පිළිතුරු ලෙසින් ඔහු පැවසූයේ ව්යවස්ථාවට අනුව අමාත්යධුර 30ක් දක්වා පත් කළ හැකි අතර තවමත් තිබෙන්නේ ගෝඨාභය රාජපක්ෂගේ කැබිනට් මණ්ඩලය මිස රනිල් වික්රමසිංහගේ කැබිනට් මණ්ඩලය නොවන නිසා නව අමාත්යවරුන් පත් කිරීමට ජනාධිපතිවරයාට හැකි බවය.
ආයෝජනයක් නොකර ප්රතිලාභ ලැබිය නොහැකි නිසා, වැඩක් කළ හැකි අමාත්යවරුන් පත් කරමින් දක්ෂයින්ට තැන ලබා දීමෙන් රටක් ලෙස දියුණු විය හැකි බවත් ඔහු පැවසීය.
“සිංගප්පූරුව වගේ රටවල් දියුණු වුණේ දේශපාලඥයින් වැය වන මිල ගැන නොහිතා ලැබෙන ප්රතිලාභ ගැන හිතුව නිසා. ඔවුන් දක්ෂයින් පත් කරලා වැඩ නොකරන අය ඉවත් කළා. අපේ රටේ ප්රශ්නේ තියෙන්නේ එතන. බහුතරයක් පාර්ලිමේන්තුවට පත් වෙන්නේ ජනතා ඡන්දවලින්. වැඩක් කළත් නොකළත් හැමදාම ඇමතිකම් දරන චරිත ඉන්නවා. මහජන බලය නිසා ඔවුන් බලයේ තියාගෙන ඉන්නවා.
“ජනතාවටත් වගකීමක් තියෙනවා වැඩ නොකරන අය පාර්ලිමේන්තුවට නොඑවන්න. ඒ වගේම ජනාධිපතිවරයා, ඇමතිවරුන්ට නිශ්චිත කාර්යයන් පවරලා ඔවුන් ඒවා ඉටු කරන්නේ නැත්නම් ඉවත් කරන්න ඕනේ.. වෙනස් වෙන්න ඕනේ අන්න ඒ දේ. නැතුව අමාත්යධූර සංඛ්යාව නෙමෙයි…”
ඔහු වැඩිදුරටත් සඳහන් කළේය.
