අමායා උඩුවැරැල්ල –
ඉන්දීය අග්රාමාත්ය නරේන්ද්ර මෝදිගේ දිවුරුම් දීම ඊයේ, ඉරිදා (9) නවදිල්ලි නගරයේදී සිදු කෙරුණු අතර එම උත්සවය ආරම්භ වීමට පැයකට පමණ පෙර එනම් සවස 6.15 ට පමණ ජම්මු සහ කාශ්මීරයේ රියාසි දිස්ත්රික්කයේ බැතිමතුන් රැගත් බස් රථයකට ත්රස්තවාදීන් පිරිසක් ප්රහාරයක් එල්ල කර තිබෙන බව ඉන්දීය මාධ්ය වාර්තා කර තිබෙනවා.
ඉන්දීය බලධාරීන් අද (10) නිකුත් කළ ප්රකාශයක දැක්වෙන්නේ මෙම සිදුවීමෙන් පුද්ගලයින් 9 දෙනෙකු මිය ගොස් තවත් කිහිප දෙනෙකුට තුවාල සිදු ව ඇති බවයි.
එමෙන්ම මේ සම්බන්ධයෙන් විමර්ශනය කරන ප්රාදේශීය පොලිසිය සමග සම්බන්ධව ඉදිරි විමර්ශන කටයුතු සිදුකරන බව ද එහි සඳහන්.
මියගිය පිරිස අතරට අවුරුදු දෙකක් වයසැති පිරිමි ළමයෙකු සහ රාජස්ථාන්, උත්තර් ප්රදේශ් යන ප්රදේශවල පුද්ගලයන් අයත් වන බව සඳහන් වනවා.
බස් රථය කත්රා ප්රදේශයේ සුප්රසිද්ධ හින්දු දේවස්ථානයක් වන මාතා වෛෂ්නෝ දේවි වෙත යමින් සිටින අවස්ථාවේ කඳුකර මාර්ගයකදී මෙලෙස වෙඩි ප්රහාරයට ලක්ව තිබෙනවා. වෙඩි ප්රහාරය විනාඩි 20 ක පමණ කාලයක් පුරා එල්ල වී ඇති අතර බස් රථය, රියදුරුගේ පාලනයෙන් මිදී කඳුකර ප්රදේශයේ දුර්ගයකට ඇද වැටී තිබෙනවා. අන්තර්ජාලය ඔස්සේ සංසරණය වන සහ ඉන්දීය මාධ්ය විසින් විකාශනය කරන ලද වීඩියෝ පටවල දැක්වෙන්නේ මාර්ගයේ එක් පසෙක දිවෙන ගල් බෑවුමක පුද්ගලයින්ගේ සිරුරු වැටී ඇති ආකාරයයි.
එමෙන්ම ඉන්දීය බලධාරීන් මෙම ත්රස්ත ප්රහාරයට පෙර අවස්ථා දැක්වෙන සීසීටීවී දර්ශන අද මාධ්ය වෙත නිකුත් කර තිබෙනවා.
ඉන්දීය මාධ්ය වාර්තාවල සඳහන් වන පරිදි ඔවුන්, මෙම ප්රහාරය සඳහා විදෙස් ත්රස්තවාදීන් තිදෙනෙකු සම්බන්ධ වී ඇති බව අනාවරණය කරගෙන තිබෙන අතර මෙම සිදුවීම සිදුවූ කලාපය තුළ ත්රස්ත කණ්ඩායම් තුනක් ක්රියාත්මක වන බවද සඳහන් කර තිබෙනවා.
වැඩිදුරටත් සඳහන් වන්නේ ත්රස්ත ප්රහාරය සම්බන්ධයෙන් මේ වන විට පුද්ගලයින් 6 දෙනෙකු ප්රශ්න කිරීම් සඳහා රඳවාගෙන තිබෙන බවයි.
