රජය කැඳවන සර්ව පාක්ෂික සමුළුවට තමන් සහභාගී නොවන බව ජාතික ජන බලවේගය අද නිල වශයෙන් නිවේදනය කළේය.
මීට පෙර විමල් වීරවංශගේ ජාතික නිදහස් පරමුණ, උදය ගම්මන්පිල ගේ පිවිතුරු හෙළ උරුමය, වාසු දේව නානායක්කාරගේ නව සම සමාජ පක්ෂය සර්ව පාක්ෂික සමුළුව ප්රතික්ෂේප කර තිබිණි.
ජාතික ජන බලවේගය සර්ව පාක්ෂික සමුළුවට සහභාගී නොවන මූලික හේතුව පැහැදිලි කරමින් ජාතික ජන බලවේගයේ නායක අනුර කුමාර දිසානායක කීවේ ආර්ථිකය ගොඩ නැගීම සඳහා මේ සර්ව පාක්ෂික සමුළුව කැඳවන්නේ රටේ ආර්ථිකයේ සැබෑ ස්වරූපය පාර්ලිමේන්තුවටත් සඟවා බවය. ජාත්යාන්තර මූල්ය අරමුදල රටේ ආර්ථික පිළිබඳ ඉදිරිපත් කළ සමාලෝචනය හෙළි නොකර බවය. රටේ ඩොලර් සංචිත වර්ධනය වූ බව ප්රකාශ කළත් ඒ වර්ධනය වූ ආකාරය රහසක් ලෙස තබාගෙන බවය.
මෙතෙක් විවිධ රටවලින් ගත් ණය ගෙවන කාල සීමා, ණය වාරික, කොන්දේසි පිළිබඳ ජනතාව හෝ පාර්ලිමේන්තුව කිසිදු ආකාරයකින් නොදැනුවත් බව කී අනුර කුමාර දිසානායක ඒ තත්වයක් තුළ මේ කැඳවන සර්ව පාක්ෂික සමුළුව අර්ථාන්විතවම පදනම් රහිත බව පෙන්වා දුන්නේය.
මේ හිරි වැටුණු ජනාධිපතිවරයා හා හැඟීම් නොදැනෙන ඔහුගේ ආණ්ඩුව සමග කෙරෙන සර්ව පාක්ෂික කතා බහක් නොව, අවශ්ය වන්නේ මේ ආණ්ඩුවම ඉවත් කිරීම බව ඔහු කීවේය. මේ ආණ්ඩුව ප්රශ්න විසඳනු ඇතැයි යන මනෝරාජික හැඟීමේ ජාතික ජන බලවේගය නොමැති බවත් ඔහු පෙන්වා දුන්නේය.
ආණ්ඩුවෙ අමාත්යවරු දෙදෙනෙක් ඉවත්වීම හරහා ආණ්ඩුවෙ අතිවුන අර්බුදයේ දී ශ්රී ලංකා නිදහස් පක්ෂය හා ජනාධිපතිවරයා අතර සාකච්ඡාවක සර්ව පාක්ෂික සමුළුව යෝජනා වූ බව කියන අනුර කුමාර දිසානායක මෙය ආර්ථික අර්බුදය විසඳීම සඳහා වූ සමුළුවක් නොවන බව කීවේය.
පොහොට්ටු දේශපාලන ව්යාපාරය හා මෛත්රීපාල සිරිසේන නියෝජනය කරන ශ්රී ලංකා නිදහස් පක්ෂය අතර ඇතිවූ දේශපාලන අර්බුදයට විසඳුමක් ලෙස ඉදිරිපත් වුණු මෙම සර්ව පාක්ෂික සමුළුවේ යෝජනාවම වැරදි බව ඔහු පෙන්වා දුන්නේය.
මේ අවස්ථාවේ දී පාර්ලිමේන්තුවේ ඔළු ගෙඩි විතැන් කරමින් කරන දේශපාලන බල හුවමාරු සඳහා කිසිම ආකාරයකට සහයෝගය නොදක්වන බව කී අනුර කුමාර දිසානායක මේ පාලනය පළවා හැර, හැත්තෑ වසරක් තිස්සේ දියත් වුණු තට්ටු මාරු දේශපාලනය වෙනුවට ජනතාවාදී පාලනයක් ඇති කිරීම වෙනුවෙන් කැප වන බව කීවේය.
ඔහුගේ ප්රකාශය පහත දැක්වේ.
