වසර විස්සකට ආසන්න කාලයක් හිටපු ජනාධිපති මහින්ද රාජපක්ෂගේ ආරක්ෂක රාජකාරියේ යෙදුන නිලධාරීන් ද, එල්ටීටීඊය පවතින සමයේ සිට හිටපු ජනාධිපතිවරයාගේ ආහාර පරීක්ෂා කළ නිලධාරින් ද ඇතුළු ආරක්ෂාවට යොදවා සිටි පොලිස් නිලධාරීන් 116ක් එම රාජකාරිවලින් ඉවත් කිරීම පසුපස හිටපු ජනාධිපතිවරයා ඝාතන කුමන්ත්රණයක් පවතින්නේ දැයි සැකකරන බව මහින්ද රාජපක්ෂ පාර්ශවය චෝදනා කරයි.
එම චෝදනාව ගොනු කරන ප්රකට මහින්ද හිතවාදියෙක් මෙන්ම ඔහුගේ ප්රබල අනුගාමිකයෙක් වූ නීතිඥ මනෝජ් ගමගේ පවසන්නේ මේ ආණ්ඩුව මහින්ද රාජපක්ෂ ඝාතනය කිරීමට අවශය පසුබිම නිර්මාණ කරමින් සිදුකරන මේ කුමන්ත්රණය වහාම හකුලාගෙන කැඳවූ ආරක්ෂ නිලධාරීන් 116 දෙනා යළි අදාල සේවයේ යෙදවීමට කටයුතු කළ බවය.
හිටපු ජනාධිපතිවරුන්ගේ ආරක්ෂාව සම්බන්ධව කළ තක්සේරුවකින් අනතුරුව පොලිස්පතිවරයාගේ කැඳවීම මත හිටපු ජනාධිපති මහින්ද රාජපක්ෂගේ ආරක්ෂාවට යොදවා තිබු පොලිස් නිලධාරීන් 116 දෙනෙක් යළි කැඳවීමෙන් පසු මාධ්ය අමතමින් නීතිඥ මනෝජ් ගමගේ මෙම බරපතල ප්රකාශය සිදුකළේය.
“මේ නිලධාරින් 116 දෙනා ඉවත් කිරීම පසුපස යම් කිසි බරපතල කුමන්ත්රණයක් ක්රියාත්මක වෙනවාද කියන සැකය මේ අවස්ථාවේදි අප තුළ තිබෙනවා. ඒකට හේතුව තමයි එල්ටීටීඊ ය පැවති කාල වකවානුවේ ඉඳන් මේ වනතෙක් හිටපු ජනාධිපති මහින්ද රාජපක්ෂගේ ආහාර පරීක්ෂා කළ පුද්ගලයින් පවා ඉවත් කිරීමට කටයුතු කරලා තියනවා.”
“වසර විස්සකට ආසන්න කාලයක් සේවය කළ සමීපතම ආරක්ෂකයින් ජනාධිපති තුමාගේ ලඟින්ම සිටි ආරක්ෂකයින් පවා මේ අනුව ඉවත් කරලා තියනවා. ඒ ඉවත් කිරීම නිකම්ම නිකම් ඉවත් කිරීමක් විතරක් නෙමෙයි. මේ නිලධාරින්ගෙන් පළිගන්න විදිහට මූලස්ථාන පොලිස් පරීක්ෂකයින් ලෙස කටයුතු කළ නිලධාරීන් අදවනවිට සාමාන්ය පොලිස් නිලධාරින් ලෙස මාරු කරලා යවලා තියෙන්නේ.”
“කුමකට ද මේ සැරසෙන්නේ. මහින්ද රාජපක්ෂ ජනාධිපතිතුමාගේ ජීවිතය බිලි ගන්න කාටහරි සුදුසු වාතාවරණය සකස් කරලා දෙනවද මේ රජය කියන දේ අප ප්රශ්න කර සිටිනවා. වහාම මේ තින්දුව අකුලා ගන්න කියලා අපි ආණ්ඩුවට දැඩිව බලපෑම් කරනවා…” ඔහු පැසුවේය.
මේ පිළිබඳව මහජන ආරක්ෂක සහ පාර්ලිමේන්තු කටයුතු නියෝජ්ය අමාත්ය සුනිල් වටගල පවසන්නේ එක් එක් හිටපු ජනාධිපතිවරුන්ගේ ආරක්ෂාවට ආදාලව පවතින අවදානම් මට්ටම් පිළිබඳ කළ විද්යාත්මක ඇගයීමකින් පසු එම අවදානම් මට්ටම් සැලකිල්ලට ගනිමින් අවශ්ය නිලධාරීන් සංඛ්යාව රාජකාරි සඳහා යොදවා ඇති බවය.
සිය පොලිස් රාජකාරියේ විශාලම කාලයක් හිටපු ජනාධිපති මහින්ද රාජපක්ෂට සේවය කළ මෙම පිරිස ඉවත්ව යෑමට පෙර කොළඹ විජයාරාම මාවතේ පිහිටි හිටපු ජනාධිපතිවරයාගේ නිල නිවසට පැමිණ සමූහ ඡායාරුපයකට ද පෙනී සිටියහ.
