රුපියල් මිලියන 30 කට අධික (ලක්ෂ 300ක) මුදලක් වැය කරමින් කොළඹ ප්රදේශයේ දේපළ මිලදී ගැනීම හරහා මුදල් විශුද්ධිකරණය වැළැක්වීමේ පනත උල්ලංඝනය කළ බවට එල්ල වූ චෝදනා මත, හිටපු අමාත්ය කෙහෙළිය රඹුක්වැල්ලගේ වැඩිමහල් දියණිය වන චමිත්රි රඹුක්වැල්ල අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගනු ලැබීය.
අදාළ දේපළ මිලදී ගැනීම සඳහා වැය කළ මුදල් උපයා ගත් ආකාරය සම්බන්ධයෙන් ඉදිරිපත් වූ පැමිණිල්ලකට අනුව සිදුකළ දීර්ඝ විමර්ශනයකින් අනතුරුව මෙම අත්අඩංගුවට ගැනීම සිදු කර තිබිණි.
අල්ලස් කොමිසම සඳහන් කරන පරිදි, විමර්ශනයට භාජනය වී ඇති ප්රධාන කරුණු කිහිපයකි:
සැකකාරිය විසින් සිය නම සහ තවත් පුද්ගලයෙකුගේ නමක් භාවිතා කරමින් කොළඹ පිහිටි සුඛෝපභෝගී නිවසක් මිලදී ගැනීමට රුපියල් ලක්ෂ 300ක මුදලක් ආයෝජනය කර ඇති බවට හඳුනාගෙන ඇත.
අදාළ මුදල උපයා ගත් නීත්යානුකූල මාර්ගයක් ඔප්පු කිරීමට සැකකාරිය අපොහොසත් වී ඇති බව විමර්ශන නිලධාරීහු පෙන්වා දෙති.
රජයේ සේවයේ නියුතු දේශපාලනඥයෙකුගේ සමීපතමයෙකු ලෙස, අයථා ලෙස උපයා ගත් මුදල් දේපළ වෙළඳාමේ ආයෝජනය කිරීම හරහා ඇය මුදල් විශුද්ධිකරණය කිරීමට උත්සාහ කර ඇති බවට කොමිසම අධිකරණය හමුවේ කරුණු වාර්තා කිරීමට නියමිතය.
අත්අඩංගුවට ගත් සැකකාරිය කොළඹ මහේස්ත්රාත් අධිකරණය හමුවට ඉදිරිපත් කිරීමට නියමිත අතර, එහිදී විමර්ශනවල ප්රගතිය සහ ඉදිරි නීතිමය පියවර පිළිබඳව අල්ලස් කොමිසම වැඩිදුරටත් කරුණු ඉදිරිපත් කරනු ඇත.
හිටපු මහජන මාධ්ය අමාත්යාංශ ලේකම්වරයෙකු සහ විදුලි සංදේශ නියාමන කොමිසමේ (TRCSL) හිටපු අධ්යක්ෂ ජෙනරාල්වරයෙකු වන අනූෂ පැල්පිටත් රුපියල් මිලියන 46ක මුදලක් උපයාගත් ආකාරය හෙළි කිරීමට අපොහොසත් වීම සම්බන්ධයෙන් අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගෙනන මේ වනවිට ඉන්නේ රක්ෂිත බන්ධනාගාරගතවය. අද අධිකරණයට ඉදිරිපත් කළ ඔහු වැඩිදුරටත් ලබන 20 වැනිදා දක්වා රක්ෂිත බන්ධනාගාරගත කළේය.
