මැතිවරණයක් වෙනුවෙන් මැතිවරණ කාර්යාලයක් ද පිහිටුවා සිය ඡන්ද ව්යාපාර කටයුතු ආරම්භ කර ඇති ජනාධිපතිවරයා ආණ්ඩුකාරවරුන් කැඳවා ජනතාව වෙනුවෙන් රජය ක්රියාත්මක කර ඇති සුබසාධන වැඩසටහන් කාර්යක්ෂම කර ඒවායේ ප්රතිලාභ ජනතාවට ලබාදීම වෙනුවෙන් මැදිහත් වී කටයුතු කළයුතු බවට ආණ්ඩුකාරවරුන්ට අවධාරණයෙන් යුතුව දැනුම් දී තිබේ.
ජනාධිපතිවරයා මේ බව සඳහන් කර ඇත්තේ පළාත් ආණ්ඩුකාරවරුන් සමඟ ඊයේ (12) ජනාධිපති කාර්යාලයේ පැවති සාකච්ඡාවේදීය.
පළාත් මට්ටමින් පවතින ගුරු හිඟය කඩිනමින් පියවා ගැනීමට ගත යුතු පියවර මෙන්ම උරුමය සින්නක්කර ඉඩම් ඔප්පු ලබාදිමේ වැඩසටහන කාර්යක්ෂම කිරීම පිළිබඳව ද මෙහිදී පුළුල් ලෙස සාකච්ඡා කර ඇත.
උරුමය සින්නක්කර ඉඩම් ඔප්පු ලබාදීමේ වැඩසටහන කාර්යක්ෂම කිරීම වෙනුවෙන් ග්රාම නිලධාරීන්ට අමතරව තවත් කණ්ඩායමක් වෙතද බලය පවරා ජංගම සේවා ක්රියාත්මක කිරිමේ හැකියාව ජනාධිපතිවරයා මෙහිදී පෙන්වා දී තිබේ.
ජනතාව මේ කෙරෙහි උනන්දු කරවමින් එම ප්රතිලාභය ඔවුන් වෙත ලබාදීමට ප්රාදේශීය ලේකම්වරුන්ට පැවරී ඇති වගකීම ද ජනාධිපති රනිල් වික්රමසිංහ සිහිපත් කර ඇත.
පළාත් මට්ටමින් පවතින ගුරු හිඟය කඩිනමින් පියවා ගැනීමට රජය කැපවී කටයුතු කරන බව අධ්යාපන අමාත්ය ආචාර්ය සුසිල් ප්රේම්ජයන්ත මෙහිදී සඳහන් කර තිබේ. එළැඹෙන ජූලි 03 වනදා ජාතික පාසල් සඳහා නව ගුරු පත්වීම් 2500ක් ලබා දීමට කටයුතු සූදානම් කර ඇති බව ද ඔහු සඳහන් කර ඇත.
ඒ යටතේ රසායනික විද්යාව,භෞතික විද්යාව, ජිව විද්යාව, ගණිතය, තාක්ෂණවේදය, විදේශ භාෂා යන විෂයයන් සඳහා ගුරු පත්විම් 2100ක් සහ 2021 වසරේ දී පවත්වන ලද ඉංග්රීසි මාධ්ය උසස් ඩිප්ලෝමා විභාග ප්රතිඵල මත ගුරුවරුන් 500ක් බඳවා ගැනීමට කටයුතු සුදානම් කර ඇති බවත් ඒ සමඟ එම විෂය ධාරාවන්ට අදාළව ජාතික පාසල්වල පවතින ගුරු පුරප්පාඩු බොහෝ දුරට මඟ හැරෙනු ඇති බවත් අමාත්යවරයා පෙන්වා දී ඇත.
එසේම ඉංග්රීසි මාධ්ය ගුරු හිඟය පියවා ගැනීම වෙනුවෙන් දැනට විශ්රාම ගොස් සිටින ඉංග්රීසි මාධ්ය ගුරුවරුන්ගෙන් අයදුම්පත් කැඳවා ඔවුන්ව කොන්ත්රාත් පදනම මත බදවා ගැනීමේ කටයුතු සිදු වෙමින් පවතින බව ද පෙන්වා දුන් අමාත්යවරයා අධ්යාපන පරිපාලන සේවයේ හා ගුරු අධ්යාපනඥ සේවයේ නිලධාරින්ගේ හිඟය පියවා ගැනීම සඳහා ද කඩිනම් වැඩපිළිවෙළක් ක්රියාත්මක බව සඳහන් කළේය.
මේ අතර අඩු ආදායම්ලාභී පවුල්වල දරුවන් වෙනුවෙන් ජනාධිපති අරමුදල මඟින් ක්රියාත්මක ජනාධිපති ශිෂ්යත්ව වැඩපිළිවෙළ කඩිනම් කිරීම පිළිබඳව ද සාකච්ඡා කර ඇත.
පළමු ශ්රේණියේ සිට 11 වන ශ්රේණිය දක්වා අධ්යාපනය ලබන සිසුන් ලක්ෂයක් වෙනුවෙන් ජනාධිපති ශිෂ්යත්ව ලබාදිමේ වැඩසටහන යටතේ බස්නාහිර පළාතට ශිෂ්යත්ව 16,152ක්, උතුරු පළාතට ශිෂ්යත්ව 8,636ක් සහ අනෙකුත් සෑම පළාතකටම ශිෂ්යත්ව 10,000 පමණ හිමිවන බව මෙහිදී අනාවරණය කර තිබේ. එම ශිෂ්යත්ව වැඩසටහන යටතේ මසකට රුපියල් 3,000/- බැගින් මාස 12ක කාලයක් ශිෂ්යත්ව පිරිනැමේ.
