ඉඳුනිල් කහටපිටිය –
මහ මැතිවරණයක් සම්බන්ධව නිශ්ඡිත දින නියමකටත් පෙර ආණ්ඩු පක්ෂයේ සිට සමගි ජන සන්ධානයට එක් වී සිටින වසන්ත යාපා බණ්ඩාර සහ විපක්ෂයේ ප්රධාන සංවිධායක ලක්ෂ්මන් කිරිඇල්ල පාර්ලිමේන්තු මන්ත්රීවරුන් අතර එළිපිටම ගැටුම් ආරම්භ වී තිබේ.
ආණ්ඩු පක්ෂයේ සිට විපක්ෂයට එකතු වූ කිසිවෙකුට හෝ සමගි ජන සන්ධානය යටතේ නාම යෝජනා ලබාදෙන බවට මෙතෙක් කිසිදු තීරණයක් ගෙන නැතැයි ලක්ෂ්මන් කිරිඇල්ල පවසන විට මේ වනවිට මහ මැතිවරණයක් සඳහා සැලසුම් සහගතව ප්රචාරණ ව්යාපෘතියක් දියත් කර ඇති වසන්ත යාපා බණ්ඩාර කියන්නේ සමගි ජන සන්ධානය ලෙස පක්ෂ නායක සහ මහ ලේකම් සමඟ අත්සන් කළ අවබෝධතා ගිවිසුම සම්බන්ධයෙන් සමගි ජනබලවේගයේ වියපත් දිස්ත්රික් නායකයින් කරුණු නොදැන කියන කතා ලොකුවට ගණන් ගත යුතු නැති බවය.
තමන් නියත ලෙස ඉදිරි මහ මැතිවරණයේ දී සමගි ජන සන්ධානය යටතේ මහනුවර දිස්ත්රික්කයෙන් තරඟ කරන බව වසන්ත යාපා බණ්ඩාර අවධාරණය කරන්නේය.
අදාළ තොරතුරු දිස්ත්රික් මට්ටමින් කටයුතු කරන නායකයින්ට ලැබී නොතිබෙන්නට ඉඩ තිබෙන අතර ඇතැම් විට වයෝවෘද්ධතාව නිසා ඔවුන්ට අමතක වීම් සිදුවන්නට ද ඉඩ තිබෙන බව ද කියන වසන්ත යාපා බණ්ඩාර පක්ෂ අභ්යන්තරයේ කතා කළ යුතු කරුණු මහපාරේ කතා කරන්නට තරම් නායකයින් පහත් තත්ත්වයට නොවැටිය යුතු බවට යෝජනා කරන්නේය.
වීදුරු ගෙවල්වල සිට ගල් නොගසන ලෙසද ඔහු ලක්ෂ්මන් කිරිඇල්ල ඉලක්ක කරගෙන දැනුම් දෙන්නේ අද (19) කිරිබත්කුඹුරේ පැවති මාධ්ය හමුවක දීය.
කිරිඇල්ල කියන කතාව
කෙසේ වෙතත් ලක්ෂ්මන් කිරි ඇල්ල පවසන්නේ සමගි ජන බලවේගයේ මහනුවර දිස්ත්රික් අපේක්ෂක ලැයිස්තුවට ඇතුළත් කරන නම් 15 මේ වනවිටත් සූදානම් බවය.
ආසන සංවිධායකවරු 13 දෙනා හැරුණු විට රවුෆ් හකීම් ගේ සහ වේලු කුමාර් ගේ නම් ඇතුළත් කළ පසු අපේක්ෂක ලැයිස්තුව සම්පූර්ණ වන බැවින් මහනුවර දිස්ත්රික් සමගි ජන බලවේග අපේක්ෂක ලැයිස්තුව සඳහා සමගි ජන සන්ධානයට අලුතින් එක් වූ කිසිවෙකුටත් නාම යෝජනා ලබාදීමේ හැකියාවක් නොමැති ආකාරය වසන්ත යාපා බණ්ඩාර ඉලක්ක කරගෙන ලක්ෂ්මන් කිරිඇල්ල අවධාරණය කර සිටින්නේ ය.
එමෙන්ම ආණ්ඩු පක්ෂයෙන් විපක්ෂයට එකතු වූ කිසිවෙකුටත් සමගි ජනබලවේගයෙන් නාම යෝජනා ලබාදෙන බවට කිසිදු පොරොන්දුවක් ලබා දී නැතැයි ද ඔහු හෙළි කරන්නේය.
ඊයේ (18) මහනුවර දී පැවැති මාධ්ය හමුවක් අමතමින් ලක්ෂ්මන් කිරිඇල්ල කියන්නේ ආණ්ඩු පක්ෂයේ සිට විපක්ෂයට එකතු වූ මන්ත්රීවරු අතර හොඳ අය මෙන්ම සමගි ජනබලවේගයේ සමගියට බාධා කරන කණ්ඩායම් ද සිටින බවය. තවද ආණ්ඩු පක්ෂයේ මන්ත්රීවරු විපක්ෂයට එකතු වූයේ ඔවුන් ගේ කැමැත්තෙන් මිස සමගි ජනබලවේගයේ ආරාධනාවකට අනුව නොවන බැවින් එවැනි පුද්ගලයෙකුට නාම යෝජනා දෙන්නේ නම් මුලින්ම ඔහුගේ හැසිරීම, විනය, කණ්ඩායම් හැඟීම ආදි කරුණු රැසක් නායකත්වය විසින් සලකා බලන බවය.
විනයක් නැති හැඟීමක් නොමැති කඩාකප්පල්කාරී වැඩ කරන අයට නාම යෝජනා දීම නොව, ඔවුන් සම්බන්ධයෙන් නායකත්වය දැනුවත් කර නිසි පියවරක් ගැනීමට කටයුතු කර තිබෙන බව ද මන්ත්රීවරයා ප්රකාශ කළේය.
