මහා පරිමාණ මත්ද්රව්ය ජාවාරම්කාර අපරාධකරුවන් පස් දෙනෙක් වෙත කොළඹ මහාධිකරණය අද (27) මරණීය දණ්ඩනය නියම කළේය.
ශ්රී ලංකා නාවික හමුදාව විසින් කරන ලද සැලසුම් සහගත මෙහෙයුමකින් අනතුරුව වර්ෂ 2019.11.04 දින ගැඹුරු මුහුදේ දී “බුද්ධිමා” නැමැති බහුදින ධීවර යාත්රාවෙන් ප්රවාහනය කරමින් තිබූ හෙරොයින් කිලෝ ග්රෑම් 224ක් සහ ග්රෑම් 166ක් සමග අත් අඩංගුවට ගත් සැකකරුවන් 05 දෙනෙක් අරභයා කළ දීර්ඝ නඩු විභාගයකින් අනතුරුව මෙසේ කොළඹ මහාධිකරණය විසින් මරණීය දණ්ඩනය නියම කළේය.
මෙසේ මරණ දණ්ඩනය නියමවූයේ වර්ණකුලගේ චමින්ද රෝහණ ප්රනාන්දු ( තොඩුවාව), රණසිංහ ආරච්චිලාගේ ඇන්ටන් ක්රිෂාන්ත ප්රනාන්දු (හලාවත) , ගජවීර ආරච්චිලාගේ දුලාජ් රවින්ද්ර පේරේරා (හලාවත), ලියවුරුගේ සුරංග බාලංඥ ( තොඩුවාව), වර්ණකුලසූරිය තරිඳු ජයමාල් ප්රනාන්දු (හලාවත) යන පුද්ගලයින් වෙතය.
වර්ෂ 2019.11.04 දින ගැඹුරු මුහුදේ දී නාවික හමුදාව විසින් කරන ලද මෙම මෙහෙයුමේ දී මුලින්ම අඩංගුවට පත් වන්නේ බුද්ධිමා බහුදින ධීවර යාත්රාව සහ එහි ගමන් ගත් සැකකරුවන් පස් දෙනා ය. අනතුරුව මෙම මත්ද්රව්ය තොගය ගොඩබිමට රැගෙන යෑම සඳහා කුඩා ධීවර බෝට්ටුවක පැමිණි සැකකරුවන් දෙදෙනෙක් ද, ඔවුන් සියලු දෙනා අත් අඩංගුවට ගැනීමෙන් පසු තවත් සැකකරුවෙක් ද නාවික හමුදාව විසින් අත් අඩංගුවට ගෙන තිබිණි.
පසුව මෙම සැකකරුවන් සහ නඩු භාණ්ඩ රංගල නාවික හමුදා කඳවුරේ දී පොලිස් මත්ද්රව්ය නාශක කාර්යාංශයේ නිලධාරීන් විසින් භාර ගැනීමෙන් අනතුරුව වැඩිදුර විමර්ශන ආරම්භ විය.
රස පරීක්ෂක වාර්තාවෙන් අනතුරුව සැකකරුවන් භාරයේ තිබූ ශුද්ධ හෙරොයින් ස්කන්ධය කිලෝ ග්රෑම් 152යි ග්රෑම් 341ක් බව අධිකරණයට වාර්තා කෙරනි.
නඩු විභාගය අතරතුර මෙම සැකකරුවන් අට දෙනාගෙන් තිදෙනෙක් නිතීපති උපදෙස් මත මුදා හැරුණු අතර පස් දෙනෙක් විෂයෙහි හෙරොයින් කිලෝ ග්රෑම් 152යි ග්රෑම් 341 ජාවාරම් කිරීම, සන්තකයේ තබා ගැනීම, යන අධි චෝදනා යටතේ දීර්ඝ නඩු විභාගයක් පවත්වන ලදී.
එම චෝදනා තුනටම වරදකරුවන් කළ චූදිතයින් පස් දෙනාට අද (27) කොළම මහාධිකරණය අංක (03) මගින් මරණීය දණ්ඩනය නියම කළේය.
