ගන්නෝරුව සීමාමාලකය අසළින් මහවැලි ගඟට බැස දියනෑමට ගොස් අතුරුදන් වූ පාසල් සිසුවාගේ කිසිදු තොරතුරක් මේ වන විටත් ලැබී නැති බව පොලිසිය පවසයි.
සැඩපහට හසුව ගසාගෙන ගොස් අතුරුදන්ව ඇත්තේ ඉසුරු ලක්ෂාන් සමරනායක නමැති 18 හැවිරිදි සිසුවෙකි. ඔහු මහනුවර කිංස්වුඩ් විදුහලේ උසස් පෙළ හදාරන සිසුවෙකි.
දන්තුරේ උඩවෙල පදිංචි මෙම සිසුවා තවත් සිසුවෙකු සමග ඊයේ සවස දිය නෑම සඳහා මහවැලි ගඟට බැස තිබිණි දියේ ගසාගෙන යද්දී ගලක එල්ලීමෙන් දිවි බේරාගත් අනෙක් සිසුවා මහනුවර ජාතික රෝහලට ඇතුළත් කර ප්රතිකාර ලබමින් සිට අද පස්වරුවේ රෝහලින් පිටව ගියේය. සඳමාල් චන්ද්රසෝම නැමැති දිවිගලවාගත් එම සිසුවා ගන්නෝරුව රණබිම රාජකීය විදුහලේ උසස් පෙළ හදාරන සිසුවෙකි.
උපන්දින සැමරුමක් සඳහා ගොස් මෙම සිසුන් මහවැලි ගඟේ දිය නෑමට ගිය අවස්ථාවේදී මෙම අනතුරට මුහුණ පා ඇති බව පොලිසිය පවසයි.
දියේ ගසාගෙන ගොස් ගලක එල්ලී සිටියදී සැඩපහර මධ්යයේ ඔහු බේරා ගැනීමට කටයුතු කර තිබුණ මහනුවර ගිනි නිවීමේ ඒකකයේ දිනේෂ් චමින්ද හේරත් අදාළ සිසුවා බේරා ගැනීමට ගිය පළමු අවස්ථාවේ අවදානමකට මුහුණ දී තිබේ. දිනේෂ්ද ජලයේ ගසාගෙන ගොස් ඇති අතර ඔහු දිවි බේරාගෙන ඇත්තේ දැඩි පරිශ්රමයක් යෙදීමෙන් අනතුරුව ය.
පසුව කඹ ආධාර කරගැනීමෙන් මීටර් සියයක් පමණ දුරට ජලයේ පිහිනා ගොස් සෙසු සිසුවා නිරුපද්රිතව ගොඩ ගැනීමට ඔවුනට හැකිව තිබිණි.
.
