අසේල කුරුළුවංශ –
මහනුවර මහ නගර සභාවේ ජල කර්මාන්ත දෙපාර්තමේන්තුවට ජල පොම්පයක් මිලට ගැනීම සඳහා ටෙන්ඩර් කැඳවීමේදී අවම ලංසුව ලෙස රුපියල් මිලියන 39 ක් ඉදිරිපත් කළ සමාගම සැලසුම් සහගතව ඉවත්කර රුපියල් මිලියන 113 ක ලංසුවක් ඉදිරිපත් කළ ආයතනකට එය ලබාදීමට නිලධාරීන් පිරිසක් කටයුතු කරන තිබෙන බව මහනුවර පොදුජන දේපොල සුරැකීමේ සංවිධානයේ ප්රධාන ලේකම් අනුර කුමාර ගෝනවල කීය.
මහජන මුදල් අවභාවිත කිරීමෙ උපක්රමයක් ලෙස ලංසුවේ පිරිවිතර විකෘත කරමින් මෙම මුදල් වංචාව සඳහා පසුබිම සකස් කරගෙන තිබෙන බවද ඔහු කීය.
මහනුවර යටිනුවර වීදියේ ඩෙවොන් හෝටලයේදී අද (12) පැවැති මාධ්ය හමුවකදී ලේකම්වරයා මේ බව අනාවරණය කළේය.
සිද්ධිය සම්බන්ධයෙන් ජනාධිපති අනුර කුමාර දිසානායකටත්, අපරාධ පරීක්ෂණ දෙපාර්තමේන්තුවටත්, ප්රසම්පාදන කොමිෂන් සභාවේ සභාපතිවරයාට හා රජයේ විගණන කාර්යාලයටත් පැමිණිලි කළ බවද ඔහු කීය.
පසුගිය අගෝස්තු මස 25 දින ලංසු කැඳවීම් ප්රසිද්ධ කර තිබෙන බවත් ඊට අදාළව ලැබුණු ලංසු තුනක් ඔක්තෝම්ර්බ මස විවෘත කර තිබෙන බවත් කී ලේකම්වරයා එහිදී අවම ලංසුව ඉදිරිපත් කර තිබුණු මෙරට ප්රධාන පෙළේ ව්යාපාරික ආයතනය වෙනුවට වෙනත් සමාගමකට ටෙන්ඩරය ලබාදී තිබෙන්නේ කිසිදු පිළිගත හැකි හේතුවක් නොමැතිව බව ද අවධාරණය කළේය.
ලංසු කැඳවීමට පෙර පත් කරනු ලබන තාක්ෂණ ඇගයීම් කමිටුවක් මගින් ලංසු ලේඛන සකස් කිරීම රජයේ ක්රමවේදය බවත් ලංසු ලැබුණු පසු එම කමිටුව මගින් ලංසු පිරිනැමීම සම්බන්ධයෙන් ප්රසම්පාදන කමිටුවට නිර්දේශ ලබාදෙන බවත් කී ලේකම්වරයා ලංසු කැඳවීම සිදුකර තිබෙන්නේම නගර සභාවේ නිලධාරීන් කණ්ඩායමකට අවශ්යය ආයතනයට ටෙන්ඩරය පිරිනැමීමේ අරමුණින් බව තහවුරු කරන්නට සාක්කි ඕනෑ තරම් පවතින බවද පැවසුවේය.
මේ සඳහා තාක්ෂණ ඇගයීම් කමිටුවේ පිරිසක් පැහැදිලි ලෙසම කූඨ ලේඛනයක් සකස්කර ඇතැයිද නගර සභාවේ ලිපි ගොනුවේ මේ වනවිට තිබෙන්නේ එය බවට තහවුරු කළ හැකි ලේඛන පවතින බව ද අනුර කුමාර ගෝනවල ප්රකාශ කළේය.
අත්දැකීම් වලින් හා දැනුමෙන් අඩු ජාතික ජනබලවේගයේ සභිකයින් මුලා කරමින් නිලධාරීන් පසුගිය දෙසැම්බර් 31 වැනි දින පැවැති මහ සභාවට මෙය ඉදිරිපත් කර අනුමැතිය ලබාගෙන තිබෙන බවත් ටෙන්ඩරය ප්රදානය කළ සමාගම සම්බන්ධයෙන් රුපියල් 15000 ක දෛනික වැටුපකට නගර සභාවට බඳවාගෙන තිබෙන නගර සභාවේ හිටපු යාන්ත්රික ඉංජිනේරුවෙකු විශාල ඇගයීමක් සිදුකර තිබීම බරපතළ සැකයට හේතුවන කරුණක් බවත් ඔහු පැවසුවේය.
ජල නළ දෙකක් මිලට ගන්නේ නම් වට්ටමක් සහිතව එකක් රුපියල් මිලියන 89 බැගින් ලබාදිය හැකි බව ටෙන්ඩරය ලබාගත් සමාගම දන්වා තිබෙන බවත් ඒ අනුව මහනගර සභාව රුපියල් මිලියන 168 ක මහජන මුදල් මේ වෙනුවෙන් වැයකර ජල පොම්ප දෙකක් මිලට ගැනීමට යන බවත් මහනුවර පොදුජන දේපොල සුරැකීමේ සංවිධානයේ ප්රධාන ලේකම්වරයා පැවසුවේය.
මහජන මුදල් කොල්ලකන සටකපට නිලධාරීන්ගේ උගුලට අසුව ඒ සඳහා අනුමැතිය ලබාදීම ඔස්සේ මහනුවර මහ නගර සභාවේ සභිකයින් මතු දිනෙක අධිභාරයකට ලක්වන බවත් ඒ නිසා මේ සම්බන්ධයෙන් සභාව තුළ සංවාදයක් ඇතිවිය යුතුව තිබෙන බවත් ඒ ඔහු ප්රකාශ කළේය.
