අනුරාධපුර – පර්සි කුරුනේරු-
හඳුනා නොගත් රෝගයක් හේතුවෙන් මහකනදරාව ව්යාපාරයේ කුඹුරු විනාශවීමේ අවදානමකට පත්වෙමින් තිබෙන බව මහකනදරාව මහසෙන් ගොවි සංවිධානයේ සභාපති සමන් තුසිත පැවසීය.
මහකනදරාව ගොවිජනපදයේ දකුණු ඉවුර ප්රදේශයේ වී වගාව ආශ්රිතව පැතිර යන මෙම හඳුනා නොගත් රෝගය නිසා එම ව්යාපාරයේ වී අස්වැන්න පිළිබඳ අවදානමක් පවතින බවත් හෙතෙම පවසයි.
ගොයම කහ පැහැගැන්වී පුල්ලි මතුවී තිබෙන මෙම රෝගය මර්දනය කිරීමට කොතෙක් ප්රතිකාර කලත් රෝගය පාලනය කිරීමට නොැහැකිවී ඇති බවත් ඔහු පැවසීය.
මේ වන විට විශාල කුඔුරු හයක පමණ ප්රමාණයක් යළි යථා තත්ත්වයට ගත නොහැකි තත්ත්වයට විනාශ වී ඇති බවත්
මේ සඳහා හැකි ඉක්මනින් විසඳුමක් ලබාදෙන ලෙසත් මහසෙන් ගොවි සංවිධානයේ සභාපති සමන් තුසිත බලධාරීන්ගෙන් ඉල්ලා සිටී.
ප්රදේශය භාර කෘෂි පර්යේෂණ නිලධාරිනිය පැමිණ පොටෑසියම් ඌණතාවයක් නිසා රෝගය වැළදී ඇති බවට පැවසුවත් දිනෙන් දින එම රෝගය ක්රමයෙන් පැතිර යන බවත් ඔහු කීවේය.
“මෙම ව්යාපාරය යටතේ කුඹුරුවල වගාකළ වී වගාවේ අක්කර හයක පමණ ගොයමේ මේ වනවිට තැනින් තැන හඳුනා නොගත් රෝගය ව්යාප්ත වෙමින් තිබෙනවා.”
“මෙම රෝගය සමස්තයක් ලෙස ගත්තොත් අක්කර පනහකට හැටකට පමණ ව්යාප්ත විය හැකියි. රෝගය කුමක්ද කියා හරියටම දන්නෙ නෑ. නමුත් මේ ගොයමට දින හතළිහක් පමණ ගත වී තිබෙනවා. මෙම ගොයමෙන් කිසිසේත්ම කරලක් බලාපොරොත්තු වෙන්න බෑ.”
“මේවනවිට අපි මේ ගොයමට මූලික වියදම් සිදුකොට හමාරයි. පළිබෝධනාශක සහ පොහොර අවශ්ය ප්රමාණයට යොදා අවසන්.”
ඒ වගේම මේ වගාවට පොහොර සහනාධාරය අඩක් ලැබී තියෙන්නේ. සමහර ගොවීන්ට ලැබිලම නෑ. එනිසා අපි රජයෙන් බලාපොරොත්තු වෙන්නේ මේ සම්බන්ධයෙන් සොයා බලා කඩිනම් පරීක්ෂණයක් සිදුකොට එහි ප්රතිඵල අනුව රෝගය නිසා හානියට කුඹුරු ගොවීන්ට වන්දි ලබාදීමට කටයුතු කරන ලෙසයි.” සභාපතිවරයා පැවසුවේය.
