පසු ගිය 13 වෙනි දින කොළඹ 7 , මල් පාරේ , අගමැති කාර්යාලය අසල සිදු වු ගැටුම අතරතුර එල්ලවූ කඳුලු ගෑස් ප්රහාරයක් වැදී තරුණයෙක් මිය ගියේය. මහව , දළදාගම පදිංචිව සිටි 26 හැවිරිදි ඩී.එම්.ජාලිය දිසානායක නැමැති එක් දරු පියෙක් අවාසනාවන්ත ලෙස ජීවිතක්ෂයට පත් වූයේය.
“මගෙ මහත්තය කාටවත් කරදර කරන කෙනෙක් නෙමේ……එයා ජීවත් වෙන්න රස්සාව විදිහට කලේ ත්රීවීලර් එක හයර් කරන එක….ඒකෙන් ලැබෙන සොච්චම් මුදලෙන් තමයි මමයි , දරුවවයි ජීවත් කළේ……ඒත් පහුගිය දවස් ටිකේ මේ පැත්තට තෙල් ආවේ නෑ …. ඒ නිසා එයාගෙ රැකියාව අහිමි වුනා….. කල්පනා කර කර ඉඳල බැරි ම තැන තමයි එයා කොළඹ යන්න පිටත් වුනේ…… එයා එනතුරු මට යි දරුවටයි පරිස්සමෙන් ඉන්න කීවා….. මේ අරගලයට ඉදිරිපත් වෙන්නැති ව ගෙදර ඉන්න එක නිවට කමක් කිවා….. එහෙම කියල තමයි 12,වෙනිදා රෑ යාලුවො කිප දෙනෙක් එක්ක බස් එකක නැගල ගියේ…. ඒත් එයා ආපහු ආවේ පෙට්ටියක…. .මට ඒක වාවන්නෙ නෑ ….. මගෙ අහිංසක දරු පැටියට තාත්තා නැති වුනා…” යැයි හඬා වැළපුණේ මිය ගිය ජාලිය ගේ බිරිඳ මයුරි හංසිකා (25) ය. බලල්ල , විලව පදිංචි ඇය මීට වසර තුනකට පෙර ජාලිය හා විවාහ වූ අතර ඔවුන්ට මේ වන විට අවුරුදු දෙකක පුතෙක් සිටියි.
දළදාගම ත්රිරෝද රථ සංගමයේ සාමාජිකයෙක් වූ ජාලිය මිතුරන්ගෙ දුකට සැපට අත්වැලක් වෙමින් සතුටින් ජීවිතය ගත කල අයෙකි. ජාලියගේ වෙන්වයාම අදහාගත නොහැක්කක් බව ඔහුගේ මිතුරෝ අපට පැවසූහ. ජාලිය සාමාන්ය පෙළ විභාගය දක්වා අධ්යාපනය ලැබුවේ මහව විජයබා ජාතික පාසලේය. අසංක දිසානායක වන ඔහුගේ පියා මහව ප්රාදේශීය සභාවේ විපක්ෂයේ මන්ත්රී වරයෙකි. ඔහු වේදනාවෙන් අප සමඟ මෙලෙස පැවසුවේ ය.
” එදාවේල හරි හම්බ කරගෙන ජීවත් වුන මගේ රත්තරං පුතා අද මට අහිමි වුනා. පහුගිය දවස් ටිකේ පෙට්රල් ආවෙ නැති නිසා එයාට එයා ගෙ රැකියාව අහිමි වුනා…. වගකීම් විරහිත පාලකයො තරුණ දරුවෙක් ගෙ ජීවිතයක් බිලි ගත්ත… මට මගෙ පුතා නැති වුනා.. කිරිසප්පයෙකුට තාත්තා නැති වුනා.. රිඳකට ස්වාමිපුරුෂයා නැති වුනා.. මේ අයගෙ වගකීම බාර ගන්නෙ කවුද දැන් ….. .
එදා 13 වෙනිද අගමැති කාර්යාලය අසල කඳුළු ගෑස් ප්රහාරයෙන් තමයි මගෙ දරුව අසනීප වුනේ… ළඟම තිබුන පෞද්ගලික රෝහලකට එයාගෙ යාලුවො ටික පුතා ව අරන් ගියත් බේරගන්න බැරි වුනා …. දරුවට පාඩුවෙ රස්සාව කරගෙන ඉන්න තිබුන නම් කවදාවත් මේ වගෙ දේකට පෙලඹෙන්නෙ නෑ …”
සමාජ විප්ලවය ත් අරගලය ත් භූමිකම්පාවකට සමාන යැයි කියමනක් තිබේ. අරගලය තුළ මනුෂ්ය වර්ගයා පෙළ ගැසෙන්නේ පොදු පරමත්ථ සාක්ෂාත් කරගනු පිණිසය. අරගලයක අවසන් ඵලය විය යුත්තේ මානව සංහතියේ සුබ සිද්ධිය යි. සිය අවශ්යතා ඉටු කර ගැනීමට නොහැකිවන විට ඔවුන් ඉච්ජාභංගත්වයට පත් වීම සාමාන්ය දෙයකි. පැය ගණන් පෝලිම්වල රස්තියාදු වන්නට සිදුවන විට ජනතාව නිරායාසයෙන් අරගලවලට යොමු වීම සත්යයක් බව පෙන්වා දෙන්නට මෙය හොඳ නිදසුනකි .
මියගිය ජාලීයගේ අවසන් කටයුතු හෙට දින (17) දළදාගම පොදු සුසාන භූමියේ දී සිදුකෙරෙනු ඇති .
