දශක පහකට ආසන්න කාලයක් ක්රියාත්මක වූ පාර්ලිමේන්තු මන්ත්රී විශ්රාම වැටුප් ක්රමය අහෝසි කිරීම සඳහා වූ පනත් කෙටුම්පතට, රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ ඒකමතික අනුමැතිය හිමිව තිබේ.
කාරක සභා සභාපති පාර්ලිමේන්තු මන්ත්රී නජිත් ඉන්දික ප්රකාශ කළේ, වත්මන් රජය සිය ප්රතිපත්ති ප්රකාශනය මගින් පොරොන්දු වූ පරිදි දේශපාලනය වරප්රසාද ලබන වෘත්තියක සිට ජනතා සේවයක් දක්වා පරිවර්තනය කිරීමේ වැදගත් පියවරක් ලෙස මෙය ක්රියාත්මක වන බවයි.
මෙම පනත් කෙටුම්පත නීතියක් බවට පත්වීමේ ක්රියාවලිය සන්ධිස්ථාන කිහිපයක් පසුකර තිබේ. 2026 වසරේ මුල් භාගයේදී මෙම පනත් කෙටුම්පත රජයේ ගැසට් පත්රය මගින් ප්රසිද්ධ කරනු ලැබීය. ඉන් අනතුරුව පනත් කෙටුම්පත පාර්ලිමේන්තුවට ඉදිරිපත් කර “පළමු කියවීම” අවසන් කරන ලදී.
ඉන් අනතුරුව පනත ආංශික අධීක්ෂණ කාරක සභාවේ සමාලෝචනයට යොමු වූයේය. දැන් පවතින්නේ එම අදියරේය. පනතේ අන්තර්ගතය සහ වගන්ති පිළිබඳව ගැඹුරින් අධ්යයනය කළ රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාව ඊට සිය ඒකමතික අනුමැතිය ලබා දී තිබේ.
පනත් කෙටුම්පත දෙවන කියවීම සඳහා ලබන සතියේදී පාර්ලිමේන්තුවට ඉදිරිපත් කිරීමට නියමිත අතර, එහිදී පැවැත්වෙන විවාදයෙන් හා ඡන්ද විමසීමෙන් පසු කථානායකවරයාගේ සහතිකය සහිතව එය නීතියක් බවට පත් වනු ඇත.
මෙම නව සංශෝධනය මගින් මෙතෙක් ක්රියාත්මක වූ 1977 අංක 1 දරණ පාර්ලිමේන්තු මන්ත්රී විශ්රාම වැටුප් පනත සම්පූර්ණයෙන්ම බලරහිත වේ. වසර පහක සේවා කාලයකින් පසු මන්ත්රීවරුන්ට හිමි වූ ජීවිතාන්තය දක්වා වූ විශ්රාම වැටුප් වරප්රසාදය මේ හරහා අහෝසි වන අතර, එය මෙරට දේශපාලන සංස්කෘතියේ සිදු වන දැවැන්තම වෙනසක් ලෙස සැලකේ.
“අපි මැතිවරණයට පෙර ලබාදුන් ප්රධාන පොරොන්දුවක් තමයි මේ මන්ත්රී විශ්රාම වැටුප අහෝසි කිරීම. මේ හරහා අපි මොන වගේ දේශපාලන සංස්කෘතියක් ද රටේ ඇති කරන්නේ කියන එකට පැහැදිලි තහවුරුවක් ලැබෙනවා.” රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ සභාපති නජිත් ඉන්දික ප්රකාශ කළේය.
මෙම පනත සම්මත වීමත් සමඟ පාර්ලිමේන්තුව යනු වරප්රසාද ලබන මධ්යස්ථානයක් වෙනුවට සැබෑ මහජන සේවයක් සිදු කරන ආයතනයක් බවට පත්වනු ඇතැයි රජය විශ්වාසය පළ කරයි.
