-
ඇප පිට එළියට ආපු ජාවාරම් කරු අත් අඩංගුවට ගත් නිලධාරීන්ට එරෙහිව මානව හිමිකම් ගිහින්… පොලිසිය ඇතුළෙන්ම පොලිස් ලොක්කන්ගේ වැඩවලට විරෝධයක්!
අයිස් මත්ද්රව්ය ග්රෑම් 5ක් සහ මිලි ග්රෑම් 520ක් සන්තකයේ තබාගෙන සිටිය දි බියගම පොලිිසිය විසින් අත් අඩංගුවට ගන්නා ලද මත්ද්රව්ය ජාවාරම් කරුවෙක් ඇප පිට නිදහස් කිරීම සඳහා ඉහළම පොලිස් නිලධාරියෙකුගේ බලපෑම මත පොලිස් පොතේ ලේඛණ වෙනස් කර මත්ද්රව්ය මිලි ග්රෑම් 550ක් පමණක් උසාවියට ඉදිරිපත් කළ සිදුවීමක් සම්බන්ධව බියගම පොලිස් නිලධාරීන් දැඩි අපේක්ෂා භංගත්වයට පත් වී ඇතැයි වාර්තා වේ.
සැබෑ ලෙස අත් අඩංගුවට ගත් මත්ද්රව්ය ප්රමාණය වූ මිලි ග්රෑම් 5520 වෙනස් කර මිලි ග්රෑම් 550ක් ලෙස උසාවියට ඉදිරිපත් කළ අපරාධකරු පසුදාම ඇප මත නිදහස් වී පැමිණ වැටලීම කළ බියගම පොලිසියේ අපරාධ පරීක්ෂණ අංශයේ ස්ථානාධිපතිවරයාටත්, ඊට එක් වු නිලධාරීන්ටත් මානව හිමිකම් නඩුවක් ගොනු කර ඇති බව ද අනාවරණය වී ඇත.
වාර්තාවන පරිදි සිද්ධිය මෙසේය.
පසුගිය දෙසැම්බර් 23 දා පොලිසිය විසින් හඳුනාගෙන සිටි සපුගස්කන්ද ප්රදේශයේ ප්රධාන පෙළේ මත් ද්රව්ය ජාවාරම්කරුවෙක් බියගම ආයෝජන කලාපය ඉදිරියේ ප්රධාන ගේට්ටුව අසල දී අත් අඩංගුවට ගත්තේය. මෙම 37 හැවිරිදි පුද්ගලයා මල්වාන ප්රදේශයේ පදිංචිකරුවෙකි. ඔහු බියගම ආයෝජන කලාපය ඉදිරිපිට දුරකථන අලෙවි සැලක් ද පවත්වාගෙන යන අයෙක් බව කියැවිනි.
අත් අඩංගුවට පත් පුද්ගලයා ලඟ අයිස් මත්ද්රව්ය මිලිග්රෑම් පන්දහස් පන්සිය විස්සක් හෙවත් ග්රෑම් පහයි මිලිග්රෑමි පන්සිය විස්සක් සොයා ගැනුණි. අත් අඩංගුවට පත් සැකකරු සැකකරු බියගම පොලිසියට රැගෙන ආවේය. සියලුම තොරතුරු ලේඛන ගත කළේය. නඩු භාණ්ඩ ද ලේඛණ ගත විය. වැටලීම ගිය නිලධාරීන් සිය ගමන් සටහන් පොතේ ද නියමිත පරිදි සියල්ල සටහන් කර තැබුවේය.
මෙම පුද්ගලයා අත් අඩංගුවට ගැනීම සම්බන්ධව පොලිසියේම කොස්තාපල්වරයෙක් මුලින්ම කලබල වී තිබිණි. සැකකරුගෙ දුරකථන සම්බන්ධව කළ මුලික විමර්ශනයේ දි මෙම සැකකාර කොස්තාපල්වරයා සහ සැකකරු අතර තිබුණු සමීප සම්බන්ධතාවයක් ද හෙළි විය. විමර්ශකයන් කළ හෙළිදරව් කිරීම්වල දී මීගමුව පැත්තේ දේශපාලන පාර්ශවයක් හා සම්බන්ධ මත්ද්රව්ය ජාලයේ චරිතයක් ලෙස මෙම පුද්ගලයා කටයුතු කරන බවත්, කොස්තාපල්වරයා ඔහුගේ ජාවාරමට සම්බන්ධව සිටින බවත් අනාවරණය වී තිබිණි.
මේ අතර ඉතාම තීරණාත්මක සිද්ධියක් වන්නේය. ඉහළින්ම ලද නියෝගයක් බව කියමින් කොට්ඨාස භාර ජ්යෙෂ්ඨ පොලිස් අධිකාරීවරයා සහකාර පොලිස් අධිකාරීවරයා හරහා බියගම පොලිසියට දන්වා සිටින්නේ සැකකරුට ඇප ලබා දිය හැකි මට්ටමට අත් අඩංගුවට ගත් මත්ද්රව්ය ප්රමාණයේ බර අඩු කර ලේඛණගත කිරීීමෙන් පසු අධිකරණයට ඉදිරිපත් කරන ලෙසය.
සාමාන්යයෙන් මත්ද්රව්ය ග්රෑම් 5 හෙවත් මිලි ග්රෑම් පන්දහසට වඩා වැඩි ප්රමාණයක් සමග අත්ඩංගුවට පත්වුහොත් එම පුද්ගලයාට ඇප ලැබෙන්නේ නැත. ඇප ලැබුණත් ලබා ගැනීමට මාස කිහිපයක් ගතවන්නේය. ඒ සඳහා මහාධිකරණයේ පිහිට පැතිය යුතුය. ඇප ලබා ගැනීමට හැකි ප්රමාණයට මත්ද්රව්ය බර අඩු කරන්න නම් අත් අඩංගුවට ගත් ග්රෑම් 5යි මිලි ග්රෑම් 520න් ග්රෑම් 5 ඉවත් කර ලේඛන සකස් කළ යුතුය. වැටලීම ගිය නිලධාරින් මේ වෙනස් කිරීමට එකඟ වූයේ නැත. එය ඔවුන්ගේත් බෙල්ල කැපෙන අනීතික වැඩකි.
එහෙත් නියෝගය බලවත් වූයේය. සියලුම පොත්පත්වල අත් අඩංගුවට ගත් මත්ද්රව්ය ප්රමාණය මිලි ග්රෑම් 5520ක් ලෙස සටහන්ව තිබෙද්දී බිගයම පොලිස් ස්ථානාධිපතිවරයා උසාවියට ඉදිරිපත් කරන බී වාර්තාවට ඇතුළත් කරන්නේ මේ පුද්ගලයා සන්තකයේ අයිස් මිලි ග්රෑම් 550ක් තිබූ බවකි.
සැකකරුට එදිනම ඇප ලැබුනේය. සිද්ධිය සම්බන්ධව පොලිසිය තුළින්ම විරෝධතා මතු වූයේය. අභ්යන්තර පරික්ෂණයක් ද සිදු කර තිබිණි. මේ අතර මත්ද්රව්ය ජාවාරම්කරුවා කරන්නේ අපුරු වැඩකි. අත් අඩංගුවට ගත් මත්ද්රව්ය තොගය ඔහුව බේරා ගැනීම වෙනුවෙන් ග්රෑම් පහකින් අඩුකර බියගම ස්ථානාධිපතිවරයා කළ ඉදිරිපත් කිරීම පදනම් කරගෙන ඔහු තමන්ව අත් අඩංගුවට ගත් නිලධාරීන්ට එරෙහිව මානව හිමිකම් පැමිණිල්ලක් ගොනු කරන්නේය.
ඊට අමතර සාක්ෂි ලෙස බියම පොලිසියේ ඔහුට හිතවත් කොස්තාපල් විසින් ඔහු රැගෙන ඒම, ප්රශ්න කිරීම සහ පොලිස් කූඩුවට දැමීම දක්වා සියලු කරුණු වීඩියෝ ගත කර එම විඩියෝ ක්ලිප් ජාවාරම්කරු වෙත ලබා දෙන්නේය.
යුක්තිය සම්බන්ධව බරපතල ප්රශ්න මතුවන මෙවැනි විශේෂ සිදුවීම් වාර්තා වන බව පොලිසියේ අභ්යන්තර ආරංචි මාර්ග පවසන්නේය. ඒ සෑම අවස්ථාවකදීම පොලිසියේ ඉහළම පාර්ශවය මෙම මැදිහත් වීම් සිදුකර ඇති බව පැවසෙන්නේය. ලෝකයට මාර කතා කියන යුක්තිය ඒ තරම් මාර නැති ගැලරියට ගහන ෂෝ එකක් බව පොලිසිය ඇතුළෙන්ම එළියට එන මෙවැනි සිද්ධි හරහා ප්රකාශිතව තිබේ. .
