සූරියවැව නුවන් ජයසේකර –
බෙලිඅත්ත ප්රාදේශීය සභාවේ හිටපු සභාපති සිරිල් මුණසිංහ විදෙස් රටක නිෂ්පාදිත බැරල් දෙකේ ජීව උණ්ඩ යෙදිය හැකි ගිනි අවියක් සමග අද (22) අළුයම මත්තල පොලිසිය විසින් අත්අඩංගුවට ගෙන තිබේ.
මත්තල පොලිස් ස්ථානාධිපති පොලිස් පරීක්ෂක ප්රසාද් බණ්ඩාර ට ලද පුද්ගලික තොරතුරකට අනුව මත්තල පොලිස් බල ප්රදේශයට අයත් ගම්මිරිස් වගාව පිටුපස කොටසේ සිදු කළ විශේෂ වැටලීමකදී මෙම ගිනි අවිය සොයාගෙන ඇත.
ශ්රී ලංකා පොදු ජන පෙරමුණ නියෝජනය කරමින් දේශපාලනයේ නිරත බෙලිඅත්ත ප්රාදේශීය සභාවේ හිටපු මෙම සභාපතිවරයාට අයත් මත්තල පොලිස් වසමේ පිහිටි ඉඩමක ඉදිකර තිබූ නිවසක් තුළ සඟවා තිබියදී මෙම ගිනි අවිය සමඟ හිටපු සභාපතිවරයා අත්අඩංගුවට ගෙන තිබේ.
අත්අඩංගුවට පත් සැකකාර සභාපතිවරයාගෙන් ප්රකාශ සටහන් කරගෙන ඇති අතර ඔහු අද තිස්ස මහරාම මහේස්ත්රාත් අධිකරණයට ඉදිරිපත් කිරීමට නියමිතය. සිද්ධිය සම්බන්ධයෙන් තංගල්ල කොට්ටාස භාර ජ්යේෂ්ඨ පොලිස් අධිකාරී වරයාගේ උපදෙස් පරිදි මත්තල පොලිස් ස්ථානයේ ස්ථානාධිපති පොලිස් පරීක්ෂක ප්රසාද බණ්ඩාර ඇතුළු නිලධාරින් කණ්ඩායමක් වැඩිදුර විමර්ශන පවත්වයි.
