මේ වනවිට සාගරය මැද අත්හැර දැමූ මහා නෞකාවක් දැවෙමිනි. අත්හැර දැමූ නෞකාව මෝනිං මිඩාස්ය. ඇලස්කාවේ ඇඩැක් දූපතට කිලෝමීටර් 482 ක් පමණ දුර නිරිත දෙසින් නෞකාව දැවෙමින් තිබේ.
ලයිබීරියාවේ ධජය සහිත නෞකාව මැයි 26 වන දින චීනයේ යන්තයි වරායෙන් පිටත් වී මෙක්සිකෝවේ ලාසාරෝ කාර්ඩනාස් වෙත යමින් සිටියේය. නෞකාවේ රැගෙන යමින් තිබුණේ තුන්දාහකට වැඩි නවීන වාහන තොගයකි. හරියටම කියනවා නම් වාහන 3081කි. ඉන් 70 ක් සම්පූර්ණයෙන්ම විදුලි බලයෙන් ක්රියාත්මක වාහනය. 861 ක් හයිබ්රීඩ් වාහනය.
නෞකා සමාගම වූ Zodiac Maritime බදාදා කීවේ ගින්න නිවා දැමීම නොහැකි වීම නිසා නෞකාව අත්හැර දමා 22ක් නෞකාවේ කාර්ය මණ්ඩලය ජීවිත ආරක්ෂක බෝට්ටු යොදවා ආරක්ෂිතව ඉවත් කළ බවය. එක්සත් ජනපද වෙරළාරක්ෂක බලකාය සමඟ එක්ව අසල පිහිටි වෙළඳ නෞකාවකට මෙම කාර්ය මණ්ඩලය යොමු කර ඇත..
මේ වනවිට නෞකාව හානිය අවම කරගෙන බේරා ගැනීමට හැකි ආකාරය ගැන Zodiac Maritime සමාගම අවධානය යොමු කරමින් ඇති ආකාරය විදෙස් මාධ්ය වාර්තා කරයි.
සමාගම කියන්නේ ගින්න නිවීම අභියෝගයක් බවය. ගින්නෙන් ඇතිවන තාපය සහ නැවත ගිනිගැනීමේ අවදානම දින ගණනාවක් පැවතිය හැකි බවය.
වෙරළාරක්ෂක බලකාය උපුටා දක්වමින් රොයිටර් වාර්තා කරන්නේ තත්වය පාලනය කිරීම සඳහා ගුවන් කාර්ය මණ්ඩලය සහ කටර් නෞකාවක් යවා ඇති බවත්, යාත්රා තුනක් දැනටමත් එම ස්ථානයේ ඇති බවත්ය.
වාහන නෞකා ගිනි ගැනීමේ මෑත අත්දැකීම් අමතක නොවන මතකයන් සේ තිබෙ.
2022 දී, පෝර්ෂේ සහ බෙන්ට්ලි ඇතුළු සුඛෝපභෝගී මෝටර් රථ 4,000 ක් රැගත් නෞකාවක් පෘතුගීසි අසෝර්ස් දූපත් සමූහයෙන් ඔබ්බේ ගිනි ගත්තේය . නෞකාව සති දෙකක් දැවෙමින් පැවතිනි. අනතුරුව එය ගිලි ගියේය.
