සංවිධානාත්මක අපරාධකරුවෙක් වූ කෙහෙල්බද්දර පද්මේ නැමැත්තාට ව්යාජ ගුවන් ගමන් බලපත්ර සෑදීමේ සිද්ධියත් සමග මතුවූ දැඩි ආන්දෝලනාත්මක තත්ත්වය තුළ ආගමන විගමන දෙපාර්තමේන්තුවේ ගමන් බලපත්ර නිකුත් කිරීමේ පද්ධතියේ වෝහාරික විගණනයක් කිරීමට තීරණය කර තිබේ.
ඒ සඳහා මොරටුව විශ්වවිද්යාලයේ සහයෝගය ලබා ගැනීමට නියමිතව ඇත.
පාතාල අපරාධකරුට ගුවන් ගමන් බලපත්ර සකස් කිරීමේ සිද්ධිය සම්බන්ධ විමර්ශන ප්රගතිය පිළිබඳ අද (05) අධිකරණයට වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව මේ පිළිබඳව අධිකරණයට දැනුම් දුන්නේය. ඒ කොළඹ ප්රධාන මහේස්ත්රාත් තනූජා ලක්මාලි ඉදිරියේ අද එම නඩුව කැඳවූ අවස්ථාවේ දී ය.
විමර්ශනය පිළිබඳ ප්රගතිය අධිකරණයට ඉදිරිපත් කරමින් අපරාධ පරීක්ෂණ දෙපාර්තමේන්තුවේ නිලධාරීන් කියා සිටියේ මෙම නඩුවලට සම්බන්ධ ප්රශ්නගත අවිධිමත් විදෙස් ගමන් බලපත්ර දෙක සකස් කිරීමට දායක වූ ආගමන හා විගමන දෙපාර්තමේන්තුවේ නිලධාරීන් 09 දෙනෙකුගෙන් ප්රකාශ සටහන් කරගත් බවය.
එමෙන්ම ප්රශ්නගත ගුවන් ගමන් බලපත්රය සෑදීම සඳහා ඡායාරූපය එවූ ජංගම දුරකථනය සිම්කාර්ඩ්පත් හිමිකරුගෙන් ද ප්රකාශයක් සටහන් කරගත් බව විමර්ශන නිධාරීහු කියා සිටියහ.
මෙම ගමන් බලපත්රය නිකුත් කිරීම සඳහා යොදාගත් පරිගණක මෘදුකාංගය හිමි පුද්ගලික සමාගම් දෙකේ කළමනාකරුවන්ගෙන් ද මේ වනවිට ප්රකාශ සටහන් කරගෙන ඇත.
අපරාධ පරීක්ෂණ දෙපාර්තමේන්තුව කියා සිටියේ සැකකරුවන්ගේ භාරයේ තිබූ ජංගම දුරකථන හා පරිගණක විශ්ලේෂණය කර වාර්තා ලබා ගැනීම සඳහා රජයේ රස පරීක්ෂකවරයා වෙත යොමු කර ඇති බවය.
කෙහෙල්බද්දර පද්මේට ගුවන් ගමන් බලපත්රයක් සකස් කිරීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් අත් අඩංගුවට ගත් ආගමන විගමන දෙපාර්තමේන්තුවේ සහකාර පාලකවරයා සේවට බැඳුන දා සිට මේ දක්වා නිකුත් කර තිබෙන විදෙස් ගමන් බලපත්ර පිළිබඳ වාර්තාවක් ලබාගෙන ඒ ඔස්සේ වැඩිදුර විමර්ශන පවත්වන බවත් ඔවුහු අධිකරණයට වාර්තා කළහ.
ඉහත කරුණු වාර්තාවෙන් පසු අපරාධ පරීක්ෂණ දෙපාර්තමේන්තුව ඉල්ලා සිටියේ සැකකරුවන්ට අදාල පරීක්ෂණ අවසන් වී නැති බැවින් ඔවුන් තව දුරටත් රක්ෂිත බන්ධනාගාරගත කරන ලෙසය.
මේ අවස්ථාවේ දි සැකකාර ආගමන විගමන පාලකවරයා වෙනුවෙන් පෙනී සිටි ජනාධිපති නීතිඥ සරත් ජයමාන්න අධිකරණය හමුවේ කරුණු දක්වමින් පෙන්වා දුන්නේ ඉකුත් දින මේ නඩුව කැඳවූ අවස්ථාවේ දී දැනට මේ නඩුව සම්බන්ධ කරුණු හැරුනු කොට වෙනත් සාක්ෂි තියනවා නම් ඉදිරිපත් කරන ලෙස අධිකරණය විසින් අපරාධ පරීක්ෂණ දෙපාර්තමේන්තුවට නියෝග කළ බවය.
නමුත් එවැනි සාක්ෂි කිසිවක් අද දින ඉදිරිපත් කර නොමැති බව ජනාධිපති නීතිඥවරයා පෙන්වා දුන්නේය. මේ වනවිට සිදුවන විමර්ශන සියල්ල තාක්ෂණික කාරණා මත සිදුකරන විමර්ශන බැවින් ඊට මැදිහත්වීමට හෝ ඊට බාධා කිරීමට තම සේවාදාකයාට හැකියාවක් නොමැති බව කියා සිටි නිතිඥවරයා සිය සේවාදායකයා ඇප මත මුදා හරින ලෙස ඉල්ලා සිටියේය.
සෙසු සැකකරුවන් වෙනුවෙන් පෙනී සිටි නීතිඥවරයා ද ඇප ඉල්ලීම් ඉදිරිපත් කළේය. සැකකරුවන්ගේ ඇප නියෝගය හෙට දින ප්රකාශයට පත් කිරීමට දින නියම කරමින් සැකකරුවන් රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් තනූජා ලක්මාලි නියෝග කළාය.
