සුරියවැව නුවන් ජයසේකර –
සූරියවැව නගරයේ පිහිටි වෙළඳසැලක උඩු මහලේ සිට පඩිපෙළින් බිමට වැටි මියගිය බව කියන දෙදරු මවකගේ මරණය සම්බන්ධයෙන් සූරියවැව පොලිසියට ලද පැමිණිල්ලකට අනුව සැක පිට ඇයගේ සැමියා පොලිසිය විසින් අත්අඩංගුවට ගෙන හම්බන්තොට මහේස්ත්රාත් අධිකරණයට ඉදිරිපත් කිරීමෙන් අනතුරුව මේ මස 10 වන දින දක්වා රක්ෂිත බන්ධනාගාර ගත කරන ලෙස හම්බන්තොට මහේස්ත්රාත් හා අතිරේක දිසා විනිසුරු ඕෂධ මිගාර මහආරච්චි මහතා ඊයේ (02) දින සවස නියෝග කෙරුණි.
මෙලෙස රක්ෂිත බන්ධනාගාර ගත කෙරුනේ රුහුණු ෆාමසිය, සූරියවැව නගරය ලිපිනයේ පදිංචිව සිටි ෆාමසියක හිමි කරුවෙකු වන එඩේරගේ නලින්ද ප්රසාද් නැමති දෙදරු පියෙකි.
මරණයට පත්ව ඇත්තේ රක්ෂිත බන්ධනාගාර ගත කෙරුණු සැකකරුගේ බිරිද වන ලියනගමගේ රසිකා දමයන්ති නැමති දෙදරු මවය.
පසුගිය 01 වන දින අළුයම 04ට පමණ නිවසේ පඩිපෙළින් බිමට වැටී අනතුරකට ලක්ව ඇති බව පවසමින් සැමියා විසින් මරණකාරිය සූරියවැව රෝහලට ඇතුළත් කර තිබේ.
රෝහලට ඇතුළත් කරන විටත් දෙදරු මව මියගොස් සිට ඇති බව රෝහල් ප්රකාශකයෙකු පැවසුවේය. සැකකරු හා මරණකාරිය අතර කලක සිට පවුල් ආරවුල් පැවති ඇති බව මුලික පරික්ෂණ වලදි අනාවරණය වි ඇති අතර මියගිය කාන්තාවගේ ඥාතීන්ද පැවසුවේ දෙදෙනා අතර කලක සිට පවුල් ආරවුල් නිතර පැවති බවය. මරණයට පත් වීමට පෙර දිනයේ රාත්රියේද දෙදෙනා අතර බොහෝ වේලාවක් ගැටුමක් ඇතිව තිබේ.
ඒ අනුව මෙම මරණය සැක සහිත බවට මරණකාරියගේ මව වන කංකානම් ගමගේ ප්රේමාවතී යන අය හා සහෝදරියක වන ලියනගමගේ රමණි යන අය විසින් සූරියවැව පොලිසියට පැමිණීල්ලක්ද ගොනු කර තිබේ.
ඒ අනුව මෙම මරණය සම්න්ධයෙන් සූරියවැව පොලිසිය හම්බන්තොට මහේස්ත්රාත් අධිකරණයට කරුණු වාර්තා කිරීමෙන් පසු හම්බන්තොට මහේස්ත්රා හා අතිරේක දිසා විනිසුරු වරයා විසින් සිද්ධිය වු ස්ථානයට පැමිණි මහේස්ත්රාත් පරික්ෂණය පැවැත් වු අතර සිරුර හම්බන්තොට මහ රෝහලේ අධිකරණ විශේෂඥ වෛද්ය වරයා හමුවට ඉදිරිපත් කර පශ්චාත් මරණ පරික්ෂණ වාර්තාවක් අධිකරණයට ඉදිරිපත් කරන ලෙසට සූරියවැව පොලිසිය නියෝග කරන ලදි.
ඒ අනුව දේහය පිළිබද පශ්චාත් මරණ පරික්ෂණය පැවැත් වු හම්බන්තොට මහ රෝහලේ අධිකරණ වෛද්ය නිළධාරී දිල්හානි අමරසිංහ විසින් මරණය සම්බන්ධයෙන් විවෘත තීන්දුවක් ලබා දී ඇත.
සිද්ධිය පිළිබදව තංගල්ල කොට්ඨාශභාර ජ්යෙෂ්ඨ පොලිස් අධිකාරී කේ.බී.කීර්තිරත්න, සුරියවැව පොලිසියේ ස්ථානාධිපති ප්රධාන පොලිස් පරීක්ෂක සුසන්ත කාර්යවසම් ගේ උපදෙස් පරිදි සූරියවැව පොලිසියේ අපරාධ අංශයේ නිලධාරීන් කණ්ඩායමක් වැඩිදුර පරික්ෂණ පවත්වයි.
