මනම්පිටිය නිමල් ජයරත්න –
පොළොන්නරුව සිරිපුර නගරයේ දැවැන්ත ගබඩාවක් පවත්වාගෙන යමින් ප්රමිතියෙන් තොර පොල් කුඩු බඳු බාල පොහොර තොග වැඩි මිලට පොලොන්නරුව ප්රදේශය පුරා බෙදා හරිනු ලැබු මහා පරිමාණ ජාවාරම් කරුගේ යැයි සැක කරන සැක සහිත වාහන තුනක් සොයා ගැනීමට හැකි වූ බව පොලොන්නරුව කොට්ඨාස අපරාධ විමර්ශන අංශය පවසයි.
ගබඩාව ආසන්නයේ ජාවාරම්කරුට අයත් ගෙවතු දෙකක න සඟවා තිබී මෙසේ හමුවන්නේ වෑන් රථයක්, , ජීප් රථයක් සහ ට්රැක්ටරයකි.
මීට අමතරව බාල පොහොර ඇසුරුම් කිරීම සඳහා ව්යාජ ලේබල් ගැසු විවිධ වර්ගයේ පොහොරමලු විශාල ප්රමාණයක් සොයා ගැනීමට හැකි වූ බව පොළොන්නරුව කොට්ඨාස අපරාධ විමර්ශන අංශය සඳහන් කළේය.
මේ ජාවාරම සම්බන්ධව සැලවූ වහාම නිවාස සංවර්ධන නියෝජ්ය අමාත්ය, ටී.බි සරත්, ජාතික ජන බලවේගයේ පොළොන්නරුව දිස්ත්රික් පාර්ලිමේන්තු මන්ත්රී සුනිල් රත්නසිරි, සහ පොළොන්නරුව දිස්ත්රික් ලේකම් සුජන්ත ඒකනායක ඇතුළු නිලධාරී කණ්ඩායමක් එම ගබඩා පරික්ෂාව පැමිණ තිබිණි. සඟවා තිබූ ව්යාජ ලේබල සහිත පොහොර මලු, විශාල ප්රමාණයක් පොලිසිය විසින් අනාවරණය කරගන්නේ මෙම නිලධාරීන් ඉදිරියේ දී ය.
අද (14 ) උදෑසන හොර පොහොර මධ්යස්ථානයේ කළමනාකාරවරයෙකු, එහි සේවකයින් එකොළොස් දෙනෙකු ඇතුළුව දොළොස් දෙනෙකු පොහොර ඇසුරුම් කරන ලද පොහොර මිටි 1566 ක් සහ ලොරි රථ හතරක්, ව්යාජ ලේබල් සැකසීමට යොදාගත් උපකරණ රැසක් සමග පොළොන්නරුව කොට්ඨාශ අපරාධ විමර්ශන අංශය මගින් අත්අඩංගුවට ගෙන තිබිණි.
ජාවාරම්කරු විසින් රුපියල් 5000 ක මිලකට ලබාගන්නා බාල පොහොර වලට ඇමෝනියම් සල්ෆේට් මිශ්ර කර සකසා එක් පොහොර මිටියක් 13,650 කට අලෙවිකර ඇති බවටද තොරතුරු අනාවරණය වී තිබේ.
මෙම ව්යාපාරිකයා එලෙස ඇසුරුම් කරන ලද හොර පොහොර දෙහිඅත්තකණ්ඩිය, වැලිකන්ද, අරලගංවිල, දියබෙදුම හිඟුරක්ගොඩ, සිරිපුර, ඇතුළු පොළොන්නරු දිස්ත්රික්කය පුරා බෙදා හැර ඇති බවද අනාවරණය කර ගැනීමට හැකියාව ලැබුණ බව පොලිසිය කියයි.
ඔහු විසින් බෙදාහරන ලද පොහොර භාවිතා කළ ගොවීන්ගේ වී වගාව සම්පූර්ණයෙන්ම කහ වී ඇති බවත්, අස්වැන්න අඩු වීමට එම පොහොර බලපා ඇති බවත් මූලික විමර්ශනවලදී අනාවරණය වෙමින් ඇත,
මේ අපරාධය කර ඇත්තේ ජාතික ආහාර සුරක්ෂිතභාවය සම්බන්ධ රටක් වශයෙන් සාමුහිකව ගෙන යන වැඩපිළිවෙළට බව අවධාරණය කළ නියෝජ්ය ඇමති ටී.බී සරත් මේ පිළිබඳ සියලුම විමර්ශන කටයුතු සිදුකර ව්යාපාරිකයාට විරුද්ධවත් සහ ඊට සම්බන්ධ පාර්ශවවලට විරුද්ධවත් උපරිම වශයෙන් නීතිය ක්රියාත්මක කරන ලෙස නිලධාරීන්ට උපදෙස් දුන්නේය.
සඟවා තිබූ ඇති සැකකටයුතු වාහන සම්බන්ධයෙන් වෙනම විධිමත් පරීක්ෂණයක් සිදුකර අවශ්ය නීතිමය කටයුතු කරන ලෙසත් නියෝජ්ය ඇමතිවරයා නිලධාරීන්ට දැන්වීය.
