මනම්පිටිය නිමල් ජයරත්න –
පොළොන්නරුව ඉසිපතන මාවතේ, වකුගඩු රෝහල පිටුපස ඇති අවන්හල් භූමියක පුරාවස්තු සෙවීමේ අරමුණින් කැණීම් සිදු කරමින් සිටි දඹුල්ල ප්රදේශයේ,පෞද්ගලික බැංකු කළමණාකාරවරයෙකු ඇතුළු පස්දෙනෙකු, පුරාවස්තු සෙවීමට යොදාගත් බැකෝ යන්ත්රයක්, කැණීම් කිරීමට යොදාගත් උපකරණ තොගයක්, වතාවත් කිරීමට ගෙනා පූජා භාණ්ඩ සහ ඔවුන් පැමිණි ඇති බව කියන රුපියල් කෝටි ගණනක් වටිනා වාහනත් සමග පොලොන්නරුව අපරාධ විමර්ශන අංශය විසින් අත් අඩංගුවට ගෙන තිබේ.
අත්අඩංගුවට ගත් සැකකරුවන් දඹුල්ල, ගිරිඋල්ල, මාකොළ, මහරගම, සියඹලන්ගමුව යන ප්රදේශවල පදිංචි අවුරුදු හතළිහත්, හැටත් අතර යන වයසේ පසු වන්නන් බව ඒ පිළිබඳ පරීක්ෂණ සිදුකරන පොළොන්නරුව කොට්ටාස අපරාධ විමර්ශන අංශයේ උප පොලිස් පරීක්ෂක ඒ.ටී.බණ්ඩාරඅප කළ විමසීමකදී සඳහන් කළේය.
පුරාවස්තු කැණීම් සිදුකළ ඉඩම ඔවුන් මීට වසර කිහිපයකට පෙර මුදලට ලබාගෙන තිබෙන බවත්, ඒ තුළ පිහිනුම් තටාකයක් හදන මුවාවෙන් කැණීම් සිදුකර තිබෙන බවත් පොලිසිය කියයි. ඒ සඳහා පුරාවිද්යා දෙපාර්තමේන්තුවෙන් අවසර ලබාගෙන ඇති බවට සැකකරුවන් ප්රකාශ කළද ඔවුන්ට ඊට කිසිදු ලියකියවිලි නොමැති බවද, පරීක්ෂණ පවත්වන පොළොන්නරුව කොට්ඨාස අපරාධ විමර්ශන අංශය සඳහන් කරයි.
කෙසේ වෙතත් ගිරිඋල්ල ප්රදේශයේ පදිංචි පූජාව සිදුකළ ගුරුන්නාන්සේ අත්අඩංගුවට ගැනීමෙන් අනතුරුව මේ නීති විරෝධී කැණීම ගැන සියලු තොරතුරු හෙළිකළ බව පොලිසිය සඳහන් කරයි.
පොළොන්නරුව ජ්යෙෂ්ඨ පොලිස් අධිකාරී නිශාන්ත සිල්වාගේ උපදෙස් පරිදි, පොළොන්නරුව කොට්ටාස අපරාධ විමර්ශන අංශයේ ස්ථානාධිපති ඒ.ටී.බණ්ඩාරගේ මෙහෙයවීමෙන්, පොලිස් සැරයන්, 42229 රංග,පොලිස් සැරයන් 71750 චින්තක, 68973 අතාවුද, පොලිස් කොස්තාපල් 84707 කුලතුංග, පොලිස් කොස්තාපල් 65610 සිල්වා, ඇතුළු පොලිස් නිලධාරීන් පිරිසක් මෙම වැටලීම සිදුකර ඇත.
අත්අඩංගුවට ගත් සැකකරුවන් පස්දෙනා ඇතුළු වාහන,අනෙකුත් උපකරණ 25 වෙනිදා පොළොන්නරුව මහේස්ත්රාත් අධිකරණයට ඉදිරිපත් කිරීමට නියමිතව ඇත.
