-
රටටත් ප්රශ්නයක් වන ලකුණු… පොලිසිය ප්රකාශයක්වත් සටහන් කරගෙන නෑ… ඔවුන්ට කිසිම චෝදනාවක් ගොනු කරන්නත් පොලිසිය අසමත් වෙලා… විවෘත අධිකරණයේ දී නීතිඥවරු මේ තත්ත්වය ප්රශ්න කරති!
අන්තර්ජාල පරිගණ මූල්ය වංචා කළැයි සැක පිට අත් අඩංගුවට ගෙන පසුගිය 12 වැනිදා රක්ෂිත බන්ධනාගාරගත කළ තායි චීන, වියට්නාම්, පිලිපීන තරුණයින් 130 දෙනා යළි ලබන 23 තෙක් රක්ෂිත බන්ධනාගාරගත කිරීමට තෙල්දෙණිය මහොස්ත්රාත් වරුණා කරල්ලියැද්ද අද (16) නියෝග කළාය.
විශේෂත්වය වන්නේ මහනුවර පොලිසිය විසින් බරපතල මෙහෙයුමකින් අනතුරුව අත් අඩංගුවට ගත් බව පවසන මෙම සිද්ධියට අදාලව පොලිසිය වෙනුවෙන් කරුණු දැක්වීම සඳහා නීතිඥවරුන් ඉදිරිපත් නොවීම සහ මේ වනතුරු අත් අඩංගුවට පත් එකම පුද්ගලයෙකුගෙන් හෝ ප්රකාශ ලබා ගැනීමට පොලිසිය කටයුතු කර නොතිබීමය.
විත්තියේ නීතීඥවරුන් මේ සම්බන්ධව ප්රශ්න කරන විට අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි පොලිස් නිලධාරියා ද නිරුත්තර වන අයුරු පෙනුනි.
මේ විමර්ශන අවුල හේතුවෙන් දණ්ඩනීති සංග්රයේ 400 යටතේ හෝ පරිගණක අපරාධ පනත යටතේ හෝ ඔට්ටු ඇල්ලිමේ පනත යටතේ හෝ අපරාධ විමර්ශන නිලධාරීන්ට සැක කරුවන් පිළිබඳ පැහැදිලි කරුණු දැක්වීමක් විවෘත අධිකරණය ඉදිරියේ ඉදිරිපත් කිරීමට හැකියාව නොතිබිණි.
මෙම සැලකිය යුතු අප්රකට හේතුව නිසා මෙම විජාතික සැක කරුවන් සඳහා නියෝග ලබා දීම ඔක්තොම්බර් 23 දිනට කල් තැබීමට අධිකරණයට සිදුව තිබේ. මේ තත්ත්වය තුළ බොහෝ විට මෙම අපරාධ චෝදනා ලද පුද්ගලයින්ට ඇප ලැබෙනු ඇතැයි නීති ක්ෂේත්රයේ විද්වත්හු පෙන්වා දෙති.
මේ අවස්ථාවේ දී විත්ති කරුවන් වෙනුවෙන් පෙනී සිටි ජනාධිපති නීතිඥ කාලිංග ඉන්දතිස්ස අමිත් පෙරේරා, චමල් ද අල්විස්, තාරක හීන්කෙන්ද, සංඛ අමරජිත්, ලක්ෂාන් උඩුගම ඇතුළු නීතිඥ මණ්ඩලය මුල් දිනයේ සේම නැවත අද දින විවෘත අධිකරණයේ කරුණු දක්වමින් කියා සිටියේ මෙම තරුණයින් අපරාධයක් සිදුකළ බවට මේ වනතුරු ද ලොව කොතැනකින් හෝ පැමිණිල්ලක් හෝ අනාවරණයක් හෝ වෙනත් සාධාරණ සාධයක් හමුවී නොමැති බවය.
තරුණයින් අතර ජංගම දුරකථන ඇතුළු උපාංග භාවිතය සරල සාමාන්ය දෙයක් බැවින් ඊට අදාලව චෝදනා නොමැතිව ඔවුන් අත් අඩංගුවට ගැනීම ශ්රි ලංකා නාමයට සහ සංචාරක ක්ෂේත්රයට දරුණු පහරක් එල්ල කරන සිද්ධියක් බව ද විවෘත අධිකරණයේ දී නීතිඥ මණ්ඩලය පෙන්වා දුන්හ.
ලබන 23 වැනිදා යළි නඩුව කැඳවීමට නියමිතය.
