ඊයේ (26) සවස කිරිඳිවැල පොලිස් අත්අඩංගුවේ දී මිය ගොස් ඇති තරුණයා මරණයට පත් වී ඇත්තේ දියේ ගිලීමෙන් බව අධිකරණ වෛද්ය පරීක්ෂණයේ දි හෙළි වී තිබේ.
ඔහුට පහර දීමකට අදාල සුලු තුවාල ඇති නමුත් එය මරණීය මට්ටමේ තුවාල නොවන බව ද එහි දී අනාවරණය වී ඇත.
වාර්තා වන පරිදි මෙම සිද්ධියට අදාල පසුබිම් කතාව මෙසේය.
කිරිඳිවැල නගරයට ආසන්නයේ රන් මාලයක් කඩාගෙන යන්නට උත්සාහ කළ මත්ද්රව්යවලට ඇබ්බැහි වූ තරුණයෙක් අවට සිටියවුන් විසින් අල්ලා පහර දී පොලිසියට භාර දී තිබේ.
පොලිසියේ අත්අඩංගුවට පත්වූ තරුණයාට පොලිස් නිලධාරීන් ද පහර දී ප්රශ්නකර ඇත. එහිදී ඔහුගෙන් අනාවරණය වූ කරුණු අනුව ඔහු සමග මාල කැඩීමට සම්බන්ධ තවත් පුද්ගලයෙකුගේ නිවස බලාගන්නට කිරිඳිවැල පොලිසියේ අපරාධ අංශයේ සාජන්වරයෙක් සහ කොස්තාපල්වරයෙක් සැකකරුවත් රැගෙන යතුරු පැදියකින් ගමන් කර තිබේ.
මෙම යතුරුපැදිය පුද්ගලික යතුරුපැදියකි. සැකකරුට මාංචු දමා හිස් ආවරණයක් ද රහිතව මැදින් තබාගෙන එක් පොලිස් නිලධාරියෙක් යතුරු පැදිය පදින අතර අනෙක් පොලිස් නිලධාරියා සැකකරුට පිටුපසින් ඉඳගෙන ගමන් කර ඇත.
මෙසේ තිදෙනෙක් සහිතව යන අතර අන්ධකාරයේ පාලම් බෝක්කුවක් අසල දී යතුරුපැදිය පාලනයෙන් මිදී බෝක්කුවෙන් පහළට පෙරළී ඇත. අසීරුවෙන් පොලිස් නිලධාරීන් දෙදෙනා ගොඩ පැමිණියත් මාංචු පිට සිටි සැකකරු දියේ ගිලී මියගොස් තිබේ.
අනාවරණය වී ඇති තොරතුරු මෙසේ වුව ද මේ සිද්ධිය සම්බන්ධව දීර්ඝ විමර්ශනයක් ආරම්භ වී ඇත. අත්අඩංගුවේ සිටින සැකකරුවෙකුට කෘෘර ලෙස සැලකීම, අනාරක්ෂිතව ඔහු රැගෙන යෑම, පුද්ගලික වාහනයක නියමිත රථ වාහන නීති උල්ලංඝණය කරමින් ගොස් ජීවිත හානියක් සිදුකිරීම සම්බන්ධව දැනටමත් පොලිස් නිලධාරීන් දෙදෙනාට චෝදනා එල්ල වී ඇත.
මේ වනවිට ඔවුනගේ වැඩ තහනම් කර විධිමත් පරීක්ෂණයක් ආරම්භ කර ඇතැයි පොලිස් දෙපාර්තමේන්තු ආරංචි මාර්ග කියයි.
