වසර ගණනක් තිස්සේ සිදුවූ ඝාතන දාමයක් පස්පොඩ්ඩා ඝාතනයෙන් පසු වඩාත් වේගයෙන් සිදුවනු ඇති බවට අපරාධ විමර්ශන අංශවලට තොරතුරු ලැබී තිබේ.
සංකීර්ණ තත්ත්වය වී ඇත්තේ මේ ඝාතන කවුරුන් ඉලක්ක කරගෙන සිදුවනු ඇතිදැයි නිශ්චිතව නිගමනය කරගැනීමට නොහැකි තත්ත්වයක් ඇති වී තිබීමය.
දැනට වාර්තාවන පරිදි මෙ සිද්ධි පෙළ ගැසෙන්නේ මෙසේය. මේ ඝාතන වැල ආරම්භ වන්නේ කෙහෙල්බද්දර සමන් රෝහිත පෙරේරා හෙවත් පස්පොඩ්ඩා සහ කෙහෙල්බද්දරම ජීවත් වූ පද්මේ නැමැත්තෙක් අතරය.
මෑත සිද්ධියට අදාල මේ මරාගැනීම් වැල පටන් ගන්නේ පස්පොඩ්ඩාගේ කිට්ටුම ගෝලයා ලෙස කටයුතු කළ චමියා පස්පොඩ්ඩාගේ ඉඩම් ගනුදෙනුවකට මැදිහත් වීමට ගොස් පද්මේ විසින් ඝාතනය කිරීමත් සමගය. ඉඩම් ගනුදෙනුව සිදුවන්නේ පද්මේ ගේ පියාවන නෙවිල් නැමැත්තා සමගය.
එහි පලිය ගන්නට පස්පොඩ්ඩා කුලී ඝාතකයින් පද්මේ ගේ නිවසට එවන්නේය. පද්මේ සිද්ධිය ඉව වැටී පලා යන්නේය. ඝතකයන් නිවසේ සිටි පද්මේ ගේ පියා නෙවිල් ඝාතනය කර පලා යන්නේය.
මේ සිද්ධියත් සමග ලංකාවෙන් පලා යන පද්මේ රැඳෙන්නේ ඩුබායිවලය. ඔහු ඩුබායිහි සිට ඝාතකයින් මෙහෙයවා පස්පොඩ්ඩා මරා දමන්නේය. ඒ ජූලි මස 27 වැනිදා ය. අනතුරුව ඝාතකයින් දෙදෙනා පසුගිය 02 දා පද්මේ විසින් ඩුබායි වෙත ගෙන්වා ගන්නේය.
පස්පොඩ්ඩාගේ ජීවිත ආරක්ෂාව තහවුරු කර ප්රකාශයක් නිකුත් කර තිබුණේ මාකිලංගමුවේ සංජීව විසිනි. ඔහු කියා තිබුණේ පස්පොඩ්ඩා සිටින්නේ තමන්ගේ රැකවරණය යටතේ බවය. එහෙත් ඒ රැකවරණය මායිම් නොකර පද්මේ විසින් පස්පොඩ්ඩාට එල්ල කළ ප්රහාරය නිසා තමන්ගේ බලයට තදබල ලෙස අභියෝග කර ඇති පද්මේගේ ගෑවුන අයෙක් හෝ ඉතිරි නොකරන බවට කරන ලද ප්රකාශට උත්තර ප්රති උත්තර ලබා දෙමින් මේ ඝාතන වැල ආරම්භ වී ඇති බව විමර්ශන අංශ කියයි.
ඒ අනුව කෙහෙල් බද්දර කොණ්ඩා සැකසුම් ස්ථානයේ වැරදී ගිය ඝාතනය ඉලක්ක කර ඇත්තේ එම ආයතනය හිමිකාර පද්මේ ගේ ඥාතියෙකි. නමුත් සිද්ධිය පිළිබඳ යම් ඉවක් සමග එම තරුණයා එතැනින් ඉවත් වී වෙනත් තරුණයෙක් යොදවා ආයතනය පවත්වාගෙන ගොස් තිබේ. අසරණ තරුණයා පාතාලයේ ගොදුරක් වන්නේ එසේය.
ඉන් අනතුරුව අගෝස්තු 24 වැනිදා ගම්පහ බටපොත කුරුස හන්දියේ දී ගොඩනැගිලි උපකරණ හිමිකරුවෙක් ඝාතනය වන්නේය. ඒ ඔහුගේ වෙළෙඳසල ඉදිරිපිටදීය. ඔහු පස්පොඩ්ඩාගේ ඥාතියෙකි.
තමන්ගේ ඥාතියා ඉලක්ක කරගෙන කෙහෙල්බද්දර කොණ්ඩාසැකසුම් ස්ථානය වෙත එල්ල කළ ප්රහාරයට කෙහෙල්බද්දර පද්මේ ප්රතිඋත්තර ලබා දී ඇතැයි විමර්ශන අංශවලට තොරතුරු ලැබී ඇත්තේය.
මේ වනවිට කොණ්ඩා සැකසුම් මධ්යස්ථානයේ තරුණයා ඝාතනය කිරීමේ සිද්ධියට පහසුකම් සැලසූ බව කියන කාන්තාවක් හා පුද්ගලයෙක් අත්අඩංගුවට ගෙන ඇත. එම කාන්තාව මෙම ඝාතන වැලේ ආරම්භක ගොදුර වූ චමියාගේ බිරිය ය. ඇය දැන් ජීවත්වන්නෙ චමියාගේ හොඳම ගෝලයා සමගය. අත්අඩංගුවටගත් පුද්ගලයා එම කාන්තාව සමග ජීවත්වන චමියගේ ගෝලයාය.
හෙට වනවිට තව කොතැනක ඝාතනයක් සිදුවේ දැයි අවිනිශ්චිතය. මාකිලංගමුව සංජීව යනු පාතාලයට කුලී ඝාතකයන් සහ ගිනි අවි සපයන්නෙකි. ඔහු රටේ නැත. එසේම කෙහෙල්බද්දර පද්මේත් ලංකාවේ නැත. ඔහුත් කුලී ඝාතකයින් යොදාගෙන ඝාතනවලින්ම ප්රතිඋත්තර දෙමින් යන්නේය. එහි කෙළවරක් නැත.
මේ අපරාධ රැල්ල නවත්වා ගැනීමට විමර්ශන අංශ දැඩි උත්සාහයක නිරතවන බව පොලිස් ආරංචි මාර්ග පවසයි.
