පුතුට වෙඩි වැදුණු ආරංචියෙන්ම මෙලොව හැර ගිය අම්මා…

ලලිත් චාමින්ද –

රත්ගම පන්විල නවජනපදයේ පදිංචි ගොඩහේන කන්කානම්ගේ රත්නාවති සිව්දරුමවකි. ඇය 72 හැවිරිදිවියේ පසුවුවාය. ඇයගේ සැමියා මිට වසර 10කට පෙර මියගොස් තිබුණි. මෙකි මව තම බාල පුතුගේ නිවසේ පදිංචිව සිටියාය.

පුතු එතරම් හොඳ අයෙකු නොවේ. හේ සමාජ විරෝධී කටයුතුවල නිරතව සිටි අකිකරු පුතෙකි. එහෙත් මව තම පුතුට දැඩිව ආදරය කළාය. පුතුද මවට දැක්වුයේ දැඩි ආදරයකි. සෙනෙහසකි. මව මිට වසර දෙකකට පමණ ඉහතදි වු ඇද වැටිම නිසා පාදයක් බිදිගොස් තිබු මව එක්තැන්ව සිටියාය. ඇයගේ දෑස් පෙනිම ද දුර්වලව පැවතුණි. ඕ මිට සති තුනක පමණ සිට ආහාර ගනු ලැබුවේ ඉතා අඩුවෙනි. එහෙත් පුතු මවගේ සියලු කටයුතු සොයා බැලීය. එක්තැන්ව සිටි මව කවා පොවා පිරිසිදුකොට රැක බලාගත්තේ පුතාය. දරුවකුගෙන් මවකට ඉටුවිය යුතු සියලු යුතුකම් හා වගකිම් හේ නොපිරිහෙලා ඉටු කළේය.

පුතා මවට කෙතරම් ආදරය සෙනෙහස දැක්වුවද හේ සමාජයට කලු චරිතයකි. මොහු කුපියා නැමති අනවර්ත නාමයෙන් හැඳින්වුනේය. දරුවන් තිදෙනෙකුගේ පියෙකු වු මොහු ප්‍රදේශයේ චන්ඩියෙකි. මොහුට විරුද්ධව කිසිවෙක් කටක් හෙල්ලුවේ නැත. සමාජවිරෝධි කටයුතුවල නිරතව සිටි ඔහුට ගෝලබාලයින් පිරිසක්ද විය. මොහු තම ගෝලබාලයින් සමග එක්වි බුරුවා ගැසිමේ කටයුතුවල නිරතව සිටියේය. කුපියා සමග තවත් පිරිසක් බද්ධ වෛරයෙන් පසුවුහ. එම කල්ලිය සිටියේ කුපියාට වැඩක් දෙන්නට අවස්ථාවක් එනතෙක් ඇගිලි ගනිමිනි.

දිනය ඉකුත් 05 වැනිදාය. වෙලාව රාත්‍රි 8.15ට පමණ වන්නට ඇත. සංචරණ සීමා පනවා තිබුණු බව සැබෑය. එහෙත් කුපියා තම නිවසින් පිටතට පැමිණ සිටියේය. ඒ වනවිට මෙම ප්‍රදේශයට ධාරාණිපාත වර්ෂාවක් පැවතිනි. වර්ෂාව පායන තෙක් සිටි කුපියා මිතුරෙකුගේ යතුරුපැදියේ නැගී තම නිවෙස වෙත ගමන් කරමින් සිටියේය.

මේ අතර ඔහු එනතෙක් ඔහුගේ විරුද්ධවාදින් දෙදෙනෙකු මාර්ගය අසල සැගවි සිටියහ. ප්‍රදේශය පුරා පැවතියේ ඝණ අන්ධකාරයෙකි. මගරැක සිටි පුද්ගලයින් දෙදෙනා ගිනි අවියකින් කුපියාට වෙඩි තැබිය. එහෙත් ඔවුන්ගේ ඉලක්කය වැරදුණි. කුපියාගේ වම උරහිසට වෙඩි වැදි තිබු අතර ඔහු ගාල්ල කරාපිටිය ශික්ෂණ රෝහලට ඇතළත් කරනු ලැබිය.

කුප්පියාට වෙඩි වැදි ඇති ආරංචිය පවුලේ අයටද ඒ වනවිට ආරංචි වි තිබුණි. ආරංචිය මවගේ කණට වැටිමට වැඩිවෙලාවක් ගියේ නැත. සිද්ධිය කණ වැටුණු විගස මව කලබලයට පත්වුවාය. තම පුතුට දැඩිලෙස ආදරය කළ මවට පුතුට වු වෙඩිතැබිම දරාගත නොහැකි විය. වෙඩිවැදීම සැලවීමත් සමග දැඩි කම්පනයට පත්ව සිටි මව ඉන් සුළු වෙලාවකින් මියගියාය.

මවගේ හදිසි මරණ පරික්ෂණය රත්ගම හදිසි මරණ පරික්ෂක වයි.එම් සාගරිකා නිල්මිණි විසින් සිදුකරනු ලැබිය. එහිදි මියගිය තැනැත්තියගේ දියණියක්වන සමරක්කොඩි ශ්‍රියාණි මංගලිකා පොඩිමැණිකේ (42). නැමැත්තිය සාක්ෂි දෙමින් මෙසේ කිවාය.

“ මිය ගොස් ඇත්තේ මගේ මව. තාත්තා මිට වසර 10ක පෙර මියගියා. අපේ පවුලේ සහෝදර සහෝදරියන් 04 දෙනෙකු ඉන්නවා. අක්කයි අයියයි මල්ලි හා මම. අපි හතරදෙනාම විවාහකයි. අම්මා මහගෙදර මල්ලි සමග ඉන්නවා. අම්මාට සායනවලට සම්බන්ධ වි ප්‍රථිකාර ගැනිමට තරම් ලෙඩක් තිබුණේ නැහැ. මිට වසර දෙකකට පෙර අම්මා වැටිලා කකුල කැඩිලා එකතැන්වෙලා හිටියා. අම්මා දැනට සති තුනක පමණ සිට කෑම ගත්තේ අඩුවෙන්. දියර වර්ග පමණයි පාවිච්චි කළේ. රාත්‍රි 8.00ට විතර මල්ලිට වෙඩි තියලා කියලා ආරංචියක් ආවා. ඒ ආරංචියත් සමග අම්මා ටිකක් කලබල වුනා. මම හා නෑනා මල්ලි බලන්න ගාල්ල කරාපිටිය රෝහලට ගියා. රෝහලේ සිටියදි මව නැතිවු බව මගේ දුව දුරකථන ඇමතුමක් ලබාදෙමින් දැනුම දුන්නා. “ ඇය කිවාය.

මියගිය තැනැත්තියගේ පශ්චාත් මරණ පරික්ෂණ ගාල්ල කරාපිටිය ශික්ෂණ රෝහලේ විශේෂඥ අධිකරණ වෛද්‍ය නිලධාරි රෝහාන් රුවන්පුර විසින් කළ අතර ඉදිරිපත් වු සාක්ෂි හා වෛද්‍ය වාර්තා සැලකිල්ලට ගත් හදිසි මරණ පරික්ෂකවරිය හදිසියේ ඇතිවු හෘදයාබාධයකින් ඇය මියගොස් ඇති බවට තින්දු කළාය.

වෙඩි වැදිමෙන් තුවාල ලැබු කුපියාගේ වම් උරහිසේ තිබු පතොරම් කැබලි 06ක් ගාල්ල කරාපිටිය ශික්ෂණ රෝහලේ දි කළ සැත්කමකදී ඉවත් කරනු ලැබිය. වෙඩි වැදී තුවාල ලැබු පුද්ගලයා 36 හැවිරිදි වියේ පසුවන තිදරුපියෙකි. මනුෂ්‍ය ඝාතන 03ක් සම්බන්දයෙන් මොහුට එරෙහිව මහාධිකරණයේ නඩු පවතින බව රත්ගම පොලිසිය පවසයි. මෙම වෙඩි වැදිමේ සිද්ධියට සම්බන්ධ පුද්ගලයින් දෙදෙනෙකු සැකපිට රත්ගම පොලිසිය මගින් අත්අඩංගුවට ගෙන ඇත. සැකකරුවන් දෙදෙනා බුස්ස පිටිවැල්ල ප්‍රදේශයේ පදිංචිකරුවන් දෙදෙනෙකි. ඔවුහු 55 හා 25 හැවිරිදිවියේ පසුවන අය වෙති. දෙපිරිස අතර කාලයක සිට පවතින පරණ කොන්තරයක් හේතුවෙන් මෙම වැඩි තැබිම සිදුකොට ඇති බවද පොලිසිය පවසයි.

අත්අඩංගුවට ගත් සැකකරුවන් දෙදෙනාට එරෙහිව ද 2019 වර්ෂයේ දි වු මනුෂ්‍ය ඝාතනයක් සම්බන්ධයෙන් මහාධිකරණයේ නඩුවක් විභාගවෙමින් පවතින බව ද රත්ගම පොලිසිය පවසයි. එමෙන්ම වෙඩි වැදීම සම්බන්දයෙන් ගිසි අවි ලැබි ඇති ආකරය හා ඔත්තු ලබා දුන් පුද්ගලයින් පිළිබඳ දුරකථන විශ්ලේෂණ වාර්තා ලබාගෙන විමර්ශන සිදුකරන බව පොලිසිය පවසයි.

රත්ගම පොලිසියේ ස්ථානාධිපති ප්‍රධාන පොලිස් පරික්ෂක ප්‍රභාත් විතාන ගේ උපදෙස් මත අපරාධ අංශයේ ස්ථානාධිපති උප පොලිස් පරික්ෂක පි.එල්.ඩි ගයාන් පුෂ්පකුමාර පො සැ 13413 ප්‍රියන්ත, පො සැ 3011 රංග, පො කො 66651 දළුගොඩ, පො කො36132 තිලිණ, පො කො 90377 විතාරණ යන නිලධාරින් විසින් පරික්ෂණ පවත්වති.