පාස්කු ප්රහාරය පිළිබඳව සිදුකළ යුතුව ඇත්තේ රජය විසින් රජයේ ඇතුළාන්තය පිළිබඳව කරන දුෂ්කර විමර්ශනයක් බවත් කාලයේ වැලිතලාවෙන් යටපත්වීමට ඉඩ නොතබා පාස්කු ප්රහාරයේ වින්දිතයින්ට සාධාරණය ඉටු කිරීමට ගත හැකි සෑම පියවරක්ම ගන්නා බවත් ජනාධිපති අනුර කුමාර දිසානායක යලිත් වරක් සහතික වුනේය.
ජනාධිපතිවරයා මේ ප්රකාශය කළේ, කොළඹ අගරදගුරු අතිඋතුම් මැල්කම් කාදිනල් රංජිත් හිමිපාණන්ගේ පූජක දිවියට වසර 50ක් පිරීම නිමිත්තෙන් කොළඹ අගරදගුරු පදවිය විසින් ඊයේ (07) පස්වරුවේ කොළඹ අගරදගුරු නිවසේ සංවිධානය කරන ලද උපහාර උත්සවය අමතමිනි.
ජනාධිපතිවරයා මෙසේ කීවේය. ” උන් වහන්සේ ඉතාම කැකෑරෙන වේදනාවකින් ඉන්න බව මා දන්නවා… පාස්කු ප්රහාරයේ වින්දිතයින්ට සාධාරණය ඉටු කිරීම පිළිබඳ කැකෑරෙන වේදනාවකින් උන්වහන්සේ ඉන්න බව මා දන්නවා. මේ සියල්ල කතා බහ කරන අතර උන්වහන්සේ මේ වින්දියන්ට ඉටු විය යුතු සාධාරණය ගැන අපෙන් විමසනවා. විටෙක සාමකාමීව… විටෙක අපැහැදිලිතාවයෙන් යුතුව… විටෙක බලපෑම් සහගතව… මා අවංකව කියන්නේ… විමසනවා. ඒ තුළ තියෙන්නේ අන් කවරක්වත් නොවෙයි… පාස්කු ප්රහාරයේ වින්දිතයින්ට සාධාරණ ඉටු කරගැනීමේ උවමනාව.”
” මා ඒ පිලිබඳව කාලයේ වැලිතලාවෙන් යට වෙන්න ඉඩ නොදී සාධාරණය ඉටු කරගැනීම සඳහා ගත හැකි හැම වෙහෙසක්ම ගන්නා බව උන්වහන්සේ ඉදිරිපිට මා මේ වෙලාවේ ප්රකාශ කරන්න කැමතියි. ”
” මා දන්නවා මේක අභියෝගාත්මක කරුණක්. සමහරවිට රජය රජයෙන් පරිබාහිර පාර්ශවයන් පිළිබඳ විමර්ශනය කරනවා. එය කළ හැකියි. නමුත් රජය රජය තුළම කරන විමර්ශනය මොනතරම් දුෂ්කර ද කියලා අප තේරුම් ගත යුතුයි. රජය විසින් රජය පරීක්ෂාවට භාජනය කළ යුතුව තිබෙනවා. කොතන ද අපි හිරවෙලා තියෙන්නේ. ”
” දුෂ්කරයි… ඒත් සාධාරණය ඉටු කළ යුතුයි. බොහෝ පරීක්ෂණ අපේ රටේ දියත් වෙලා තියනවා රජය විසින් බාහිර පාර්ශවයන් කෙරෙහි කරන විමර්ශන. අද අපට විමර්ශනයක් තියනවා රජය විසින් රජයේ ඇතුලාන්තය කෙරෙි කරන විමර්ශනය. තේරුම් ගන්න. රජය රජයත් එක්ක ගැටීමකට රජය රජය තුළ විමර්ශනයක් දියත් කිරීමේ අභියෝගය අපට තියනවා.”
” කළ යුතුයි. අප එය කරනවා..”
ජනාධිපතිවරයා එම උළෙල අමතමින් ප්රකාශ කළේ පිරිහී ගිය සමාජයට යළි මනුෂ්යත්වයේ ජීවය සහ අධ්යාත්මික ගුණය කැටුව ඒමේදී අතිඋතුම් මැල්කම් කාදිනල් රංජිත් හිමිපාණන්ගේ චරිතය පරමාදර්ශයක් බවය.
සමාජයේ යහපැවැත්ම සහ අධ්යාත්මය ගොඩනැඟීමට වෙහෙසකර ව්යායාමයක නිරත වන උන්වහන්සේ, විශාල මෙහෙයක් ඉටු කරන රාජ්යතාන්ත්රිකයකු, බයිබලය ඉතා හොඳින් විවරණය කරමින් කරුණු ඉදිරිපත් කළ හැකි ධර්ම ගවේෂකයකු, සමාජය අවදි කළ හැකි ශක්තිමත් පෞරුෂයක් හිමි ගෞරවනීය කථිකයකු වන අතරම, එම භූමිකාවලින්ද ඔබ්බට ගිය සැබෑ මානව හිතවාදියකුද වන බව ජනාධිපතිවරයා පැවසීය.
ජනාධිපතිවරයා පැවසුවේ සංකීර්ණ අවස්ථාවලදී උන්වහන්සේ ගේ නීවී යන ගුණය අතිශය දුර්ලභ මානව ගුණයක් බවත් පාස්කු ප්රහාරය අවස්ථාවේ උන්වහන්සේ ප්රකට කළ ඒ උතුම් ගුණය නොවන්නට මේ සමාජය මහා ව්යසනයකට පත් වන බවත්ය. එවැනි ව්යසනයක් වැලැක්වූ කාදිනල් හිමිපාණන් වහන්සේට මේ සමාජයම ණයගැති බව ජනාධිපතිවරයා කීවේය.
පහත දැක්වෙන්නේ ජනාධිපතිවරයා එම අවස්ථාවේ කළ කථාවය.
