කීර්ති ප්රනාන්දු –
පාස්කු ඉරිදා බෝම්බ ප්රහාරයට අවුරුදු 04ක් සම්පූර්ණවන අප්රේල් 21 වැනි සිකුරාදා එම ම්ලේච්ඡ ප්රහාරයට වගකිව යුතු අපරාධකරුවන් නීතිය ඉදිරියට පමුණුවා සත්ය හා යුක්තිය ඉටු කරන ලෙස ඉල්ලා ශක්තිමත් ජන පවුරක් නිර්මාණය කිරීමට ජාති ආගම් භේදවලින් තොරව එක්වන ලෙස මැල්කම් කාදිල් රන්ජිත් හිමිපාණෝ ජාතියෙන් ඉල්ලා සිටිති.
මිනිසුන් 272ක් ඝාතනය වී තවත් පුද්ගලයින් 500කගේ ජීවිත අඳුරට වැටුන මේ මහා අපරාධය පසුපස වළලන්නට හදන සත්ය හෙලි කරගැනීමට වසර හතරක් තිස්සේ බැරිවී ඇත්තේ මෙම ඝාතනය පසුපස දේශපාලන කුමන්ත්රණයක් ඇති නිසා යැයි ද යහපාලන රජය විසින් පත්කළ පාර්ලිමේන්තු තේරීම් කාරක සභාවේ විධායක සාරාංශයෙත් එය දක්වා තිබෙන්නේ යැයි ද කාදිනල් හිමිපාණෝ පැවසූහ. හිටපු නීතිපතිවරයා විසින් ද මෙම ප්රහාරය පසුපස බරපතල කුමන්ත්රණයක් තිබුණු බව ප්රකාශ කර ඇතැයි උන්වහන්සේ පෙන්වා දුන්හ.
මේ ප්රහාරය පසුපස දේශපාලන කුමන්ත්රණයක් පවතින බව තමන් ද විශ්වාස කරන බව කී කාදිනල්තුමෝ හිටපු ජනාධිපතිවරු මෙන්ම වත්මන් ජනාධිපතිවරයා ද එම අපරාධකරුවන් මිනීමරුවන් ආරක්ෂා කරන බව කිහ.
දේශපාලන බලය වෙනුවෙන් කරන පාස්කු ප්රහාරය වැනි අපරාධ සම්බන්ධව නීතිය ක්රියාත්මක වීම රටක් ලෙස ඉතා වැදගත් බවත්, එසේ නොකළහොත් මෙය නරක පූර්වාදර්ශයක් වනු ඇති බවත් කාදිනල් තුමෝ පැවසූහ.
“ මේ අපරාධකාරී දේශපාලකයින්ගේ උපක්රමය වුනේ කාලයේ වැලිතලාවට යට කර මේ අපරාධ යටපත් කර අමතකවන්න හැරීම. ඒ සඳහා අප සූදානම් නෑ. යුක්තිය ඉටුවනතුරු අප මේ සටන ගෙනියනවා.”
“ පාස්කු ඉරිදා ප්රහාරයට වසර 4ක් පිරෙන දා අපි ජන පවුරක් හදන්නේ ඒ නිසා. මේ ජන පවුර අපි හදන්නෙ උදේ 8 සිට 09 දක්වා කොච්චිකඩේ ශාන්ත අන්තෝනි දේවස්ථානයේ සිට කටුවාපිටිය ශාන්ත අන්තෝනි දේවස්ථානය දක්වා මීගමුව කොළඹ මහා මාර්ගයේ….
අපි සියලු දෙනාගෙන් කාරුණිකව ඉල්ලා සිටිනවා රටට ආදරය කරන, නීතියේ ආධිපත්ය රට තුළ රජකම් කළ යුතුයි කියලා හිතන, කුමන්ත්රණකරුවන් සහ දූෂිතයින් පරාජය කළ යුතුයි කියලා හිතන, සෑම පුරවැසියෙක්ම එදාට අපිත් එක්ක එකතු වෙන්න කියලා.
කුමණ ආගමක් ඇදහුවත්, කුමණ භාෂාවක් කතා කළත්, කුමණ ජාතියකට අයත් වුනත් ප්රශ්නයක් නෑ. කුමණ පක්ෂයකට අයත් උනත් ප්රශ්නයක් නෑ. මේ රටට ආදරය කරන පුරවැසියන් හැටියට එදාට අපි එකතු වෙමු. එදාට මේ ජන පවුර හදමු මීගමුව කොළඹ පාර දෙපැත්තේ…”
“පාර දෙපස පාරේ ගමන් කරන පුද්ගලයින්ට හෝ වාහනවලට බාධාවක් නොවන ආකාරයෙන් අප පාර දෙපස හිටගෙන ඉන්නවා පමණයි. 8.45ට නිශ්ශබ්දතාවය ආරක්ෂා කරන්න කටයුතු කරනවා.”
“එතන්නි පස්සේ 9ට ඉවර වුනාම ආගමික මෙහෙයන් පවත්වනවා. කොච්චිකඩේ ශාන්ත අන්තෝනි දේවස්ථානයේ විශේෂ ජන හමුවක් පවත්වනවා ඊට පස්සේ.”
මේ කටයුත්තට දායක වෙන්න කියලා හැම පුරවැසියෙකුගෙන්ම ඉල්ලනවා.
කාර්යාල කම්හල්වල වැඩ බිමිවල් ඉන්න සියලු දෙනාගෙන්ම අපි ඉල්ලා සිටින්නෙත් 8.45ට විනාඩි දෙකේ නිශ්ශබ්දතාවය තමන් ඉන්න තැනම සිට අනුගමන කරන්න කියලා.”
කාදිනල් හිමියෝ ඉල්ලා සිටියහ.
