දිනසේන රතුගමගේ –
මුලතිව් පුදුකුඩීඉරිප්පු ප්රාදේශීය ලේකම්වරයාගේ නිල නිවසේ තිබී ඉන්ධන ලීටර් 235 ක් අත් අඩංගුවට ගැනීමේ සිද්ධියට සම්බන්ධ පොලිස් නිලධාරියාට විනයානූකූලව කටයුතු කරන ලෙස ඉල්ලමින් උතුරු පළාත් පරිපාලන සේවා නිලධාරීන්ගේ සංගමය මුලතිව් දිස්ත්රික් ලේකම් කාර්යාලය ඉදිරිපිට ඊයේ ( 6 ) විරෝධතවයක් ආරම්භ කොට තිබුණි.
එම සංගමය පවසන්නේ ප්රාදේශීය ලේකම්වරයාගේ නිවසේ තබා තිබුණේ රජයේ අනුමත ලෙස නිකුත් කළ හදිසි අවශ්යතා සඳහා ප්රයෝජනයට ගැනීමට නියමිතව වෙන් කොට තිබූ ඉන්ධන ප්රමාණයක් බවත් ඒවා අත් අඩංගුවට ගැනීමට පැමිණි පොලිස් නිලධාරීන් අධිකරණ නියෝගයක් ලබා නොගෙන බලහත්කාරයෙන් ප්රාදේශීය ලේකම්වරයාගේ නිල නිවසට ඇතුලු වී ඇති බවත්ය.
මෙය නීති විරෝධී බැවින් අත් අඩංගුවට ගැනීම සිදු කළ පොලිස් නිලධාරීන්ට එරෙහිව විනයානුකූල පරීක්ෂණයක් පවත්වන ලෙස බල කරමින් මේ විරෝධතාවය පැවති අතර එම ඉල්ලීම ඇතුළත් ලිපියක් ජනාධිපති ලේකම් කාරයාලයට හා තවත් ස්ථාන කීපයකටම යවා තිබේ.
මේ අතර මෙම සිද්ධියට විරෝධය පලකරමින් උතුරේ පරිපාලන සේවා නිලධාරීන් 8 වෙනි සඳුදා අසනීප නිවාඩු වාර්තා කිරීමටත් මුලතිව් දිස්ත්රික් ලේකම් කාර්යාලය ඉදිරිපිට දැවැන්ත විරෝධතාවයක් පැවැත්වීමටත් කටයුතු සංවිධානය කොට තිබේ.
