මාස තුනකට ලක්ෂ අසූ පහකට අධික පාඩුවක් ලැබූ නිසා සිටි බස් සේවාව සඳහා එම බස් රථ සැපයූ පුද්ගලික සමාගමෙන් බස් ලබා ගැනීමට අදාල ගිවිසුම දීර්ඝ නොකිරීමට තීන්දු කිරීම නිසා ඇමතිවරයා තමන් ලංගම සභාපති ධූරයෙන් ඉවත් කළ බව ලංගම හිටපු සභාපති නීතිඥ කිංස්ලි රණවක පවසයි.
ඔහු පවසන්නේ ඇමතිවරයා පවසන ආකාරයෙන් මිස සිටි බස් සේවාව නවත්වා දැමීමට තමන් කිසිසේත් කටයුතු නොකළ බවය.
හිරු පුවත් සේවය සමග සාකච්ඡාවට සහභාගී වෙමින් හිටපු සභාපතිවරයා පැවසුවේ ඇමති බන්දුල ගුණවර්ධන මුලුමනින්ම කරුණු වරදවා තේරුම් අරන් ඇති ආකාරය ය.
හිටපු සභාපතිවරයා මෙසේ කීවේය.
“ සිටි බස් සේවාව නවත්වන්න මොනම වෙලාවක හෝ මා තීරණය කරලා නෑ . එතන වැරදීමක් සිද්ධ වෙලා තියනවා ගරු අමාත්ය තුමන්ට. “
“ සිටි බස් සේවාව සඳහා යෙදවූ මෙම එක් බස් රථයකට මාසෙකට දෙලක්ෂ හැත්තෑපන්දහස ගානෙ මාසෙකට ගෙවන්න පොරොන්දු වෙලා තිබුණා. බස් රථ සඳහා කුලිය පමණක් මාසෙකට ලක්ෂ තිස් තුනක්. අධ්යක්ෂ මණ්ඩල අනුමැතියක් නැතිව මාසෙකට ලක්ෂ තිස් තුනක් පුද්ගලික ආයතනයකට ගෙවන්න ලංගමට හැකියාවක් නෑ..
බස් රථවලට එම මුදල අනුමත කරගන්න අධ්යක්ෂ මණ්ඩලය ලඟට ගියාම අධ්යක්ෂ මණ්ඩලය බැලුවා මේ බස් රථ සේවාවෙ ලාභ අලාභ කොහොමද කියලා. ගණන් බලනකොට මාස තුනටම ආදායම ලක්ෂ 43යි. ඩිසල්වලට විතරක් ගිහින් තියනවා ලක්ෂ හතලිස් දෙකක්.
හම්බවෙච්ච ගාන ඩීසල් ගහන්නත් මදි.
මාස තුනට ලක්ෂ හැට ගානක් දීලා තියනවා ඔය කියන සමාගමට. මාස තුන සඳහා බැලුවාම සමස්ථ පාඩුව රු පියල් ලක්ෂ අසූ පහක්.
මේක බරපතල මූල්ය ප්රශ්නයක්. අපිට විගණනයට පිළිතුරු දෙන්න වෙනවා. අන්තිමට කෝප් කමිටුව දක්වා මේක යනවා. ඒ නිසා අධ්යක්ෂ මණ්ඩලය තින්දු කළා මේ බස් සේවාවෙ පාඩුව අවමයක් කරගැනීම සඳහා මේ පෞද්ගලික ආයතනයෙන් බස් රථ ගැනීම නවත්වන්න. ඉන් හැඟෙන්නෙ නැ මේ ව්යාපෘතිය නතර කරනවා කියන එක.“
“අමාත්යවරයා කියා ඇති ආකාරයට ව්යාපෘතිය නවත්වලා නෑ. එතුමා මට ඉල්ලා අස්වෙන්න කියලා ලියුම එවනකොට අධ්යක්ෂ මණ්ඩලයේ තීන්දු ටිකවත් එළියට දාලා නෑ. අධ්යක්ෂ මණ්ඩලයෙ සභාපතිවරයා ලෙස මට තියෙන්නෙ ඡන්ද එකයි. ඇමතිවරයා පත් කළ ඡන්ද තුනක් තියනවා. මේ තීන්දුව ගත්තේ අධ්යක්ෂ මණ්ඩලයෙන්. එසේ නම් අධ්යක්ෂ මණ්ඩලයම ඉල්ලා අස් විය යුතුයි. “
“ සභාපති වරු මිලියන ගණන් ගිවිසුම් අත්සන් කරනවා. තීන්දු තීරණ ගන්නවා. හැබැයි අමාත්යවරයාට හෙට එළිවන විට සභාපතිවරයෙක් එළියට දාන්න පුලුවන්. මෙය නොවිය යුතු දෙයක්. මේ සම්බන්ධයෙන් පාර්ලිමේන්තුවට යනකම් හඬක් නගන්න හිතාගෙන ඉන්නවා. “
හිටපු සභාපතිවරයා කීවේය.
