ප්රධාන කරුණු පහක් මුල් කරගෙන දෙමළ ජාතික සන්ධානය සමග අද (25) පෙරවරුවේ ජනාධිපති කාර්යාලයේ දී විශේෂ සාකච්ඡාවක් පැවැත්වුනේය.
දීර්ඝ කාලයක් අත්අඩංගුවට ගෙන රැඳවුම්භාරයේ සිටින පිරිස් සම්බන්ධයෙන් ගනු ලබන ඉදිරි පියවර, දීර්ඝ කාලයක් වගා සඳහා යොදාගත් ඉඩම් ඒ සඳහා නිදහස් කිරීම, අතුරුදන් වූ පුද්ගලයන් පිළිබඳ විමර්ශණයක් සිදු කිරීම, නව ව්යවස්ථාව දෙමළ සහ සිංහල භාෂාවන්ට පරිවර්තනයෙන් පසු ඊට එක් විය යුතු සංශෝධන සාකච්ඡා කිරීම, මෙන්ම උතුරු – නැගෙනහිර සංවර්ධන අරමුදලක් පිහිටුවීම යන කරුණු සම්බන්ධයෙන් මෙහිදී අවධානයට යොමු කෙරිණි.
මෙම අරමුදල සම්බන්ධව සර්ව පාක්ෂික සමුළුවේදීත් සාකච්ඡාවට ලක්වුණු අතර දෙමළ ඩයස්පෝරාව උතුරු නැගෙනහිර පළාත්වල ආයෝජනයට කැඳවීම ද අවධානයට ලක්විය.
මෙහිදී ජනාධිපතිවරයා ප්රකාශ කළේ දීර්ඝ කාලයක් රඳවාගෙන සිටි සැකකරුවන් මුදාහැරීම, නඩු සහ චෝදනා ගොනු කර නැති සැකකරුවන් පිළිබඳ ඉදිරි කටයුතු කිරීම, සත්ය සෙවීමේ යාන්ත්රණය ඇරඹීම, ත්රස්ත විරෝධී පනත සංශෝධනය කිරීම, අතුරුදන්වූවන් පිළිබඳ ගැටලු විසඳීම ඇතුළු කරුණු ගණනාවක් සම්බන්ධයෙන් රජය ක්රියාකරමින් ඇති බවය.
එක්සත් ශ්රී ලංකාවක දේශපාලන විසඳුමක් සමගින් රට සෞභාග්යය කරා යාම තම අපේක්ෂාව බව දෙමළ ජාතික සන්ධානයේ නායක ආර්. සම්බන්ධන් සඳහන් කළේය.
රටක් ලෙස අප එකතු විය යුතුයි. එක රටක්, එක ජාතියක් ලෙස ක්රියා කරමින් පවතින තත්ත්වයෙන් රට මුදාගැනීම සියලු පාර්ශ්වයන්ගේ වගකීම බව ටි.එන්.ඒ නායකයා කියා සිටියේය. ශ්රී ලංකාව පෙරදිග ස්විස්ටර්ලන්තය බවට පත්වනු දැකීම තම අභිලාෂය බවය.
එක්ව රට ගොඩනගමු යන ආරාධනය තමන් දෙමළ ජාතික සන්ධානයට කරන බව පැවසූ ජනාධිපතිවරයා තමන් රට වැසියන්ගේ නායකයා ලෙස සියලු ජනතාව කෙරෙහි අවධානය යොමු කරන බව කියා සිටියේය.
අග්රාමාත්ය මහින්ද රාජපක්ෂ , අමාත්ය මහාචාර්ය ජී.එල්. පීරිස්, චමල් රාජපක්ෂ, අලී සබ්රි, ජනාධිපති ලේකම් ගාමිණී සෙනරත්, ජනාධිපති ප්රධාන උපදේශක ලලිත් වීරතුංග, දෙමළ ජාතික සන්ධානය නියෝජනය කරමින් පාර්ලිමේන්තු මන්ත්රී එම්.ඒ. සුමන්දිරන්, චාල්ස් නිර්මලනාදන්, සිවඥානම් ශ්රීදරන්, ශානක්යයන් රාජපුත්තිරන්, තවරාජා කලෙයි අර්සන්, සෙල්වම් අඩෙයිකලනාදන්, එස්. නොහාර්තලිංගම්, කෝවින්දන් කරුණාකර යන මහත්වරු මේ අවස්ථාවට එක්ව සිටියහ.
