ගන්නෝරුවේ පදිංචි 26 හැවිරිදි තරුණ මවක් සිය ප්රථම දරු ප්රසූතිය සඳහා පේරාදෙණිය ශික්ෂණ රෝහල තුළ සිදුකළ සිසේරියන් සැත්කමකින් අනතුරුව අද (06) දහවල් මිය ගොස් තිබේ.
පෙරේදා (04) සිදුකළ සිසේරියන් සැත්කම අතර ඇතිවූ අනපේක්ෂිත සංකූලතා හේතුවෙන් දැඩි සත්කාර ඒකකයට ඇතුළත් කිරීමෙන් අනතුරුව දින තුනක් දැඩි සත්කාර ඒකකයේ ප්රතිකාර ලබමින් සිටිය දී ඇය මිය ගොස් ඇත.
ඇය දරු ප්රසූතිය සඳහා පේරාදෙණිය රෝහලේ 18 වැනි වාට්ටුව වෙත ඇතුළත් වී ඇත්තේ කිසිම සංකූලතාවයක් නැතිවය.
එහෙත් සිසේරියන් සැත්කම සඳහා නිර්වින්දනය කිරීමට ලබා දෙන නිර්වින්දන ඖෂධය ලබා දී විනාඩි කීපයකින් ඇයට සංකූලතා මතුවන්නට පටන් ගෙන ඇතැයි වාර්තා වේ.
ඉතාම දැඩි සංකූලතා අතර දරුවා බිහි කර ගැනීමෙන් පසු මව වහාම දැඩි සත්කාර ඒකකය වෙත යොමු කර ඇත. එහෙත් දින පතා තත්ත්වය බරපතල වීමෙන් අනතුරුව අද දහවල් පේරාදෙණිය රෝහලේ දැඩි සත්කාර ඒකකය තුළදී මෙම තරුණ මව ජීවිතයෙන් සමුගෙන ඇත.
දරුවා යහපත් සෞඛ්ය තත්ත්වයෙන් පසුවන බව වාර්තා වේ. මවගේ දේහය පේරාදෙණිය රෝහලේ මෘත ශරීරාගාරය තුළ තැන්පත් කර තිබේ.
මේ වනවිට මරණය සිදුවූ ආකාරය ගැන නිශ්චිත හේතුවක් සොයාගෙන නැත. හෙට දහවල් සිදුකරන පශ්චාත් මරණ පරීක්ෂණයෙන් අනතුරුව මරණයට හේතුව තහවුරු කරගැනීමට නියමිතව තිබේ.
කෙසේ වෙතත් දැනට වෛද්ය අංශවල අප්රකාශිත මතය සිය පූර්ව අත්දැකීම් හා බැඳී ඇති අයුරු පෙනේ.
ලංකාව පුරා ශල්ය නිර්වින්දන වෛද්යවරුන්ගෙන් ලත් තොරතුරු අනුව පෙනෙන්නට ඇත්තේ රටේ පවතින දැඩි ආර්ථික ව්යසනය තුළ එතෙක් සැත්කම් සඳහා භාවිතා කළ ප්රමිතිගත බව සහතික කරගත් නිර්වින්දන ඖෂධය වෙනුවට මීට මාස හයක පමණ කාලයක සිට ඉන්දීය අධාර වශයෙන් ලද ඖෂධයක් රජයේ රෝහල්වල ප්රධාන නිර්වින්දන ඖෂධය ලෙස භාවිතා කිරීම ඇරඹුන බවය.
නමුත් රජයේ රෝහල් පෙරදී භාවිතා කළ ප්රමිතිගත නිර්වින්දන ඖෂධ බාහිර ඔසුසල්වල මෙන්ම පුද්ගලික රෝහල්වල ද හිඟයකින් තොරව ලබා ගත හැකි වී තිබිණි.
මෙම ඖෂධය බාහිර ඔසුසල්වලින් මිලදී ගෙන දෙන ලෙස වෛද්යවරුන් රෝගීන්ගේ පාර්ශවයට කරන ලද නිර්දේශ නැවත වෛද්යවරුන්ටම ගැටලු ඇති කළ බවත් එබැවින් දැනට රජයේ රෝහල්වල ඇති ඖෂධය භාවිතා කිරීමට ඔවුන්ට සිදුව ඇති බවත් දැනගන්නට ඇත.
කෙසේ වෙතත් දැනට රජයේ රෝහල්වල භාවිතා වන මෙම නිර්වින්දන ඖෂධය භාවිතයෙන් පසු යම් යම් සංකූලතා මතුවන බව වෛද්යවරුන් විසින් නිරීක්ෂණය කර ඒ බව දන්වා ඇතැයි දැනගන්නට ඇත. මෙම ඖෂධය භාවිතා කිරීමෙන් පසු ඇතිවූ දැඩි සංකූලතා හේතුවෙන් මව්වරු දෙපළක් පේරාදෙණිය හා කරාපිටිය රෝහල්වල දැඩි සත්කාර ඒකකයන්හි ප්රතිකාර ලබන බව රෝහල් අභ්යන්තර ආරංචි මාර්ග කියයි.
දැනට නුවර සහ කොළම ප්රධාන ජාතික රෝහල් දෙකෙහි පමණක් මසයකට සිසේරියන් සැත්කම් 700 ඉක්මවා සිද්ධ වෙමින් ඇත.
ඊට අමතරව රටේ අනෙක් ප්රධාන රජයේ රෝහල්වල මසකට සැත්කම් 550කට ආසන්න ප්රමාණයක් සිදුවේ
