කොළඹ මහනුවර ප්රධාන මාර්ගයේ පහළ කඩුගන්නාව නායෙ යෑම් අවදානමක් සහිත ප්රදේශය දෙපස රතු එළි දැල්වෙන සහ සයිරන් නාදයක් සහිත ස්වයංක්රීය පූර්ව දැනුම් දීමේ පද්ධති සවි කිරීමට කටයුතු කරන බව ජාතික ගොඩනැගිලි පර්යේෂණ ආයතනයේ අධ්යක්ෂ ජනරාල් ඉංජිනේරු ආසිරි කරුණාවර්ධන පවසයි.
මේ ඔස්සේ රථවාහන ගමනා ගමනයේ දී කන්ද ඉහළින් යම් කිසි අනතුරුදායී තත්වයක් ඇතිවීමේ මූලික ලක්ෂණ පහළවන සැනින් මෙම සංඥාක්රමය ක්රියාත්මක කිරීමට හැකි අයුරින් සකසා තිබේ.
මේ වනවිට නායෙ යෑම් සඳහා වු අවදානම් තත්වය අවම කිරීම සඳහා තිරස් විදුම් භාවිතයෙන් අභ්යන්තර ජලය පිටතට ගෙන ඇති බවද ඔහු පැවසීය.
ඒ අනුව මතුපිට ජලවහන රටාව යථාවත් කොට ඇති බව ද ඉහළින් ගලාඑන ජලය ක්රමවත්ව පහළ කානු පද්ධතිය වෙත ගලා ඒමට සලස්වා ඇති බව ද හෙතෙම කීය.
සාමාන්ය කාලගුණ තත්වයක් පැවැතියහොත් එක් මංතීරුවක් විවෘතකොට ගමනාගමනයට පහසුකම් සැලසීමට සාකච්ඡා කරමින් සිටින බව කී ආචාර්ය ආසිරි කරුණාවර්ධන මේ මොහොත වනවිටත් වර්ෂා තත්වය පවතින බැවින් ස්වයංක්රීය පූර්ව දැනුම් දීමේ සංඥා දර්ශක සවි කිරීමෙන් අනතුරුව එක් මං තීරුවක් හෝ විවෘත කරන්නේ ද යන්න සාකච්ඡා කරමින් සිටින බව පැවසුවේය.
කන්දේ යම් විස්තාරණයක් සිදුවීම සම්බන්ධයෙන් ඉදිරියටත් දැඩි අවධානයෙන් කටයුතු කිරීමට නිලධාරීන් යොදවා ඇති අතර අඳුරු අවස්ථාවල දී විදුලි ආලෝකය සැපයීමටත් සුළු හෝ වෙනසක දී සයිරන් හැඬවීම සඳහා සංඥා උපකරණ සවි කිරීමටත් සැලසුම් කර ඇති බව ඔහු පෙන්වා දුන්නේය.
