රුපියල් දාහතර කෝටි දස ලක්ෂයකට අධික දළ වීථි වටිනාකමින් යුත් කේරළ ගංජා සමඟ සැකකරුවන් 02 ක් උතුරු මුහුදේ දී නාවික හමුදා භාරයට ගත් බව නාවික හමුදාව පවසයි.
උතුරු නාවික විධානයට අනුයුක්ත නාවික හමුදා හතරවන වේග ප්රහාරක බලඝණයේ පී 423 වේග ප්රහාරක මුර යාත්රාව යොදවා කන්කසන්තුරය ප්රදේශයට ඔබ්බෙන් වූ මුහුදු ප්රදේශයේ සිදුකළ විශේෂ සෝදිසි මෙහෙයුමක දී මෙම ගංජා තොගය අත්අඩංගුවට ගෙන තිබිණි.
ඩිංගි යාත්රාවක උර දහ තුනක් (13) තුළ පාර්සල් 195 ක අසුරන ලද කේරළ ගංජා කිලෝ 428 ග්රෑම් 900 ක පමණ තොගයක් සමඟ සැකකරුවන් දෙදෙනෙකු මෙසේ නාවික හමුදා භාරයට ගැනීමෙන් අනතුරුව අද අලුයම කන්කසන්තුරේ වරායට රැගෙන විත් ඇත.
මෙම මෙහෙයුම මඟින් නාවික හමුදා භාරයට ගත් සැකකරුවන් දෙදෙනා (02) වයස අවුරුදු 33ක් සහ 37ක් වන යාපනය, අනලතිව් දූපතේ පදිංචිකරුවන් බවට හඳුනාගෙන තිබේ.
එම සැකකරුවන්, කේරළ ගංජා කිලෝ 428 ග්රෑම් 900 ක තොගය සහ ඩිංගි යාත්රාව (01) ඉදිරි නීතිමය කටයුතු සඳහා කන්කසන්තුරය පොලිසිය වෙත භාරදීමට කටයුතු කර ඇත.
අත්අඩංගුවට ගත් කේරළ ගංජා තොගය නිරීක්ෂණය සඳහා සහභාගී වූ නාවික හමුදාධිපති, එම මෙහෙයුම සිදුකළ නාවික පුද්ගලයන් වෙත සිය ප්රශංසාව පළකිරීමද එහිදී සිදු කර ඇත..
