ක්රිෂ් ගනුදෙනුවෙන් රුපියල් මිලියන 70ක් සාපරාධී සාවද්ය පරිහරණය කළ බවට චෝදනා ලැබ සිටින පාර්ලිමේන්තු මන්ත්රී නාමල් රාජපක්ෂට එරෙහි ගොනු කර ඇති නඩුවේ පූර්ව නඩු විභාග සම්මන්ත්රණය ජුනි මස 27 වැනිදා සිදුකිරීමට කොළඹ මහාධිකරණ විනිසුරු ප්රදීප් අබයරත්න අද (21) නියෝග කළේය.
රග්බි ක්රීඩාව ප්රවර්ධනය කිරීම සඳහා යැයි පවසමින් ඉන්දියාවේ ක්රිෂ් සමාගමෙන් රුපියල් මිලියන 70ක මුදලක් ලබාගෙන සාපරාධී සාවද්ය පරිහරණයක් සිදුකළේ යැයි චෝදනා කරමින් නාමල් රාජපක්ෂට එරෙහිව නීතිපතිවරයා මෙම නඩුව ගොනු කර තිබිණි.
අද නඩුව කැඳවූ අවස්ථාවේ දී පැමිණිල්ල වෙනුවෙන් පෙනී සිටි නියෝජ්ය සොලිසිටර් ජනරාල්වරයා පැවසුවේ විත්තිය විසින් ඉල්ලා සිටිනු ලැබූ ඇතැම් ලේඛන අද දින විවෘත අධිකරණය ඉදිරියේ ලබා දෙන බවය.
ඇතැම් ලේඛන අපරාධ පරීක්ෂණ දෙපාර්තමේන්තුව හරහා පරීක්ෂා කර ලබා දිය යුතු බැවින් එම ලේඛන ඉදිරියේ දී ලබා දීමට කටයුතු කරන බව ද නියෝජ්ය සොලිසිටර් ජනරාල්වරයා අධිකරණයට දැනුම් දුන්නේය.
එහි දී විත්තිය වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් කියා සිටියේ පැමිණිල්ල විසින් සියලු ලේඛන ලබා දීමෙන් අනතුරුව විත්තියේ ස්ථාවරය අධිකරණයට දැනුම් දෙන බවය.
කරුණු සලකා බැලූ මහේස්ත්රාත්වරයා පූර්ව නඩු විභාග සම්මන්ත්රණය ජුනි මස 27 දා නැවත කැඳවීමට දින නියම කළේය.
