අනුරාධපුර පර්සි කුරුනේරු –
වී වගාවට ජලය ප්රමාණවත් නොවීම හේතුවෙන් නාච්චාදුව ජලාශයේ මහ ඇල යටතේ මෙවර යල කන්නයේ වගා කොට තිබෙන කුඹුරු අක්කර තුන් දහසක් පමණ විනාශවීමේ අවදානමක් පවතින බව නාච්චාදුව ඒකාබද්ධ ගොවි සංවිධානයේ ලේකම් ආර්.ඇම් .පුංචිරාළ පවසයි.
එම කුඹුරුවල වගා කොට ඇති වී වගාව බේරා ගැනීමට නම් ශ්රී ලංකා මහවැලි අධිකාරිය මගින් තවත් අමතර ජල මුර දෙකක් නාච්චාදුව ජලාශය හරහා ලබා දිය යුතු බවත් හෙතෙම සඳහන් කළේය.
මේ වනවිට පවතින වියලි කාලගුණය හා දැඩි සුළං තත්ත්වය හේතුවෙන් නාච්චාදුව ජලාශයේ ජල මට්ටම අඩි දහසයයි අඟල් එකොළහක් දක්වා පහල බැස ඇති බවත් එමගින් මේ මස 25 වෙනිදා වනවිට මහ ඇල යටතේ වගා කර තිබෙන කුඹුරු ඉඩම් සඳහා මුදා හල හැක්කේ තවත් ජල මුර දෙකක් පමණක් බවත් ඉන්පසු නාච්චාදුව ජලාශයට මහවැලි ජලාශ මගින් තවත් ජල මුර දෙකක් ලබාදීමට පියවර ගතහොත් එම කුඹුරු අක්කර තුන් දහසක ප්රමාණය බේරා ගත හැකිවනු ඇති බවත් නාච්චාදුව ඒකාබද්ධ ගොවි සංවිධානයේ ලේකම් ආර්.ඇම.පුංචිරාළ අද (11) පැවසිය.
උද්ගතව ඇති තත්ත්වය පිළිබඳව තමන් කෘෂිකර්ම අමාත්යවරයාගේ සහ ශ්රී ලංකා මහවැලි අධිකාරියේ අධ්යක්ෂ ජනරාල්වරයාගේ අවධානය යොමු කර ඇති බවත් ඔහු වැඩිදුරටත් ප්රකාශ කළේය.
