මෙරට දේශපාලන ක්ෂේත්රයේ ආන්දෝලනාත්මක චරිතයක්ව සිටි හිටපු පාර්ලිමේන්තු මන්ත්රී නන්න්දන ගුණතිලක අභාවප්රාප්ත වූයේය.
කලක් රෝගාතුරව සිට හෙතෙම රාගම රෝහලේ ප්රතිකාර ලබමින් සිටියදී අද (18) අලුයම අභාවප්රාප්ත විය. 1962 වර්ෂයේ සැප්තැම්බර් මස 07වන දින පානදුරේ දී උපත ලැබු නන්දන දිවි සැරියෙන් සමුගන්නා විට ඔහු 63 වියේ පසුවිය.
නන්දන ගුණතිලක දේශපාලන ක්ෂේත්රයේ කැපී පෙනන චරිතයක්ව මතු වන්නේ ජනතා විමුක්ති පෙරමුණේ මුල් පෙළ සාමාජිකයෙක් ලෙස ජනතා විමුක්ති පෙරමුණ නියෝජනය කරමින් ජනාධිපති අපේක්ෂකයා ලෙස 1999 ජනාධිපතිවරණයට ඉදිරිපත් වීමෙන් පසුය. ඔහු එම මැතිවරණයේ දී ඡන්ද 3,34, 173ක් ලැබූ අතර තුන් වැනි ඉහළම ඡන්ද ප්රමාණය ලැබූ අපේක්ෂකයා බවට පත් විය.
ඔහු ජනතා විමුක්ති පෙරමුණේ සාමාජිකයෙක් ලෙස 1982 සිට 2004 දක්වා අතිශය දුෂ්කර කාල පරිච්ඡේදයේ දී ජනතා විමුක්ති පෙරමුණට එරෙහිව ලෙයින් යකඩින් කළ මර්ධනයට එරෙහිව අරගල කළ පක්ෂයේ ප්රධාන කාඩරයෙක් වූයේය. සැලකිය යුතු කාලයක් ඔහු ජනතා විමුක්ති පෙරමුණේ පරිපාලන ලේකම්වරයා ලෙස ද කටයුතු කළේය.
2000 -2001 දක්වා වූ 11 වැනි පාර්ලිමේන්තුවේත්, 2001-2004 දක්වා පැවති 12වන පාර්ලිමේන්තුවෙත් නන්දන ගුණතිලක ජනතා විමුක්ති පෙරමුණේ පාර්ලිමේන්තු මන්ත්රීවරයෙක් ලෙස පාර්ලිමේන්තුව නියෝජනය කළේය.
2004න් පසු නන්දන ගුණතිලකගේ ජනතා විමුක්ති පෙරමුණේ දේශපාලනය නිමා වූයේය. ඔහු මහින්ද රාජපක්ෂගේ නායකත්වය සහිත එක්සත් ජනතා නිදහස් සන්ධානයේ සාමාජිකත්වය ලබාගෙන 2004 වසරේ සිට 2014 දක්වා වසර 10ක් කටයුතු කළේය. එක්සත් ජනතා නිදහස් සන්ධානය නියෝජනය කරමින් ඔහු 13 වැනි පාර්ලිමේන්තුවේ 2004 සිට 2010 දක්වා කළුතර දිස්ත්රික් පාර්ලිමේන්තු මන්ත්රීවරයෙක් ලෙස කටයුතු කළේය.
එමෙන්ම 2009 දී ඔහු සංචාරක අමාත්ය ධුරය දැරූ අතර තැපැල් හා විදුලි සංදේශ වැඩබලන අමාත්යවරයා ලෙසද වගකීම් දැරුවේය.
2015 දී එක්සත් ජනතා නිදහස් සන්ධානය හැර ගිය නන්දන ගුණතිලක එක්සත් ජාතික පක්ෂයේ සාමාජිකත්වය ලබා ගත්තේය. ඔහු එක්සත් ජාතික පක්ෂය නියෝජනය කරමින් පානදුර නගරසභාවේ නගරාධිපති ධූරය ද දැරුවේය. එතැන් සිට රනිල් වික්රමසිංහගේ නායකත්වය යටතේ දේශපාලනය කළ නන්දන මියයන විට නව ප්රජාතන්ත්රවාදි පෙරමුණේ ක්රියාකාරී සාමාජිකයෙක් ලෙස දේශපාලනයේ නියැලෙමින් සිටියේය.
