අද මධ්යම රාත්රියේ සිට ක්රියාත්මක වන පරිදි කිලෝ ග්රෑම් 12.5 ලිට්රෝ ගෑස් සිලින්ඩරයක මිල රුපියල් 2,185 කින් ඉහළ නැංවීමට කටයුතු කිරීමත් සමග ගෘහස්ථ ගෑස් සිලින්ඩරයක නව මිල රුපියල් 4,860 ක් දක්වා ඉහළ ගොස් තිබේ.
අද මධ්යම රාත්රිය දක්වා ගෘහස්ථ ගෑස් සිලින්ඩරයක් අලෙවි කෙරුණේ රුපියල් 2,675 ක මිලකටය.
ලිට්රෝ සමාගමේ සභාපති විජිත හේරත් අද කොළඹදී මාධ්ය හමුවක් කැඳවමින් ගෑස් මිල වැඩිවීමක් අපේක්ෂා කරන ලෙසත් සමාගම ලබා ඇති පාඩුව හමුවේ මිල වැඩිකිරීමකින් තොරව ලබන මස සිට ගෑස් ගෙන්වා ගැනීමට හැකියාවක් නොමැති බවත් කීවේය.
ඔහු කීවේ කිලෝ ග්රෑම් 12.5 ගෑස් සිලින්ඩරයකින් සමාගමට රුපියල් 2500ක් පාඩු වන බැවින් එම සිලින්ඩරයක මිල රුපියල් 5175ක් දක්වා මිල ඉහළ දැමිය යුතු බවය. මිල වැඩිවිමක් අපේක්ෂා කරන ලෙස ඔහු පාරිභෝගිකයන්ගෙන් ඉල්ලා සිටියේය.
රිවස් කරගත් හැටි
සභාපතිගේ මේ කතාව අලුත් එක්ක නොවේ. මේ ආකාරයෙන්ම මේ මිල ගණන්වලින්ම පසුගිය 22 දා මධ්යම රාත්රියේ සිට ලිට්රෝ සමාගම මිල වැඩිවීමක් නිවේදනය කළේය. එක්වරම රුපියල් 2500කින් ගෑස් මිල ඉහළ ගිය විට මිනිස්සුන්ගේ හුස්ම හිර විය. එහෙත් ඒ සමගම රජය නිවේදනය කළේ ඒ මිල වැඩිවීම පිළිනොගන්නා බවය.
ඊට රාජ්ය පරිපාලනයේ අනුමැතිය ලැබී නොමැති බැවින් කිලෝග්රෑම් 12.5ක ලිට්රෝ ගෑස් ගෘහස්ථ සිලින්ඩරය පෙර මිලටම අලෙවි කරන බව රජය වැඩිදුරටත් ප්රකාශ කළේය. ලිට්රෝ සමාගම ගෑස් මිල රිවස් කරගත්තේය.
මිල සංශෝධනය කළාට ගෑස් නෑ…
විශේෂත්වය වන්නේ මේ මිල වැඩිකිරීම හා රිවස් කිරීම සිදුවන අවස්ථාව වන විට වෙළෙඳපලට ගෑස් නිකුත් කිරීම පුරා දින 10ක් තිස්සේ නැවතී තිබීමය. වෙළෙඳපලේ එකම ගෑස් සිලින්ඩරයක්වත් නැති අවස්ථාවක මිල වැඩිවීම කළේය. මිල රිවස් කළේය. මිනිස්සු පත්තු වී නිවී ගියහ.
ලිට්රෝ සමාගම කී ආකාරයට ගෑස් බෙදීම පටන් ගන්නට හිටියේ අදය. එහෙත් අදත් ගෑස් නැත. සති දෙකක් ගෑස් නැති රටක ගෑස් සමාගමේ සභාපති මාධ්ය හමුවක් කැඳවා පසුගිය 22 දා කී කතාවම දින 04කට පසු අද යළි කීවේය.
ඒ සෑම ගෑස් සිලින්ඩරයකින්ම රුපියල් 2500ක් සමාගමට පාඩු බැවින් රුපියල් 5175ක් තෙක් ගෑස් මිල වැඩි කළ යුතු බවය.
එම මාධ්ය සාකච්ඡාව කැඳවා පැය කීපයකින් ගෑස් මිල වැඩි කළේය. ඒ යෝජනා කළ මිලට වඩා රුපියල් 315ක් අඩුවෙනි. එනම් රුපියල් 5175ක් බව කී ගෑස් සිලින්ඩරයක් රුපියල් 4,860කට මිල නියම කර තිබේ. රුපියල් 2500ක් වෙනුවට රුපියල් 2150ක මිලකට ගෑස් මිල නන්වනු ලැබුවේය.
මේ සෙල්ලමේ සාරාංශය මෙසේය.
- දින හතරකට කලින් ගෑස් සමාගම ගෑස් නැති රටක ගෑස් සිලින්ඩරයක් 2500කින් ඉහළ දැම්මේය. මිනිස්සු පාරට බහින්න තරම් උද්වේගකර වූහ. එහෙත් ඒ ක්ෂණයකින් රජය මැදිහත් වී මිල වැඩිවීම අවලංගු කර ගෑස් පරණ මිලට ගෙනාවේය.
- ඊට දින හතරකට පසු යළිත් ගෑස් සමාගම මාධ්ය ඉදිරියට ආවේය. ගෑස් සිලින්ඩරයක් 2500කින් වැඩි කළ යුතු බව කීවේය. ගෑස් මිල 5175ක් වනු ඇතැයි පැවසුවේය.
- ඊට පැය කීපයකට පසුව ආණ්ඩුව ගෑස් මිල වැඩි කළේය. ඒ වැඩිකරන බව කී 2500ට වඩා රුපියල් 350ක් අඩුවෙනි. මිල වැඩිවීම 2150කි. ගෑස් සිලින්ඩරයක් 4860කි.
- දැන් මිනිස්සුන්ට සතුටුය. දැවෙන ආවේගය නැත. ඔවුන් කල්පනා කරන්නේ අඩු වී ඇති රුපියල් 350 ගැනය.
