දේශබන්දු තෙන්නකෝන් පොලිස්පති ලෙස පත් කිරීම සම්බන්ධයෙන් වත්මන් ජනාධිපතිවරයාගේ ස්ථාවරය දැනුම්දීම සඳහා අවස්ථාවක් ලබා දෙන ලෙස අතිරේක සොලිසිටර් ජනරාල් නෙරිල් පුල්ලේ කළ ඉල්ලීමට ශ්රේෂ්ඨාධිකරණය අද අවසර ලබා දුන්නේය. එසේම තරුණ ජනමාධ්යවේදීන්ගේ සංගමය වෙනුවෙන් එහි සභාපති තරිඳු ජයවර්ධනගේ ඉල්ලීමක් අනුව මෙම නඩුවේ වගඋත්තරකරුවකු ලෙස නම් කිරීමට අවසර දුන් හිටපු ජනාධිපති රනිල් වික්රමසිංහට විරෝධතා ඇත්නම් ගොනු කිරීමට ද ශ්රේෂ්ඨාධිකරණය අද අවසර ලබා දුන්නේය.
දේශබන්දු තෙන්නකෝන් පොලිස්පති ලෙස පත් කිරීමට එරෙහිව තරුණ ජනමාධ්යවේදීන්ගේ සංගමය, මැල්කම් කාදිනල් රංජිත් කොළඹ අගරදගුරුතුමා, මහාචාර්ය සාවිත්රි ගුණසේකර ඇතුළු පාර්ශ්ව 8ක් ගොනු කළ මූලික අයිතිවාසිකම් පෙත්සම් අද යසන්ත කෝදාගොඩ, අචල වෙංගප්පුලි සහ මහින්ද සමයවර්ධන යන ශ්රේෂ්ඨාධිකරණ විනිසුරු මඩුල්ල ඉදියේ කැඳවිණි. මුලින් මෙම පෙත්සම් වනිසුරු නිලමැදිරියේදී කැඳවනු ලැබූ අතර පසුව එය විවෘත අධිකරණයේදී කැඳවනු ලැබීය.
මෙම පෙත්සම් පූර්ණ විනිසුරු මඩුල්ලකට යොමු කරන ලෙස වගඋත්තරකාර දේශබන්දු තෙන්නකෝන් මෝසමක් මගින් ඉල්ලා තිබුණු අතර එම ඉල්ලීම ප්රතික්ෂේප කරන ලෙස මාධ්යවේදී තරිඳු ජයවර්ධන ද මෝසමක් මගින් ඉල්ලා තිබිණි. ඒ අනුව පූර්ණ විනිසුරු මඩුල්ලක් සඳහා වන ඉල්ලීම අගවිනිසුරු වෙත යොමු කරන ලෙස ලේඛකාධිකාරීයට නියෝග කළ අධිකරණය එමගින් මෙම පෙත්සම් විභාග කර අවසන් කිරීම මෙම විනිසුරුමඩුල්ලටම නොහැකි බවට හෝ මෙම විනිසුරු මඩුල්ල ඉවත්වූ බවක් අදහස් නොවන බව ද සඳහන් කළේය.
පෙත්සම්කරුවන් වෙනුවෙන් ජනාධිපති නීතිඥ සාලිය පීරිස්, ජනාධිපති නීතිඥ ජෙෆ් අලගරත්නම්, නීතිඥ තිෂ්ය වේරගොඩ, නීතිඥ සුරේන් ප්රනාන්දු ඇතුළු නීතිඥවරු කණඩායමක් පෙනී සිටි අතර වගඋත්තරකාර දේශබන්දු තෙන්නකේන් වෙනුවෙන් ජනාධිපති නීතිඥ රොමේෂ් සිල්වාද, වගඋත්තරකාර රනිල් වික්රමසිංහ වෙනුවෙන් ජනාධිපති නීතිඥ රොනල්ඩ් පෙරේරාද ඇතුළු පිරිසක් පෙනී සිටියහ.
