දිනසේන රතුගමගේ –
ඉලංකෙයි තමිල් අරුසු කච්චි පක්ෂයේ ( ITAK ) අර්බූදයත් සමගින් දෙමළ ජාතික සන්ධානය දෙකඩ වී දියාරු වෙමින් පවතින බව ප්ලොට් සංවිධානයේ නායක ධර්මලිංගම් සිද්ධාර්ථන් මන්ත්රීවරයා යාපනයේදී පැවසීය.
යාපනයේදී ඊයේ (29) මාධ්ය හමුවකට එක්වෙමින් මන්ත්රීවරයා කියා සිටියේ ඉලංකෙයි තමිල් අරුසු කච්චි පක්ෂය නව නායකයෙකු තෝරා පත් කර ගැනීමත් සමගම නිර්මාණය වූ පක්ෂයේ අභ්යන්තර ආරවුල් මහ ලේකම්වරයෙකු තෝරා ගැනීමට ඡන්දය විමසූ අවස්ථාවේදී යළි උත්සන්න වූ බවයි.
නව මහලේකම්වරයා පිළිගැනීමට විශාල පිරිසක් අකැමති වීම නිසා ඔහුව පත් කරගැනීමට පැවති ඡන්දය විමසීම අවලංගු කිරීමටත් පක්ෂයේ මධ්යම කාරක සභාව දින නියමයක් නොමැතිව කල් දැමිමටත් සිදු වීම නිසා මේ වන විට දෙමළ ජාතික සන්ධානයට නායකයෙකු පත් කර ගැනීමට නොහැකි තත්ත්වයක් උද්ගත වී ඇති බවද සිද්ධාර්ථන් මන්ත්රීවරය සඳහන් කළේය.
ආර්.සම්පන්ධන් මන්ත්රීවරයාම දෙමළ ජාතික සන්ධානයේ නායකයා වශයෙන් තබා ගැනීමට පිරිසක් කැමැත්ත පල කරද්දී ඊට තවත් පිරිසක් විරුද්ධ වි ඇති බවද ඔහු පැවසීය.
ඉලංකෙයි තමිල් අරුසු කච්චි පක්ෂයේත් දෙමළ ජාතික සන්ධානයේත් මේ අර්බූදය නිසා දෙමළ මන්ත්රීවරු වෙනත් වෙනත් දෙමළ පක්ෂ වලට එකතු වීම ඉතාම ඉක්මනින් සිදුවීමට ඇති ඉඩකඩ වැඩි බව කී මන්ත්රීවරයා දෙමළ ජාතික සන්ධානය ශ්රී ලංකා රජය සමග කටයුතු කිරීමට යාමේදී මෙම විරසක භාවය විශාල ගැටලුවක් බවට පත් විය හැකි බවද පෙන්වා දුන්නේය.
දැනට පැහැදිලිව දෙකඩ වී අති දෙමළ පක්ෂය ඉදිරියේදී තවත් කොටස් වලට කැඩී යාමක් සිදු විය හැකි බවද මේ සිදුවන තත්ත්වය දෙස ප්ලොට් සංවිධානය ඉතා ඉවසිල්ලෙන් හා දැඩි විපරමකින් යුතුව බලා සිටින බවද සිද්ධාර්ථන් මන්ත්රීවරයා යාපනයේ පැවති මාධ්ය හමුවේදී වැඩිදුරටත් කියා සිටියේය.
